Read De Bibel JHF 2. Kjennichs 17 Bible Online

2. Kjennichs 17 - De Bibel JHF bible

2. Kjennichs 17

¹Aum 12-ten Joa Ahas, däm Kjennich von Juda wort Hosea, Ela sien Sän, Kjennich en Samaria äwa Israel un rejieed näajen Joa.

²Un hee deed, waut enne Uagen Gottes bees wia, doch nich aus de Kjennichs von Israel, dee ver am jewast wieren.

³Jäajen an jinkj Salmanesa, de Kjennich von Assierien, nopp; un Hosea wort sien Kjnajcht un jeef am Jeschenkja.

⁴Oba de Kjennich von Assierien entdakjt eene Veschwierunk von Hosea; dan hee haud Booten aun So, däm Kjennich von Ägipten, jeschekjt, un haud däm Kjennich von Assierien kjeen Jeschenkj jebrocht, aus jieda Joa. Doa neem de Kjennich von Assierien am jefangen un läd am jebungen em Jefenkjnis.

⁵Un de Kjennich von Assierien jinkj nopp en daut gaunze Launt, un jinkj rauf no Samaria un beloagad daut dree Joa lang.

⁶Aum näajenden Joa Hosea neem de Kjennich von Assierien Samaria en un fieed Israel no Assierien wajch; un hee leet am wonen en Halach un aum Habor, aum Stroom Gosan, un enne Städa Medien.

⁷Un dit passieed, wiels de Kjinja Israel jäajen däm Harn jesindicht hauden, äarem Gott, dee an ut däm Ägiptenlaunt noppjefieet haud, ut däm Farao siene Haunt, däm Kjennich von Ägipten, wiels see sikj fa aundre Jetta enjsten

⁸un enne Sazungen de Nazionen jinjen, dee de Har ver de Kjinja Israel rutjejoacht haud, un de Kjennichs von Israel, sikj dee selje jemoakt hauden.

⁹Un de Kjinja Israel dreewen jäajen däm Harn, äarem Gott, heimliche Dinj, dee nich rajcht wieren; un see buden sikj Hechten en aul äare Städa, von de Wajchta Torms bat de fauste Städa;

¹⁰Un muaken sikj Bildstendasch un Ascherim opp jiedren huagen Aunboaj un unja jiedrem jreenem Boom,

¹¹un see rieekjade doa opp aule Hechten, aus de Nazionen, dee de Har ver an wajchjefieet haud; un see deeden beese Dinj, om däm Harn too reizen;

¹²un see deenden de Jetzen, von dän de Har an jesajcht haud: Soowaut sell jie nich doonen!

¹³Un de Har wia jäajen Israel un jäajen Juda derch aule Profeeten, aule Seena, endäm hee säd. Dreit om von june beese Wäaj un hoolt miene Jebooten, miene Sazungen, nom gaunzen Jesaz, daut ekj june Vodasch befool, un daut ekj junt jeschekjt ha derch miene Kjnajchts, de Profeeten.

¹⁴Oba see hieeden nich un muaken äa Jenekj hoat, aus daut Jenekj von äare Vodasch, dee däm Harn, äarem Gott, nich jejleeft ha.

¹⁵Un see veachten siene Sazungen un sienen Bunt, däm hee met äare Vodasch jemoakt, un siene Zeijnise, dee hee an bewäsen haud; un see jinjen däm Nuschtjen no, un haundelde iedel, un jinjen de Nazionen no, dee om an wieren, von dän de Har an befoolen haud, nich aus dee to doonen.

¹⁶Un see veleeten aule Jebooten Gottes, äarem Gott, un muaken sikj jegotne Bilda, twee Kjalwa, un muaken eene Aschera, un bekjten sikj ver däm gaunzen Himmelshäa un deenden däm Baal.

¹⁷Un see leeten äare Säns un äare Dajchta derch daut Fia gonen, un dreewen Woasajerie un Zaubarie, un vekoften sikj, to doonen, waut enne Uagen Gottes bees wia, om am to reizen.

¹⁸Doa wort de Har sea oajalich äwa Israel un deed an von sienem Aunjesecht wajch; daut bleew nuscht äwa, blooss de Staum Juda auleen.

¹⁹Uk Juda beoobacht nich de Jebooten Gottes, sienem Gott; un see jinjen en de Sazungen Israels, dee see selfst jemoakt hauden.

²⁰Doa veacht de Har däm gaunzen Somen Israels un deemutijd an, un hee jeef an enne Haunt von Plindra, bat hee an von sienem Aunjesecht veschmäten haud.

²¹Dan Israel haud sikj von David sienem Hus loosjeräten, un see hauden Jerobeam, Nebat sienem Sän, toom Kjennich jemoakt; un Jerobeam lenkjt Israel vom Nofoljen Gottes auf un veleid an to eene groote Sind.

²²Un de Kjinja Israel jinjen en aule Sinden von Jerobeam, dee hee jedonen haud; see leeten nich doavon,

²³bat de Har Israel von sienem Aunjesecht wajchdeed, soo aus hee derch aul siene Kjnajchts, de Profeeten, jerät haud; un Israel wort ut sienem Launt no Assierien wajchjefieet bat opp disem Dach.

²⁴Un de Kjennich von Assierien brocht Lied ut Babel un ut Kuta un ut Awa un ut Hamat un ut Sefarwajim, un leet an aune Sied de Kjinja Israel en de Städa Samaria wonen; un see neemen Samaria en un wonden en siene Städa.

²⁵Un daut passieed, aum Aunfank aus see aunjesiedelt hauden enjsten see sikj fa däm Harn nich; doa schekjt de Har Leiws unja an, dee unja an warjde.

²⁶Un maun räd toom Kjennich von Assierien un säd: De Nazionen dee du wajchjefieet un enne Städa Samaria hast wonen loten, kjanen de Wies vom Laundesgott nich; un hee haft Leiws unja an jeschekjt, un kjikj, dee moaken an doot, wiels see de Wies vom Laundesgott nich kjanen.

²⁷Doa befool de Kjennich von Assierien un säd. Lot eenem de Priesta, dee jie von doa wajchjefieet ha, doahan gonen, daut see hangonen un doa selfst wonen; un saul an no de Wies vom Laundesgott lieren.

²⁸Un daut kaum eena de Priesta, dee maun ut Samaria wajchjefieet haud, un wond en Betel; un hee lieed an, woo see däm Harn ferchten sullen.

²⁹Un see muaken sikj, eene jiedre Nazion, äare Jetta, un stalden dee enne Hiesa oppe Hechten, dee de Samarita jemoakt hauden, eene jiedre Nazion en äare Städa, en dee see wonden.

³⁰Un de Lied von Babel muaken Sukkot-Benot; un de Lied von Kut muaken Nergal; un de Lied von Hamat muaken Aschima;

³¹un de Awita muaken Nibchas un Tartak; un de Sefarwita vebrenden däm Adrammelek un däm Anammelek, de Jetta von Sefarwaim, äare Säns em Fia.

³²Un see ferchten däm Harn, un see muaken sikj ut däm gaunzen Volkj Priesta fa de Hechten, dee fa an enne Hiesa oppe Hechten opfaden.

³³See ferchten däm Harn, un see deenden äare Jetta no de Wies de Nazionen, ut dee maun an wajchjefieet haud.

³⁴Bat opp disem Dach doonen see no de oole Wies; see ferchten däm Harn nich, un see doonen nich no äare Sazungen un no äare Rajchte, un uk nich nom Jesaz un nom Jeboot, daut de Har Jakob siene Säns befoolen haud, däm hee däm Nomen Israel jeef.

³⁵Un doch haud de Har met an eenen Bunt jemoakt un an befoolen un jesajcht: Jie sellen aundre Jetta nich ferchten, un sellen junt ver an nich dolbekjen un an nich deenen un an nich opfren;

³⁶sonda däm Harn, dee junt met groote Krauft un met utjestrakjtem Oarm ut däm Ägiptenlaunt noppjefieet haft, däm sell jie ferchten, un däm sell jie aunbäden un am opfren.

³⁷Un de Sazungen un de Rajchte un daut Jesaz un daut Jeboot, dee hee fa junt jeschräwen haft, sell jie hoolen, un aule Doag doonen, un jie sellen nich aundre Jetta ferchten.

³⁸Un däm Bunt, däm ekj met junt jemoakt ha, sell jie nich vejäten, un sellen nich aundre Jetta ferchten;

³⁹sonda däm Harn, junem Gott, sell jie ferchten, un hee woat junt ut de Haunt aul june Fiend raden.

⁴⁰Oba see hieeden nich, sonda deeden no äare oole Wies.

⁴¹Soo ferchten dise Nazionen däm Harn, un deenden uk äare Jetzenbilda. Uk äare Kjinja un äare Kjinjaschkjinja doonen bat opp disem Dach, soo aus äare Vodasch jedonen ha.