Read De Bibel JHF 2. Kjennichs 18 Bible Online

2. Kjennichs 18 - De Bibel JHF bible

2. Kjennichs 18

¹Un daut passieed aum dredden Joa Hosea, Ela sienem Sän, däm Kjennich von Israel, doa wort Hiskia Kjennich, de Sän von Ahas, däm Kjennich von Juda.

²25 Joa wia hee oolt, aus hee Kjennich wort, un hee rejieed 29 Joa en Jerusalem; un de Nomen von siene Mutta wia Abi, Sekarja siene Dochta.

³Un hee deed, waut enne Uagen Gottes rajcht wia, no aulem, waut sien Voda David jedonen haud.

⁴Hee deed de Hechten wajch un veschluag de Biltstendasch, un rott de Aschera ut, un vebruak de koppane Schlang, dee Moses jemoakt haud; dan bat janem Dach hauden de Kjinja Israel ar jerieekjat, un maun nand ar Nechustan [de Koppane].

⁵Hee vetrud däm Harn, däm Gott Israels; un no am es siensjlikjen nich jewast unja aule Kjennichs von Juda, noch unja dän, dee ver am wieren.

⁶Un hee hong aun däm Harn, hee jinkj nich von am auf; un hee hilt siene Jebooten, dee de Har däm Moses befoolen haud.

⁷Un de Har wia met am; en aulem, wuahan hee jinkj, haud hee Jelinjen. Un hee erhoow sikj jäajen däm Kjennich von Assierien un deend am nich.

⁸Hee schluach de Filista bat Gasa, vom Wajchta Torm aun bat de fauste Staut.

⁹Un aum vieeden Joa Hiskia passieed daut, daut wia daut säwende Joa Hosea, Ela sienem Sän, däm Kjennich von Israel, doa jinkj Salmanesa, de Kjennich von Assierien, jäajen Samaria rauf un beloagad daut.

¹⁰Un aum Enj von dree Joa neem hee daut en; aum sasten Joa Hiskia, daut wia daut näajende Joa Hosea, däm Kjennich von Israel, doa wort Samaria enjenomen.

¹¹Un de Kjennich von Assierien fieed Israel wajch no Assierien; un hee vesad an no Halach un aun däm Habor, aum Stroom Gosan, un enne Städa de Meeda;

¹²doarom daut see oppe Stemm Gottes, äarem Gott, nich jehieet, un sienen Bunt äwaträden hauden - aules, waut Moses, de Kjnajcht Gottes, befoolen haud - un wiels see nich jehorcht un daut nich jedonen hauden.

¹³Un aum 14-den Joa vom Kjennich Hiskia jinkj Sanherib, de Kjennich von Assierien, rauf jäajen de fauste Städa en Juda un neem dee en.

¹⁴Doa schekjt Hiskia, de Kjennich von Juda, aun däm Kjennich von Assierien no Lachisch un leet am sajen: Ekj ha mie vesindicht, drei om von mie; waut du mie opperlajen woascht, well ekj droagen. Un de Kjennich von Assierien läd Hiskia, däm Kjennich von Juda, 300 Talent Selwa un 30 Talent Golt opp.

¹⁵Un Hiskia jeef aulet Selwa, daut em Hus Gottes un enne Schauzkoma em Kjennichshus wia.

¹⁶Too selje Tiet bruak Hiskia vonne Däaren vom Tempel Gottes un de Past, dee Hiskia, de Kjennich von Juda, äwatrocken haud, daut Golt auf un jeef daut däm Kjennich von Assierien.

¹⁷Oba de Kjennich von Assierien schekjt von Lachisch däm Tartan [Feldharr] un däm Rabsaris [Bowaschta äwa de Wajchtasch] un däm Rabsake [Bowaschta äwa de Mulschenkjen] met eenem groote Häa jäajen däm Kjennich Hiskia no Jerusalem. Un see jinjen nopp un kaumen no Jerusalem, un hilden aune Wota Leidinj aum bowaschten Läch, dee aune Wollwausch Gauss es.

¹⁸Un see roopten däm Kjennich. Doa jinjen no an rut Eljakim, Hilkija sien Sän, dee äwa daut Hus wia, un Schebna, de Schriewa, un Joach, Asaf sien Sän, de Jeschichtschriewa.

¹⁹Un Rabschak säd to an: Sajcht too Hiskia: Soo sajcht de groota Kjennich, de Kjennich von Assierien: Waut es daut fa een Vetruen, met waut du vetrust?

²⁰Du sajchst - daut es blooss een Wuat oppe Leppen: Doa es Rot un Macht toom Kjrich. Blooss, opp wäm vetrust du, daut du die jäajen mie oppjehowen hast?

²¹Nu, kjikj, du vetrust opp eenem jekjnekjtem Ruastock, opp Ägipten, dee, wan sikj wäa opp am stett, am enne Haunt foat un ar derchboat. Soo es de Farao, de Kjennich von Ägipten, aul dän, dee opp am vetruen.

²²Un wan jie to mie sajen: Opp däm Harn, onsem Gott, vetru wie! - Es hee daut nich, däm siene Hechten un Aultoaren Hiskia wajchjedonen, doa hee too Juda un to Jerusalem jesajcht haft: Ver disem Aultoa sell jie aunbäden en Jerusalem?

²³Un nu, lot die doch met mienem Harn en, däm Kjennich von Assierien: Ekj well die 2000 Pieed jäwen, wan du die Rittasch doanopp saten kaust.

²⁴Un woo west du eenem eensjen Stauthoola von de jerinjste Kjnajchts von mienem Harn trigjjoagen? Oba du vetrust opp Ägipten wäajen de Woages un Rittasch.

²⁵Nu, sie ekj onen däm Harn jäajen disem Uat noppjekomen, om am to vedoawen? De Har haft to mie jesajcht: Go nopp jäajen dit Launt un vedoaw daut!

²⁶Un Eljakim, Hilkija sien Sän, un Schebna un Joach säden toom Rabsake: Räd doch met diene Kjnajchts opp arameisch, dan wie vestonen daut; un räd nich opp judisch met ons ver de Volkjsuare, daut oppe Mia es.

²⁷Un Rabschake räd to an: Haft mien Har mie no dienem Harn un no die jeschekjt, om dise Wieed to räden? Nich to de Mana, dee oppe Mia setten, om met junt äa Mest to äten un äa Pisch to drinkjen?

²⁸Un de Rabsake stunt un roopt met ne lude Stemm opp judisch un räd un säd: Hieet daut Wuat vom groote Kjennich, däm Kjennich von Assierien!

²⁹Soo sajcht de Kjennich: Daut Hiskia junt nich teischt; dan hee woat junt nich von siene Haunt raden kjennen.

³⁰Un daut Hiskia junt nich opp däm Harn vetreest, endäm hee sajcht: De Har woat ons jewess raden, un dise Staut woat nich enne Haunt vom Kjennich von Assierien jejäft woaren.

³¹Hieet nich opp Hiskia! Dan aulsoo räd de Kjennich von Assierien: Moakt Fräd met mie un komt no mie rut, soo sell jie een jiedra von sienem Wienstock un een jiedra von sienem Fiejenboom äten, un een jiedra daut Wota ut sienem Borm drinkjen,

³²bat ekj kom un junt en een Launt hol aus jun Launt, een Launt von Jeträajd un jungem Wien, een Launt von Broot un Wienboaj, een Launt von Eeljbeem un Honnich, daut jie läwen un nich stoawen. Oba hieet nich opp Hiskia! Dan hee teischt junt, endäm hee sajcht: De Har woat ons raden!

³³Ha dan de Jetta vonne Velkja een jiedra sien Launt ut de Haunt vom Kjennich von Assierien jerat?

³⁴Woa sent de Jetta von Hamat un Arpad? Woa de Jetta von Sefarwaim, von Hena un Iwa? Ha see Samaria von miene Haunt jerat?

³⁵Wua es eena unja de Jetta de Lenda, dee äa Launt von miene Haunt jerat haft, daut de Har Jerusalem von miene Haunt raden sull?

³⁶Un daut Volkj wia stell un auntwuad am kjeen Wuat; dan daut wia daut Jeboot vom Kjennich, dee jesajcht haud: Jie sellen nich auntwuaden!

³⁷Un Eljakim, Hilkija sien Sän, dee äwa daut Hus wia, un Schebna, de Schriewa, un Joach, Asaf sien Sän, de Jeschichtschriewa, kaumen no Hiskia met verätne Kjleeda un säden am de Wieed vom Rabsak.