Read De Bibel JHF 2. Kjennichs 19 Bible Online

2. Kjennichs 19 - De Bibel JHF bible

2. Kjennichs 19

¹Un daut passieed, aus de Kjennich Hiskia daut hieed, doa vereet hee siene Kjleeda un neem sikj een Sakduak om un jinkj em Hus Gottes.

²Un hee schekjt Eljakim, dee äwa daut Hus wia, un Schebna, däm Schriewa, un de Eltestasch de Priesta, en Sakduak aunjetrocken, nom Profeet Jesaja, Amoz sienem Sän.

³Un see säden to am: Soo sajcht Hiskia: Dis Dach es een Dach de Bedrenkjnis un de Zucht un de Vespottung; dan de Kjinja sent bat aune Jeburt jekomen, oba doa es kjeene Krauft toom jebäaren.

⁴Veleicht woat de Har, dien Gott, aule Wieed vom Rabsake hieren, dee sien Har, de Kjennich von Assierien, jeschekjt haft, om däm läwendjen Gott too vespotten, un woat de Wieed bestrofen, dee de Har, dien Gott, jehieet haft. Erhäw een Jebäd fa de Äwaje, dee noch hia sent!

⁵Un däm Kjennich Hiskia siene Kjnajchts kaumen no Jesaja.

⁶Un Jesaja säd to an: Aulsoo sell jie too junem Harn sajen: Soo sajcht de Har: Enjst die nich fa de Wieed, dee du jehieet hast, met waut de Deena vom Kjennich von Assierien mie jelastat ha.

⁷Kjikj, ekj well am eenen Jeist jäwen, daut hee eene Norecht hieren un en sien Launt trigjgonen woat; un ekj well am derch sien Schwieet en sienem Launt faulen loten.

⁸Un de Rabsake jinkj trigj un funk däm Kjennich von Assierien em stried jäajen Libna; dan hee haud jehieet, daut hee von Lachisch wajchjegonen wia.

⁹Un hee hieed von Tirhaka däm Kjennich von Ätiopien, sajen: Kjikj, hee es utjegonen, om jäajen die too strieden. Doa schekjt hee wada Booten no Hiskia un säd:

¹⁰Soo sell jie too Hiskia, däm Kjennich von Juda, räden un sajen: Daut die dien Gott nich teischt, opp däm du vetrust, endäm du sajchst: Jerusalem woat nich enne Haunt vom Kjennich von Assierien jejäft woaren!

¹¹Kjikj, du hast jehieet, waut de Kjennichs von Assierien aule Lenda jedonen ha, endäm see an vetiljde; un du sust jerat woaren?

¹²Ha de Jetta de Nazionen, dee miene Vodasch venicht ha, an jerat: Gosan un Haran un Rezef, un de Kjinja Eden, dee en Telassar wieren?

¹³Wua es de Kjennich von Hamat un de Kjennich von Arpad un de Kjennich äwa de Staut Sefarwaim, von Hena un Iwa?

¹⁴Un Hiskia naum däm Breef ut de Haunt de Booten un laus am; un hee jinkj nopp em Hus Gottes, un Hiskia spreed däm ver däm Harn ut.

¹⁵Un Hiskia bäd ver däm Harn un säd: Jahwe, Gott Israels, dee du tweschen de Cherubim troonst, du auleen best daut, dee de Gott äwa aule Kjennichrikjs de Ieed es; du hast däm Himmel un Ieed jemoakt.

¹⁶Har, neij dien Ua un hia! Har, doo diene Uagen op un kjikj! Jo, hia de Wieed von Sanherib, dee hee jeschekjt haft, om däm läwendjen Gott too vespotten.

¹⁷Woarhauft, Har, de Kjennichs von Assierien ha de Nazionen un äa Launt vewust,

¹⁸un see ha äare Jetta em Fia jeschmäten; dan see wieren nich Jetta, sonda een Woakj von Menschen Henj, Holt un Steen, un see ha dee venicht.

¹⁹Un nu, Har, ons Gott, rad ons doch von siene Haunt, doamet aule Kjennichrikjs de Ieed weeten, daut du, Jahwe, auleen Gott best!

²⁰Doa schekjt Jesaja, Amoz sien Sän, no Hiskia un leet am sajen: Soo sajcht de Har, de Gott Israels: Waut du wäajen Sanherib, däm Kjennich von Assierien, to mie jebät hast, ha ekj jehieet.

²¹Dit es daut Wuat, daut de Har äwa am jerät haft: Daut veacht die, daut spott äwa die de Junkfru, de Dochta Zion; de Dochta Jerusalem scheddat daut Haupt äwa die häa.

²²Wäm hast du vespott un jelastat, un jäajen wäm de Stemm oppjehowen? Jäajen däm Heiljen Israels hast du diene Uagen oppjehowen!

²³Derch diene Booten hast du däm Harn vespott un hast jesajcht: Met miene Menj de Woages sie ekj oppe Huage Boaj jestäajen, daut butaschte Enj vom Libanon; un ekj well siene huage Zeeda un siene baste Ziepressen aufhaken, un ekj well en siene butaschte Wonunk komen, en sienem Boomgoaden.

²⁴Ekj ha jegroft un framdet Wota jedrunken; un met miene Footsole woa ekj aule Wotastreem Mazor utdräjen.

²⁵Hast du nich jehieet, daut ekj daut von wiet auf bewirkj un von de oole Doag häa daut jemoakt ha? Nu ha ekj daut komen loten, daut du fauste Städa venichst un to kole [vewusten] Steenhupes moakst.

²⁶Un äare Bewona woaren machtloos, see woaren enjstlich un beschämt; see wieren aus Krut oppe Stap un jreenet Grauss, aus Grauss oppe Däakja, un Jeträajd daut vebrent es, ea daut oppjeit.

²⁷Un ekj kjan dien Setten [Wone], un dien Utgank un dien Engank, un dien Toobe jäajen mie.

²⁸Wäajen dien Toobe jäajen mie, un wiels dien Äwamoot en miene Uaren noppjekomen es, woa ekj mienen Rinkj en diene Näs lajen un mien Jebett em Mul un woa die oppem Wajch trigj fieren, opp däm du jekomen best!

²⁹Un dit saul die daut Tieekjen sennen: Maun woat aun disem Joa daut nojewossne vonne Arnt äten, un aum tweeden Joa, waut utjeloten es; oba aum dredden Joa sell jie seien un arnten, un Wienboaj plaunten un äare Frucht äten.

³⁰Un daut Wajchjerande vom Hus Juda, daut äwajebläwen es, woat wada Wartlen no unjen schlonen un no bowen Frucht droagen.

³¹Dan von Jerusalem woat een Äwajebläwnet utgonen, un de Wajchjerande vom Boajch Zion. De Iewa Gottes woat daut doonen!

³²Doarom, soo sajcht de Har von däm Kjennich von Assierien: Hee saul nich en dise Staut komen, un hee saul doa kjeen Feila scheeten un kjeen Schild ar handreien un kjeen Wal jäajen ar oppschedde.

³³Opp däm Wajch, opp däm hee jekomen es, saul hee trigjgonen, un saul nich en dise Staut komen, sajcht de Har.

³⁴Un ekj well dise Staut bewoaren, om ar to raden, om mien- un om David, mienem Kjnajcht, sienem wellen.

³⁵Un aun dee selje Nacht passieed daut, doa jinkj een Enjel Gottes ut un schluach em Loaga de Assura 185 000 Maun. Un aus maun Zemorjes tiedich oppstunt, kjikj, doa wieren see aula Doot.

³⁶Un Sanherib, de Kjennich von Assierien, jinkj wajch, un jinkj un kaum trigj un bleew en Ninive.

³⁷Un daut passieed, aus hee sikj em Hus Nisrok, sienem Gott, bekjt, doa brochten Adrammelek un Schareza, siene Säns, am met daut Schwieet om; un see randen em Launt Ararat. Un Esar-Haddon, sien Sän, wort Kjennich aun siene Städ.