Read De Bibel JHF 2. Kjennichs 2 Bible Online

2. Kjennichs 2 - De Bibel JHF bible

2. Kjennichs 2

¹Un daut passieed, aus de Har däm Elia em Stormwint nom Himmel noppfoaren leet, doa jinkj Elia un Elisa von Gilgal wajch.

²Un Elia säd to Elisa: Bliew doch hia; dan de Har haft mie bat no Betel jeschekjt. Un Elisa säd: Soo woa de Har läft un diene Seel läft, wan ekj die velot! Un see jinjen rauf no Betel.

³Doa kaumen de Profeeten äare Säns, dee en Betel wieren, rut no Elisa un säden to am: Weetst du, daut de Har vondoag dienem Harn äwa dienem Haupt wajch nämen woat? Un hee säd: Uk ekj weet daut; siet stell!

⁴Un Elia säd to am: Elisa, bliew doch hia; dan de Har haft mie no Jericho jeschekjt. Oba hee säd: Soo woa de Har läft un diene Seel läft, wan ekj die velot! Un see kaumen no Jericho.

⁵Doa kaumen de Profeeten äare Säns, dee en Jericho wieren, no Elisa un säden to am: Weetst du, daut de Har vondoag dienen Harn äwa dienem Haupt wajchnämen woat? Un hee säd: Uk ekj weet daut; siet stell!

⁶Un Elia säd to am: Bliew doch hia; dan de Har haft mie aun däm Jordan jeschekjt. Oba hee säd: Soo woa de Har läft un diene Seel läft, wan ekj die velot! Un soo jinjen see beid metenaunda.

⁷Un 50 Maun von de Profeeten Säns jinjen han un stalden sikj jäajenäwa wietauf; un see beid jinjen nom Jordan.

⁸Doa naum Elia sienen Mauntel un wekjeld am toop un schluach oppem Wota; un daut vedeeld sikj doahan un dorthan, un see jinjen beid oppem Drieejen äwa.

⁹Un daut passieed, aus see äwajegonen wieren, doa säd Elia too Elisa: Wensch, waut ekj die doonen saul, ea ekj von die jenomen woa. Un Elisa säd: Soo mucht mie doch een dobbeldet Deel von dienem Jeist woaren!

¹⁰Un hee säd: Du hast schwoaret jewenscht! Wan du mie seenen woascht, wan ekj von die jenomen woa, soo saul die aulsoo woaren; oba wan nich, soo woat daut nich sennen.

¹¹Un daut passieed, aus see jinjen un em gonen räden, kjikj doa, een Woagen von Fia un Pieed von Fia, dee an von eenaunda trand; un Elia fua em Stormwint opp em Himmel.

¹²Un Elisa sach daut un schrieech: Mien Voda, mien Voda! Woages Israels un siene Rittasch! Un hee sach am nich mea. Doa pakt hee siene Kjleeda un vereet dee en 2 Stekja.

¹³Un hee hoof Elia sienen Mauntel opp, dee von am raufjefollen wia, un jinkj trigj un kaum aum Eewa vom Jordan.

¹⁴Un hee naum Elia sienen Mauntel, dee von am raufjefollen wia, un schluach oppem Wota un säd: Wua es de Har, de Gott von Elia? - Uk hee schluach oppem Wota, un daut vedeeld sikj doahan un dorthan; un Elisa jinkj äwa.

¹⁵Aus nu de Profeeten Säns, dee jäajenäwa en Jericho wieren, am sagen, doa säden see: De Jeist Elia rut opp Elisa! Un see kaumen am entjäajen un bekjten sikj ver am bat oppe Ieed,

¹⁶un see säden to am: Kjikj doch, daut sent bie diene Kjnajchts 50 stoakje Mana; muchten see doch gonen un dienem Harn sieekjen, auf nich de Jeist Gottes am wajch jedroacht un am opp eenem de Boaj ooda en eene de Läachten jeschmäten haft. Oba hee säd: Schekjt an nich.

¹⁷Un see drenjden en am, bat hee nojeef. Doa säd hee: Lot an gonen! Un soo schekjten see 50 Maun; un see sochten dree Doag lank, oba see fungen am nich.

¹⁸Un see kaumen no am trigj, (hee wia oba noch un Jericho); un hee säd to an: Ha ekj junt nich jesajcht: Got nich han?

¹⁹Un de Mana de Staut säden to Elisa: Kjikj doch, de Loag enne Staut es goot, aus mien Har sitt, oba daut Wota es schlajcht, un daut Launt es onfruchtboa.

²⁰Doa säd hee: Hoolt mie eene niee Komm, un doot Solt doanenn! Un see brochten daut am.

²¹Un hee jinkj rut no de Wotakjwal, un schmeet daut Solt doa nenn un säd: Soo sajcht de Har: Ekj ha dit Wota jesunt jemoakt; daut woat kjeen Doot noch Onfruchtboakjeit mea doarut entstonen.

²²Un daut Wota wort jesunt bat opp disem Dach, nom Wuat, daut Elisa jerät haud.

²³Un hee jinkj von doa wajch no Betel; un aus hee oppem Wajch noppjinkj, doa kaumen kjliene Junges ut de Staut, un vespotten am un säden to am: Komm nopp, Kolkopp! Komm nopp, Kolkopp!

²⁴Un hee dreid sikj om un sach an un flucht an em Nomen Gottes. Doa kaumen 2 Boares ut däm Woolt un vereeten von an 42 Kjinja.

²⁵Un hee jinkj von doa wajch nom Boajch Karmel; un von doa jinkj hee no Samaria trigj.