Read De Bibel JHF 2. Kjennichs 20 Bible Online

2. Kjennichs 20 - De Bibel JHF bible

2. Kjennichs 20

¹Too de Tiet wort Hiskia dootkrank. Un Jesaja, Amoz sien Sän, de Profeet, kaum no am, un räd to am: Soo sajcht de Har: Bestal dien Hus, dan du woascht stoawen un nich jesunt woaren.

²Doa dreid hee sien Aunjesecht no de Waunt un bäd to däm Harn un säd:

³Ach, Har! Jedenkj doch, daut ekj en Woarheit un met opprechtjem Hoaten ver dienem Aunjesecht jegonen sie, un jedonen ha, waut en diene Uagen goot wia! Un Hiskia hield sea.

⁴Un daut passieed, Jesaja wia noch nich vom meddelsten Väahoff rutjegonen, doa wia daut Wuat Gottes to am aulsoo:

⁵Drei om un saj too Hiskia, däm Ferscht von mienem Volkj: Soo sajcht de Har, de Gott von dienem Voda David: Ekj ha dien Jebäd jehieet, ekj ha diene Tronen jeseenen; kjikj, ekj well die jesunt moaken; aum dredden Dach woascht du em Hus Gottes noppgonen.

⁶Un ekj well 15 Joa too diene Doag doatoo doonen; un vom Kjennich von Assierien siene Haunt well ekj die un dise Staut raden; un ekj well dise Staut bewoaren om mien- un om David, mienem Kjnajcht, sienen wellen.

⁷Un Jesaja säd: Holt eene Fiejekuak. Un see holden dee un läden dee oppem Schwäa; un hee wort jesunt.

⁸Un Hiskia säd to Jesaja: Waut es daut Tieekjen, daut de Har mie jesunt moaken woat, un daut ekj aum dredden Dach em Hus Gottes noppgonen woa?

⁹Un Jesaja säd: Daut woat die daut Tieekjen von däm Harn sennen, daut de Har daut Wuat doonen woat, daut hee jerät haft: Saul de Schauten 10 Stoopen verwoats gonen, ooda sull hee 10 Stoopen trigjgonen?

¹⁰Un Hiskia säd: Daut es däm Schauten leicht, 10 Stoopen rauftogonen; ne, sonda de Schauten saul 10 Stoopen trigjgonen.

¹¹Doa roopt de Profeet Jesaja to däm Harn; un hee leet däm Schauten aune Stoopen, dee hee aun Ahab sienem Sonnenwiesa raufjegonen wia, om 10 Stoopen trigjgonen.

¹²Too de Tiet schekjt Berodak-Baladan, Baladan sien Sän, de Kjennich von Babel, een Breef un Jeschenkj aun Hiskia; dan hee haud jehieet, daut Hiskia krank jewast wia.

¹³Un Hiskia hieed sikj dee aun, un hee wees an daut gaunze Schauzhus; daut Selwa un daut Golt, de Jewerzen un daut baste Eelj; un sien gaunzet Jereetschoftshus, un aules, waut en sienem Schauz wia; doa wia nuscht en sienem Hus un en siene gaunze Harschoft, waut Hiskia an nich jewast haud.

¹⁴Doa kaum Jesaja, de Profeet, nom Kjennich Hiskia un säd to am: Waut ha dise Mana jesajcht? Un wuahäa sent see no die jekomen? Un Hiskia säd: Ut eenem wieden Launt sent see jekomen, von Babel.

¹⁵Un hee säd: Waut ha see en dienem Hus jeseenen? Un Hiskia säd: See ha aules jeseenen, waut en mienem Hus es; daut jeft nuscht en mienem Schauz, waut ekj an nich jewast haud.

¹⁶Doa säd Jesaja too Hiskia: Hea daut Wuat Gottes!

¹⁷Kjikj, daut komen Doag, doa aules, waut en dienem Hus es un waut diene Vodasch bat opp disem Dach jesaumelt ha, no Babel wajch jebrocht woat; daut woat nuscht äwabliewen, sajcht de Har.

¹⁸Un von diene Säns, dee ut die väakomen woaren, dee du jebäaren woascht, woat maun nämen; un see woaren Hoffbeaumte em Kjennichspaulaust en Babel sennen.

¹⁹Un Hiskia säd to Jesaja: Daut Wuat Gottes es goot, daut du jerät hast; un hee säd. Daut woat doch Fräd un Sechaheit en miene Doag sennen?

²⁰Un daut Äwaje de Jeschicht Hiskia, un aul siene Macht, un woo hee däm Läch un de Wotaleidinj jemoakt un daut Wota enne Staut jeleit haud, es daut nich em Buak de Chronik de Kjennichs von Juda jeschräwen?

²¹Un Hiskia läd sikj to siene Vodasch. Un Manasse, sien Sän, wort Kjennich en siene Städ.