Read De Bibel JHF 2. Kjennichs 21 Bible Online

2. Kjennichs 21 - De Bibel JHF bible

2. Kjennichs 21

¹12 Joa wia Manasse oolt, aus hee Kjennich wort, un hee rejieed 55 Joa en Jerusalem; un de Nomen von sienem Mutta wia Hefzi-Bah.

²Un hee deed, waut enne Uagen Gottes bees wia, no de Aufschu de Nazionen, dee de Har ver de Kjinja Israel rutjejoacht haud.

³Un hee bud de Hechten wada opp, dee sien Voda Hiskia wajchjedonen haud, un muak däm Baal wada Aultoaren, un muak eene Aschera, soo aus Ahab, de Kjennich von Israel, jemoakt haud, un hee buag sikj ver däm gaunzen Himmelshäa un deend an.

⁴Un hee bud Aultoaren em Hus Gottes, von dee de Har jesajcht haud: En Jerusalem well ekj mienem Nomen saten.

⁵Un hee bud däm gaunzen Himmelshäa Aultoaren en de beid Häw vom Hus Gottes.

⁶Un hee leet sienem Sän derch daut Fia gonen, un hee dreef Zaubarie un Woasajerie, bestald doodes Doodesbefroaga un Woasaja; hee deed väl Beeset enne Uagen Gottes, om am to reizen.

⁷Un hee stald daut jeschnizte Bilt de Aschera, daut hee jemoakt, em Hus, von däm de Har too David un to sienem Sän Salomo jesajcht haud: En disem Hus un en Jerusalem, daut ekj ut aule Stam Israels erwält ha, well ekj mienem Nomen opp eewich saten!

⁸Un ekj well däm Foot Israels nich mea ut däm Launt gonen loten, daut ekj äare Vodasch jejäft ha, wan see blooss doaropp achten, no aulem to doonen, waut ekj an befoolen ha, un nom gaunzen Jesaz, daut mien Kjnajcht Moses an befoolen haft.

⁹Oba see hieeden nich; un Manasse veleid an, daut Beese mea to doonen aus de Nazionen, dee de Har ver de Kjinja Israel vetilcht haud.

¹⁰Doa räd de Har derch siene Kjnajchts, de Profeeten, un säd:

¹¹Wiels Manasse, de Kjennich von Juda, dise Aufschu un Iebel jedonen haft, mea aus aules, waut de Amorita jedonen ha, dee ver am jewast sent, un uk Juda derch siene Jetta toom sindjen veleit haft,

¹²doarom, soo sajcht de Har, de Gott Israels, kjikj, ekj well Onjlekj äwa Jerusalem un Juda brinjen, daut jiedrem, dee daut hieet, siene beid Uaren jäakje sellen.

¹³Un ekj woa äwa Jerusalem de Motschnua Samaria trakjen un daut Loot von Ahab sienem Hus, un ekj woa Jerusalem utwesche, aus maun eene Komm utwescht; haft maun ar utjewescht, soo dreit maun ar opp äare bowaschte Sied om.

¹⁴Un ekj woa de Äwaje von mienem Oawdeel vesteeten un an enne Haunt äare Fiend jäwen, un see woaren aul äare Fiend toom Raup un to Plindrunk woaren;

¹⁵wiels see jedonen, waut en miene Uagen bees es, un mie emma von däm Dach aun jereizt ha, doa äare Vodasch ut Ägipten jegonen sent, bat opp disem Dach.

¹⁶Un Manasse vegoot uk sea väl onschuldjet Bloot, bat hee Jerusalem doamet jefelt haud von eenem Enj bat däm aundren; buta siene Sinden, wuaderch hee Juda veleit haud, endäm hee deed, waut bees enne Uagen Gottes wia.

¹⁷Un daut Äwaje de Jeschicht Manasse un aules, waut hee jedonen un siene Sinden, dee hee begonen haft, es daut nich em Buak de Chronik de Kjennichs von Juda jeschräwen?

¹⁸Un Manasse läd sikj to siene Vodasch, un wort em Goaden bie sienem Hus begroft, em Goaden Ussa. Un Amon, sien Sän, wort Kjennich aun siene Städ.

¹⁹22 Joa wia Amon oolt, aus hee Kjennich wort, un hee rejieed twee Joa en Jerusalem; un de Nomen von siene Mutta wia Meschullemet, Haruz siene Dochta, von Jotba.

²⁰Un hee deed, waut enne Uagen Gottes bees wia, aus sien Voda Manasse jedonen haud.

²¹Un hee jinkj opp aule Wäaj, opp dee sien Voda jegonen wia, un deend de Jetta, dee sien Voda jedeent haud, un bekjt sikj ver an dol;

²²un hee veleet däm Harn, däm Gott siene Vodasch, un jinkj nich oppe Wäaj Gottes.

²³Un Amon siene Kjnajchts muaken eene Veschwierunk jäajen am un brochten däm Kjennich en sienem Hus om.

²⁴Doa schluach daut Laundesvolkj aul dee, dee sikj jäajen däm Kjennich Amon veschwuaren hauden, un daut Laundesvolkj muak Josia, sienem Sän, toom Kjennich aun siene Städ.

²⁵Un daut Äwaje de Jeschicht Amon, waut hee jedonen haft, es daut nich em Buak de Chronik de Kjennichs von Juda jeschräwen?

²⁶Un maun begrow am en sienem Grauf, em Goaden Ussa. Un Josia, sien Sän, wort Kjennich en siene städ.