Read De Bibel JHF 2. Kjennichs 22 Bible Online

2. Kjennichs 22 - De Bibel JHF bible

2. Kjennichs 22

¹Acht Joa wia Josia oolt, aus hee Kjennich wort, un hee rejieed 31 Joa en Jerusalem; un de Nomen von siene Mutta wia Jedida, Adajas siene Dochta, von Bozkat.

²Un hee deed, waut enne Uagen Gottes rajcht wia; un hee jinkj opp aul de Wäaj von sienem Voda David un jinkj nich noch rajchtsch noch linkjsch auf.

³Un daut passieed aum 18-den Joa vom Kjennich Josia, doa schekjt de Kjennich Schafan, Azalja sien Sän, vom Sän Meschullam, däm Schriewa, em Hus Gottes un säd:

⁴Go nopp no Hilkija, däm Huagapriesta, daut hee daut Jelt toopnämt, daut em Hus Gottes jebrocht worden es, daut Wajchta aune Schwal vom Volkj enjenomen ha,

⁵doamet maun daut en dee äare Henj jeft, dee daut Woakj doonen, dee aum Hus Gottes jestalt sent; un see sellen daut dän jäwen, dee daut Woakj em Hus Gottes doonen, om daut vefollne aum Hus uttobätren;

⁶de Holtoabeida un de Bulied un dee doa miare, un om Holt to kjeepen un behakte Steena, om daut Hus uttobätren.

⁷Doch saul daut Jelt, daut en äare Haunt jejäft woat, nich met an veräakjent woaren; dan see haundlen opprechtich.

⁸Un de Huagapriesta Hilkija säd to Schafan, däm Schriewa: Ekj ha daut Jesazbuak em Hus Gottes jefungen. Un Hilkia jeef daut Buak däm Schafan, un hee laus daut.

⁹Un Schafan, de Schriewa, kaum nom Kjennich un brocht däm Kjennich Norecht un säd: Diene Kjnajchts ha daut Jelt, daut em Hus wia, utjesched un daut en dee äare Haunt jejäft, dee daut Woakj doonen, dee aum Hus Gottes jestalt sent.

¹⁰Un Schafan, de Schriewa, berecht däm Kjennich un säd: De Priesta Hilkija haft mie een Buak jejäft. Un Schafan laus daut ver däm Kjennich.

¹¹Un daut passieed, aus de Kjennich de Wieed vom Jesazbuak hieed, doa vereet hee siene Kjleeda.

¹²Un de Kjennich befool Hilkija, däm Priesta, un Ahikam, Schafan sienem Sän, un Akbor, Michaja sienem Sän, un Schafan, däm Schriewa, un Asaja, däm Kjennichskjnajcht, un säd:

¹³Got han, befroagt däm Harn fa mie un fa daut Volkj un fa gaunz Juda wäajen de Wieed von disem jefungnem Buak. Dan groot es de Jrim Gottes, dee jäajen ons oppjeflaumt es, doarom daut onse Vodasch oppe Wieed en disem Buak nich jehieet ha, om no aulem to doonen, waut onstwäjen passieet es.

¹⁴Doa jinjen de Priesta Hilkija un Ahikam un Akbor un Schafan un Asaja no de Profeetin Hulda, Schallum siene Fru, vom Sän Tikwas, Harchas sienem Sän, vom Wajchta de Kjleeda; oba see wond en Jerusalem em tweeden Stautdeel; un see räden to ar.

¹⁵Un see säd to an: Soo sajcht de Har, de Gott Israels: Sajcht däm Maun, dee junt no mie jeschekjt haft:

¹⁶Soo sajcht de Har: Kjikj, ekj well äwa disem Uat Onjlekj brinjen un äwa siene Bewona; aule Wieed vom Buak, dee de Kjennich von Juda jeläst haft.

¹⁷Doarom daut see mie veloten un aundre Jetta jerieekjat ha, om mie too reizen met aul de Woakjen äare Henj, soo woat mien Jrim oppflaumen jäajen disem Uat un woat nich utjelascht woaren.

¹⁸Oba toom Kjennich von Juda, dee junt jeschekjt haft, om däm Harn too befroagen, to am sell jie soo sajen: Soo sajcht de Har de Gott Israels; betrafs de Wieed, dee du jehieet hast, -

¹⁹wiels dien Hoat wieekj jeworden es, un du die ver däm Harn jedeemooticht hast, aus du daut hieescht, waut ekj äwa disem Uat un äwa siene Bewona jerät ha, daut see toom Vewieste un toom Fluch woaren sellen, un du diene Kjleeda veräten un ver mie jehielt hast, soo ha ekj daut uk jehieet, sajcht de Har.

²⁰Doarom, kjikj, woa ekj die no diene Vodasch vesaumlen; un du woascht en dien Grauf jebrocht woaren en Fräd, un diene Uagen sellen aul dit Onjlekj nich seenen, daut ekj äwa disem Uat brinjen woa. Un see brochten däm Kjennich Auntwuat.