Read De Bibel JHF 2. Kjennichs 23 Bible Online

2. Kjennichs 23 - De Bibel JHF bible

2. Kjennichs 23

¹Un de Kjennich schekj han, un maun vesaumeld no am aule Eltestasch von Juda un Jerusalem.

²Un de Kjennich jinkj nopp em Hus Gottes, un aule Mana von Juda un aule Bewona von Jerusalem met am, un de Priesta un de Profeeten, un aulet Volkj, vom Kjlansten bat toom Jratsten; un maun laus ver äare Uaren aule Wieed ut däm Bundesbuak, daut em Hus Gottes jefungen worden wia.

³Un de Kjennich stald sikj aum Stenda un muak eenen Bunt ver däm Harn, däm Harn no too foljen un siene Jebooten un siene Zeijnise un siene Sazungen met gaunzem Hoaten un met gaunze Seel too hoolen, om dise Bundeswieed too erfellen, dee en disem Buak jeschräwen sent. Un daut gaunze Volkj kaum en däm Bunt.

⁴Un de Kjennich befool Hilkija, däm Huagapriesta, un däm tweeden Priesta un de Schwalen Wajchtasch, aulet Jereetschoft ut däm Tempel Gottes ruttodoonen, dee däm Baal un de Aschera un däm gaunzen Himmelshäa jemoakt wia; un hee vebrend dee buta Jerusalem oppe Stap von Kidron, un leet äarem Stoff no Betel brinjen.

⁵Un hee schauft de Jetzenpriesta auf, dee de Kjennichs von Juda enjesat hauden, un dee oppe Hechten, enne Städa von Juda un om Jerusalem jerieekjat hauden; un dee, dee däm Baal, de Sonn un däm Mon un de Stearnbilda un däm gaunzen Himmelshäa rieekjade.

⁶Un hee schauft de Aschera ut däm Hus Gottes rut, buta Jerusalem, aun däm Bach Kidron un vemold dee too Stoff un schmeet äarem Stoff oppe Jräwa vom jemeenem Volkj.

⁷Un hee reet de Huarenhiesa dol, dee aum Hus Gottes wieren, doa de Frues fa de Aschera wirkjten.

⁸Un hee leet aule Priesta ut de Städa Juda komen, un veonreinijd de Hechten, woa de Priesta jerieekjat hauden, von Geba bat Beerscheba. Un hee reet de Hechten un de Dooasch dol, dee aum Engank vom Dooa Josua, däm Bowaschten de Staut, wieren, aune linkje Sied, wan maun nom Stautdooa kjemt.

⁹Doch opfaden de Priesta de Hechten nich oppem Aultoa Gottes en Jerusalem, sonda see auten Onjesuadet enne Medd von äare Breeda.

¹⁰Un hee veonreinicht daut Tofet [Aufschu Städ], dee enne Läacht de Säns Hinnom lach, doamet kjeena mea sienen Sän ooda siene Dochta däm Molech derch daut Fia gonen leet.

¹¹Un hee schauft de Pieed auf, dee de Kjennichs von Juda de Sonn toom Iea aum Engank vom Hus Gottes oppjestalt hauden, bie de Koma Nethan-Melek, däm Hoffbeaumten, dee em Aunbu wia; un de Sonnenwoages vebrend hee met Fia.

¹²Un de Aultoaren, dee opp Ahas sienem Dak oppem bowaschten Stock wieren, dee de Kjennichs von Juda jemoakt hauden, un de Aultoaren, dee Manasse en beid Häw vom Hus Gottes jemoakt haud, reet de Kjennich dol un veschluag an, un hee schmeet äarem Stoff aun däm Bach Kidron.

¹³Un de Kjennich veonreinijd de Hechten, dee ver Jerusalem, dee aune rajchte Sied vom Vedoawennsboajch wieren, dee Salomo, de Kjennich von Israel, de Astoret, däm Aufschu de Zidonia, un Kamos, däm Aufschu Moab, un Milkom, däm Aufschu de Kjinja Amon, jebut haud.

¹⁴Un hee veschluag de Biltstendasch un hak de Ascherim om, un feld äare Städ met Menschenknoakes aun.

¹⁵Un uk däm Aultoa, dee en Betel wia, de Hecht, dee Jerobeam, Nebat sien Sän, jemoakt haud, dee Israel toom sindjen veleit haud, uk disem Aultoa un de Hecht reet hee dol; un hee vebrend de Hechten, vemold dee too Stoff un vebrend de Aschera.

¹⁶Un aus Josia sikj omdreid un de Jräwa sach, dee doa oppem Boajch wieren, doa schekjt hee han un leet de Knoakes ut de Jräwa holen un vebrend dee oppem Aultoa un veonreinijd am, nom Wuat Gottes, dee de Maun Gottes utjeroopt haud, dee dise Dinj utroopt.

¹⁷Un hee säd: Waut es daut doa fa een Grauf Denkjmol, daut ekj seenen kaun? Un de Stautslied säden to am: Daut es daut Grauf vom Maun Gottes, dee von Juda jekomen es un dise Dinj utjeroopt haft, dee du jäajen däm Aultoa von Betel jedonen hast.

¹⁸Un hee säd: Lot am ligjen, kjeena saul siene Knoakes beonruje! Un soo raden see siene Knoakes met de Knoakes vom Profeet, dee von Samaria jekomen wia.

¹⁹Un uk aule Hiesa de Hechten, dee enne Städa Samaria wieren, dee de Kjennichs von Israel jemoakt hauden, om däm Harn too reizen, deed Josia wajch; un hee deed met an krakjt soo, aus hee en Betel jedonen haud.

²⁰Un hee schlacht aule Priesta vonne Hechten, dee doa selfst wieren, oppe Aultoaren, un vebrend Menschenknoakes doabowen. Un hee jinkj trigj no Jerusalem.

²¹Un de Kjennich befool däm gaunzen Volkj un säd: Hoolt däm Harn, junem Gott, Passa, aus en disem Bundesbuak jeschräwen steit.

²²Dan daut wia kjeen Passa soo jefiat worden aus dit, von de Doag de Rechta aun, dee Israel jerecht ha, un aule Doag de Kjennichs von Israel un de Kjennichs von Juda;

²³sonda aum 18-den Joa vom Kjennich Josia wort dit Passa däm Harn en Jerusalem jefiat.

²⁴Un uk de doodes Beschwäara un de Woasaja, un de Husjetta un de Jetta, un aula Aufschu, dee em Launt Juda un en Jerusalem jeseenen worden, schauft Josia wajch, om de jesazes Wieed uttofieren, dee em Buak jeschräwen stunden, daut de Priesta Hilkija em Hus Gottes jefungen haud.

²⁵Un ver am es kjeen Kjennich aus hee jewast, dee nodäm Harn omjedreit wia met sienem gaunzen Hoaten un met siene gaunze Seel un met siene gaunze Krauft, no aulem Jesaz Moses; un no am es kjeena soo aus hee oppjestonen.

²⁶Doch dreid de Har nich om vom Jrim - sienem groote Oaja, met waut sien Oaja jäajen Juda oppjeflaumt wia, wäajen aul de Oajanis, met dee Manasse am jereizt haud.

²⁷Un de Har säd. Uk Juda well ekj von mienem Aunjesecht wajchdoonen, aus ekj Israel wajchjedonen ha; un ekj well dise Staut veschmieten, dee ekj erwält, Jerusalem, un daut Hus, von däm ekj jesajcht ha: Mien Nomen saul doa selfst sennen!

²⁸Un daut Äwaje de Jeschicht Josia un aules, waut hee jedonen, es daut nich em Buak de Chronik de Kjennichs von Juda jeschräwen?

²⁹En siene Doag jinkj de Farao Neko, de Kjennich von Ägipten, jäajen däm Kjennich von Assierien nopp, aun däm Stroom Eufrat. Un de Kjennich Josia jinkj am entjäajen; oba Neko brocht am en Megiddo om, aus hee am doa sach.

³⁰Un siene Kjnajchts fieeden am doot oppem Woagen von Megiddo wajch un brochten am no Jerusalem; un see begrowden am en sienem Grauf. Un daut Laundesvolkj neem Joaas, Josia sienem Sän, un see saulwden am un muaken am toom Kjennich aun sienem Voda siene städ.

³¹23 Joa wia Joahas oolt, aus hee Kjennich wort, un hee rejieed 3 Moonat en Jerusalem; un de Nomen von siene Mutta wia Hamutal, Jeremia siene Dochta, von Libna.

³²Un hee deed, waut enne Uagen Gottes bees wia, no aulem, waut siene Vodasch jedonen hauden.

³³Un de Farao Neko sad am jefangen en Ribla em Launt Hamat, soo daut hee nich mea Kjennich en Jerusalem wia; un hee läd däm Launt eene Jeldschuld von 100 Talent Selwa un eenem Talent Golt opp.

³⁴Un de Farao Neko muak Eljakim, Josia sienem Sän, toom Kjennich, aun Josia, sienem Voda siene Städ, un veendad sienem Nomen en Jojakim; oba Joaas naum hee met, un hee kaum no Ägipten un storf doa selfst.

³⁵Un Jojakim jeef daut Selwa un daut Golt däm Farao; doch äwaschluag hee daut Launt, om daut Jelt nom Befäl von Farao to jäwen; vom Laundesvolkj, von eenem jiedren no sienem Gootdenkjen, jeef hee daut Selwa un daut Golt däm Farao Neko auf.

³⁶25 Joa wia Jojakim oolt, aus hee Kjennich wort, un hee rejieed 11 Joa en Jerusalem; un de Nomen von siene Mutta wia Sebudda, Pedaja siene Dochta, von Ruma.

³⁷Un hee deed, waut enne Uagen Gottes bees wia, no aulem, waut siene Vodasch jedonen hauden.