Read De Bibel JHF 2. Kjennichs 25 Bible Online

2. Kjennichs 25 - De Bibel JHF bible

2. Kjennichs 25

¹Un daut passieed aum näajenden Joa siene Rejierunk, em 10-den Moonat, aum 10-den em Moonat, doa kaum Nebukadnezar, de Kjennich von Babel, hee un sien gaunzet Häa jäajen Jerusalem un beloagaden daut; un see buden Beloagrungswoakjen om ar häa.

²Un de Staut kaum en Beloagrunk bat aum 11-ten Joa vom Kjennich Zedekia.

³Aum näajenden däm vieeden Moonat, doa neem de Hunga enne Staut äwahaunt; un daut wia kjeen Broot mea doa fa daut Laundesvolkj.

⁴Doa bruak maun enne Staut en, un aule Kjrichsmana randen de Nacht oppem Wajch derch daut Dooa, daut tweschen de beid Miaren biem Kjennichsgoaden lach, oba de Chaldäa wieren runtom de Staut häa; un maun jinkj däm Wajch no de Läacht.

⁵Oba daut Chaldäa Häa juach däm Kjennich hinjaraun, un see errieekjten am enne Läacht von Jericho; un sien gaunzet Häa vestreid sikj von am wajch.

⁶Un see jreepen däm Kjennich un brochten am nom Kjennich von Babel, nopp no Ribla; un maun jeef daut Uadeel äwa am.

⁷Un maun schlacht Zedekia siene Säns ver siene Uagen; un maun veblend Zedekia siene Uagen, un bung am met koppane Faslen un brocht am no Babel.

⁸Un aum feften Moonat, däm säwenden em Moonat, daut wia daut 1näajende Joa vom Kjennich Nebukadnezar, däm Kjennich von Babel, kaum Nebusaradan, de Bowaschta vonne Kjennichswajchta, de Kjnajcht vom Kjennich von Babel, no Jerusalem.

⁹Un hee vebrend daut Hus Gottes un daut Kjennichshus; un aule Hiesa en Jerusalem un jiedret groote Hus vebrend hee met Fia.

¹⁰Un daut gaunze Häa de Chaldäa, daut biem Bowaschten de Kjennichswajchta wia, reet runtom de Mia von Jerusalem dol.

¹¹Un de Äwaje vom Volkj, dee enne Staut äwajebläwen wieren, un de Äwajeranden, dee nom Kjennich von Babel äwajerant wieren, un de Äwaje de Menj fieed Nebusaradan, de Bowaschta de Kjennichswajchta, wajch.

¹²Oba de jerinje vom Launt leet de Bowaschta de Kjennichswajchta trigj aus Wiengoadna un Akaoabeida.

¹³Un de Koppane Stendasch, dee aum Hus Gottes wieren, un de Jestalen un daut koppane Mäa, dee em Hus Gottes wieren, veschluagen de Chaldäa un fieeden daut Koppa doavon no Babel.

¹⁴Un de Tap un de Schefflen un de Lichtmassasch un de Kommen, un aulet koppane Jereetschoft, met waut maun deent, nämen see wajch.

¹⁵Uk de Rieekjapaunen un de sprets Schiewen, waut von Golt wia, daut Golt, un waut von Selwa wia, daut Selwa, neem de Bowaschta de Kjennichswajchta wajch.

¹⁶De twee Stendasch, daut eene Mäa un de Jestalen, dee Salomo fa daut Hus Gottes jemoakt haud; daut Koppa von aul disem Jereetschoft wia nich too wäaje.

¹⁷18 Ellen huach wia een Stenda, un daut wia doabowen een Knoppen von Koppa, 3 Ellen huach, un een Natwoakj un Grenautapel wieren runtom däm Knoppe; aules von Koppa, un krakjt soo wia de aundre Stenda met däm Natwoakj.

¹⁸Un de Bowaschta Kjennichswajchta neem Seraja, däm bowaschten Priesta, un Zefanja, däm tweeden Priesta, un de dree Schwalen Wajchta;

¹⁹un ut de Staut neem hee eenen Wajchta, dee äwa de Kjrichsmana jestalt wia, un fief Mana von dän, dee daut Aunjesecht vom Kjennich sagen, dee enne Staut jefungen worden, un däm Schriewa vom Häabowaschten dee daut Laundesvolkj toom Häa utsocht, un 60 Maun vom Laundesvolkj, dee enne Staut jefungen worden.

²⁰Un Nebusaradan, de Bowaschta de Kjennichswajchta, naum dee un brocht dee nom Kjennich von Babel no Ribla.

²¹Un de Kjennich von Babel brocht dee om en Ribla em Launt Hamat. — Un soo wort Juda ut däm Launt wajchjefieet.

²²Un äwa daut Volkj, daut em Launt Juda äwajebläwen wia, daut Nebukadnezar, de Kjennich von Babel, äwajeloten haud, äwa an stald hee Gedalja, Ahikam sien Sän, vom Schafan sienem Sän.

²³Un aus aule Häabowaschte, an un äare Mana hieeden, daut de Kjennich von Babel Gedalja enjesat haud, doa kaumen see no Gedalja no Mizpa; nämlich Ismael, Netanja sienem Sän, un Jochanan, Kareach sien Sän, un Seraja, Tanchumet sien Sän, de Netofatita, un Jaasanja, Maakatita sien Sän, met äare Mana.

²⁴Un Gedalja schwua an un äare Mana un säd to an: Forcht junt nich ver de Kjnajchts de Chaldäa; blieft em Launt un deent däm Kjennich von Babel, soo woat et junt goot gonen.

²⁵Oba daut passieed aum säwenden Moonat, doa kaum Ismael, Netanja sien Sän, vom Sän Elischama, vom Kjennichsjeschlajcht, un 10 Mana met am; un see schluagen Gedalja, un hee storf, soo aus de Juden un de Chaldäa, dee en Mizpa bie am wieren.

²⁶Doa muak sikj aulet Volkj, vom Kjlansten bat toom Jratsten, met däm Häabowaschten opp, un see kaumen no Ägipten; dan see enjsten sikj fa de Chaldäa.

²⁷Un daut passieed aum 37-ten Joa nom wajchfieren von Jojakim, däm Kjennich von Juda aum 12-ten Moonat, däm 27-ten em Moonat, doa hoof Ewil-Merodak, de Kjennich von Babel, aun däm Joa, aus hee Kjennich wort, daut Haupt Jojakim, vom Kjennich von Juda, ut däm Jefenkjnis.

²⁸Un hee räd frintlich met am un sad sienem Stool äwa däm Stool de Kjennichs, dee bie am en Babel wieren;

²⁹un hee leet am de Jefenkjnis Kjleeda auflajen; un hee aut emma ver am, sien Läwen lank.

³⁰Un sien Unjahault, een bestendja Unjahault, wort am, sooväl hee aum Dach brukt, vom Kjennich jejäft, aul siene Läwensdoag.