Read De Bibel JHF 2. Kjennichs 3 Bible Online

2. Kjennichs 3 - De Bibel JHF bible

2. Kjennichs 3

¹Un Joram, Ahab sien Sän, wort Kjennich äwa Israel en Samaria, em 18-den Joa von Josafat, däm Kjennich von Juda; un hee rejieed 12 Joa.

²Un hee deed, waut enne Uagen Gottes bees wia, blooss nich aus sien Voda un siene Mutta; un hee deed de Baal Stendasch wajch, dee sien Voda jemoakt haud.

³Doch bleew hee aun de Sinden Jerobeam henjen, Nebat sienem Sän, met waut hee Israel too sindjen veleit haud; hee leet nich doavon.

⁴Un Mesa, de Kjennich von Moab, haud väl Vee, un hee leewad däm Kjennich von Israel 100 000 fate Schop un 100 000 Bakj met Woll.

⁵Un daut passieed, aus Ahab storf, doa foll de Kjennich von Moab vom Kjennich von Israel auf.

⁶Un de Kjennich Joram jinkj aun dee selje Tiet von Samaria ut un mostad gaunz Israel.

⁷Un hee jinkj han un schekjt no Josafat, däm Kjennich von Juda, un leet am sajen: De Kjennich von Moab es von mie aufjefollen; west du met mie jäajen Moab em Kaumf gonen? Un hee säd: Ekj well noppgonen; ekj well aus du sennen, mien Volkj aus dien Volkj, miene Pieed aus diene Pieed.

⁸Un hee säd: Opp waut fa eenen Wajch well wie noppgonen? Un hee säd: Oppem Wajch de Wieste Edom.

⁹Un soo jinjen de Kjennich von Israel un de Kjennich von Juda un de Kjennich von Edom han; un see muaken eenen Omwajch von 7 Reisedoag, un daut wia kjeen Wota fa daut Häa un fa daut Vee, daut an foljd.

¹⁰Doa säd de Kjennich von Israel: Wee, daut de Har dise 3 Kjennichs jeroopt haft, om an enne Haunt von Moab to jäwen!

¹¹Un Josafat säd: Es hia kjeen Profeet Gottes, daut wie däm Harn derch am befroagen kjennen? Un eena von de Kjnajchts vom Kjennich von Israel auntwuad un säd: Hia es Elisa, Safat sien Sän, dee oppe Henj von Elia Wota goot.

¹²Un Josafat säd: Daut Wuat Gottes es bie am. Un de Kjennich von Israel un Josafat un de Kjennich von Edom jinjen no am rauf.

¹³Un Elisa säd toom Kjennich von Israel: Waut ha wie metenaunda too schaufen? Go no de Profeeten von dienem Voda un no de Profeeten diene Mutta! Un de Kjennich von Israel säd to am: Ne, dan de Har haft dise 3 Kjennichs jeroopt, om an en de Henj Moab to jäwen.

¹⁴Doa säd Elisa: Soo woa Gott de Häaschoa läft, ver däm sien Aunjesecht ekj sto, wan ekj nich opp Josafat, däm Kjennich von Juda, aunseenen wudd, soo wudd ekj die nich aunkjikjen, noch die aunseene!

¹⁵Un nu holt mie eenen Seidespäla. Un daut passieed, aus de Seidespäla späld, doa kaum de Haunt Gottes äwa am.

¹⁶Un hee säd: Soo sajcht de Har: Moakt en dise Läacht Kul aun Kul.

¹⁷Dan soo sajcht de Har: Jie woaren kjeenen Wint seenen un kjeenen Räajen seenen, un doch woat dise Läacht sikj met Wota fellen, soo daut jie drinkjen woaren, jie un june Häaden un jun Vee.

¹⁸Un daut es noch jerinj enne Uagen Gottes; hee woat uk Moab en june Henj jäwen.

¹⁹Un jie woaren aule fauste Städa un aule baste Städa schlonen, un woaren aule goode Beem omschmieten un aule Wotakjwalen tostoppe un aule goode Aka met Steena vedoawen.

²⁰Un Zemorjes passieed daut, too Tiet doa maun daut Speisopfa opfat, kjikj, doa kaum Wota oppem Wajch von Edom häa, un daut Launt feld sikj met Wota.

²¹Un aus aule Moabita hieeden, daut de Kjennichs utjegonen wieren, om jäajen an too strieden, doa worden see toopjeroopen, een jiedra, dee daut Schwieet droagen kunn un doaräwa; un see jinjen aune Jrens.

²²Un aus see sikj Zemorjes oppmuake un de Sonn äwa daut Wota oppjinkj, doa sagen de Moabita daut Wota jäajenäwa root aus Bloot.

²³Un see säden: Daut es Bloot! De Kjennichs ha sikj jewess oppjeräwen un ha eenaunda jeschloagen; un toom Raup, Moab!

²⁴Oba aus see no Israels Loaga kaumen, doa muaken de Israeliten sikj opp un schluagen de Moabita, daut see ver an randen. Un see kaumen en daut Launt Moab un schluagen an.

²⁵Un see reeten de Städa dol, un opp aule goode Aka schmeeten see een jiedra sienen Steen un felden an doamet aun, un see stoppte aule Wotakjwalen too un schmeeten aule goode Beem om..., bat see blooss aun Kir-Hareset de Steena äwaleeten. Un de Steena Schliesa ommzinjelden un beschooten de Staut.

²⁶Un aus de Kjennich von Moab sach, daut am de Kaumf too stoakj wia, naum hee 700 Maun met sikj, dee daut Schwieet druagen, om jäajen däm Kjennich von Edom han derchtobräakjen; oba see kunnen daut nich.

²⁷Doa naum hee sienen ieeschtjebuarnen Sän, dee aun siene Städ Kjennich woaren sull, un opfad am aus Brauntopfa oppe Mia. Un daut kaum een groota Oaja äwa Israel; un see jinjen von am auf un jinjen en äa Launt trigj.