Read De Bibel JHF 2. Kjennichs 8 Bible Online

2. Kjennichs 8 - De Bibel JHF bible

2. Kjennichs 8

¹Un Elisa haud to de Fru, dee äa Sän hee läwendich jemoakt haud, jerät un jesajcht: Moak die opp un go han, du un dien Hus, un bliew, woa du bliewen kaust; dan de Har woat eene Hungaschnoot brinjen, un dee kjemt uk en dit Launt, säwen Joa lank.

²Un de Fru muak sikj opp un deed nom Wuat vom Maun Gottes; see jinkj han, see un äa Hus, un bleew en däm Launt de Filista säwen Joa.

³Un aum Enj von säwen Joa passieed daut, doa kaum de Fru ut däm Launt de Filista trigj; un see jinkj ut, om däm Kjennich auntoroopen wäajen äa Hus un wäajen äa Flekj.

⁴Oba de Kjennich räd krakjt too Gehasi, däm Kjnajcht vom Maun Gottes, un säd: Vetal mie doch aule groote Doten, dee Elisa jedonen haft!

⁵Un daut passieed, aus hee däm Kjennich daut vetald, daut hee däm Dooden läwendich jemoakt haud, kjikj, doa roopt de Fru, dee äa Sän hee läwendich jemoakt haud, däm Kjennich aun wäajen äarem Hus un wäajen äare Felda. Doa säd Gehasi: Mien Har Kjennich! Dit es de Fru, un dit es äa Sän, däm Elisa läwendich jemoakt haft.

⁶Un de Kjennich fruach de Fru, un see vetalt am; un de Kjennich jeef ar eenen Hoffbeaumten met un säd: Veschauf ar aules trigj, waut ar jehieet, soo aus daut gaunze Ennkomen de Felda von däm Dach aun, doa see daut Launt veloten haud, bat nu.

⁷Un Elisa kaum no Damaskus. Un Ben-Hadad, de Kjennich von Sierien, wia krank. Un daut wort am berecht un jesajcht: De Maun Gottes es hiahäa jekomen.

⁸Doa säd de Kjennich too Hasael: Nemm een Jeschenkj met die un go däm Maun Gottes entjäajen, un befroag däm Harn derch am un saj: Woa ekj von dise Krankheit jesunt?

⁹Un Hasael jinkj am entjäajen un naum een Jeschenkj met sikj: Aulalei Goots von Damaskus, eene Laust von 40 Kameelen; un hee kaum un jinkj no am un säd: Dien Sän Ben-Hadad, de Kjennich von Sierien, haft mie no die jeschekjt un leet die sajen: Woa ekj von dise Krankheit jesunt?

¹⁰Un Elisa säd to am: Go han, saj to am: Du woascht jewess jesunt! Oba de Har haft mie jewast, daut hee jewess stoawen woat.

¹¹Un hee [Elisa] recht sien Aunjesecht opp am un kjikjt am stiew aun, bat hee sikj schämd; un de Maun Gottes hield.

¹²Un Hasael säd: Wuarom hielt mien Har? Un hee säd: Wiels ekj weet, waut du de Kjinja Israel Ieblet doonen woascht; äare fauste Städa woascht du met Fia vebrennen, un äare Jinjlinje met daut Schwieet ombrinjen, un äare Kjinja woascht du veschmatre un äare Schwangre opschnieden.

¹³Doa säd Hasael: Waut es dien Kjnajcht, een Hund, daut hee dise groote Sach doonen saul? Un Elisa säd: De Har haft mie die seenen loten aus Kjennich äwa Sierien.

¹⁴Un hee jinkj von Elisa wajch un kaum no sienem Harn; un disa säd to am: Waut haft Elisa die jesajcht? Un hee säd: Hee haft mie jesajcht, du woascht jewess jesunt.

¹⁵Un aum näakjsten Dach passieed daut, doa naum hee de Dakj un duckt de em Wota un spreed de äwa sien Aunjesecht, soo daut hee storf. Un Hasael wort aun siene Städ Kjennich.

¹⁶Un aum feften Joa von Joram, Ahab sienem Sän, däm Kjennich von Israel, aus Josafat Kjennich äwa Juda wia, wort Joram Kjennich, Josafat sien Sän, vom Kjennich von Juda.

¹⁷32 Joa wia hee oolt, aus hee Kjennich wort, un hee rejieed acht Joa en Jerusalem.

¹⁸Un hee jinkj oppe Wäaj de Kjennichs von Israel, aus daut Hus Ahab deed, dan hee haud Ahab siene Dochta to Fru; un hee deed, waut enne Uagen Gottes bees wia.

¹⁹Oba de Har wull Juda nich vedoawen om sienem Kjnajcht David sienem wellen, soo aus hee am jesajcht haud, daut hee am een Licht jäwen wull fa siene Säns — aule Doag.

²⁰En siene Doag follen de Edomieta von Juda auf un saden eenen Kjennich äwa sikj.

²¹Doa jinkj Joram äwa no Zair, un aule Woages met am. Un daut passieed, aus hee sikj denacht oppmuak, doa schluach hee de Edomieta, dee am un de Bowaschte vonne Woages omrinjt hauden; un daut Volkj rand no siene Zelten.

²²Soo follen de Edomieta von Juda auf bat opp disem Dach. Uk Libna foll to dee selje Tiet auf.

²³Un daut Äwaje de Jeschicht von Joram un aules, waut hee jedonen haft, es daut nich em Buak de Chronik de Kjennichs von Juda jeschräwen?

²⁴Un Joram läd sikj to siene Vodasch, un hee wort bie siene Vodasch en David siene Staut begroft. Un Ahasja, sien Sän, wort Kjennich aun siene Städ.

²⁵Aum 12-ten Joa von Joram, Ahab sienem Sän, däm Kjennich von Israel, wort Ahasja Kjennich, Joram sien Sän, däm Kjennich von Juda.

²⁶22 Joa wia Ahasja oolt, aus hee Kjennich wort, un hee rejieed een Joa en Jerusalem; un de Nomen von siene Mutta wia Atalja, Omri siene Dochta, vom Kjennich von Israel.

²⁷Un hee jinkj oppe Wäaj vom Hus Ahab un deed, waut enne Uagen Gottes bees wia, aus Ahab sien Hus; dan hee wia een Schwoaga em Hus Ahab.

²⁸Un hee jinkj met Joram, Ahab sienem Sän, em Kaumf jäajen Hasael, däm Kjennich von Sierien, no Ramot-Gilead. Un de Siera vewunden Joram.

²⁹Doa jinkj de Kjennich Joram trigj, om sikj en Jesreel von de Wunden heelen to loten, dee am de Siera en Rama jeschloagen hauden, aus hee jäajen Hasael, däm Kjennich von Sierien, street. Un Ahasja, Joram sien Sän, de Kjennich von Juda, jinkj rauf, om Joram, Ahab sienem Sän, en Jesreel too besieekjen, wiels hee krank wia.