Read De Bibel JHF 1. Chronik 10 Bible Online

1. Chronik 10 - De Bibel JHF bible

1. Chronik 10

¹Un de Filista streeden jäajen Israel; un de Mana von Israel randen ver de Filista, un schluagen väle oppe Boaj Gilboa.

²Un de Filista stunden Saul un siene Säns hoat no; un de Filista schluagen Jonatan un Abinadab un Malkischua, däm Saul siene Säns.

³Un de Kaumf wort hoat jäajen Saul, un daut kaumen dee met Boages schoote aun am; un hee wort vewund.

⁴Doa säd Saul too sienem Jewäadroaga: Trakj dien Schwieet un derchboa mie doamet, daut nich dise Onbeschnädne komen un mie meshaundlen! Oba sien Jewäadroaga wull nich, dan hee haud sea Angst. Doa naum Saul daut Schwieet un schmeet sikj doa nopp.

⁵Un aus sien Jewäadroaga sach, daut Saul doot wia, doa schmeet uk hee sikj opp sien Schwieet un storf.

⁶Soo storwen Saul un siene 3 Säns; un sien gaunzet Hus storf metenaunda.

⁷Un aus aule Mana von Israel, dee enne Läacht wonden, sagen, daut see jerant un daut Saul un siene Säns doot wieren, doa veleeten see äare Städa un randen; un de Filista kaumen un wonden doa.

⁸Un aum aundren Dach passieed daut, doa kaumen de Filista, om de Jeschloagne uttotrakjen; un see fungen Saul un siene Säns oppe Boaj Gilboa ligjen.

⁹Un see trocken am (an) ut un naumen sienen Kopp un siene Jewäaren; un see schekjten an en daut Filistalaunt omhäa, om de frooe Bootschoft äare Jetta un däm Volkj too vekjindjen.

¹⁰Un see läden siene Jewäaren en daut Hus von äarem Gott, un sien Schädel deeden see aun Dagon sienem Hus.

¹¹Oba aus gaunz Jabes-Gilead aules hieed, waut de Filista met Saul jedonen hauden,

¹²doa muaken sikj de Browe Mana opp un naumen däm Doodeskjarpa von Saul un siene Säns un brochten dee no Jabes; un see begrowden äare Knoakes unja de Terebinten en Jabes un fausten säwen Doag.

¹³Un soo storf Saul wäajen siene Truloosichkjeit, dee hee jäajen däm Harn begonen haud, un uk wiels hee de Doodesbeschwiera oppsocht, om an too befroagen;

¹⁴oba däm Harn befruach hee nich. Doarom muak hee am doot un dreid sien Kjennichtum David, däm Isai sienem Sän, too.