Read De Bibel JHF 1. Chronik 11 Bible Online

1. Chronik 11 - De Bibel JHF bible

1. Chronik 11

¹Un gaunz Israel vesaumeld sikj no David no Hebron, un see säden: Kjikj, wie sent diene Knoakes un dien Fleesch.

²Aul verhäa, aus Saul Kjennich wia, best du daut jewast, dee Israel ut- un ennfieed; un de Har, dien Gott, haft to die jesajcht: Du saust mien Volkj Israel weiden, un du saust Ferscht äwa mien Volkj Israel sennen.

³Un aule Eltestasch Israels kaumen nom Kjennich no Hebron, un David muak eenen Bunt met an en Hebron, ver däm Harn; un see saulwden David toom Kjennich äwa Israel, nom Wuat Gottes derch Samuel.

⁴Un David un gaunz Israel jinjen no Jerusalem, daut es Jebus; un doa wieren de Jebusita, de Laundesbewona.

⁵Un de Bewona von Jebus säden to David: Du woascht hia nich nenkomen! Oba David naum de Burjch Zion en, daut es David siene Staut.

⁶Un David säd: Wäa de Jebusita aus Ieeschta schleit, saul Haupt un Bowaschta woaren. Doa stieej Joab, Zeruja sien Sän, aus Ieeschta nopp, un hee wort toom Haupt.

⁷Un David wond enne Burjch; doarom nand maun ar David siene Staut.

⁸Un hee bud de Staut, von Millo runtom. Un Joab bud daut Äwaje de Staut opp.

⁹Un David wort emma jrata, un Gott de Häaschoa wia met am.

¹⁰Un dit sent de Heipta, de Helden, dee David haud, dee am met gaunz Israel en sienem Kjennichtum biestunden, om am toom Kjennich too moaken, nom Wuat Gottes äwa Israel.

¹¹Un dit es de Zol de Helden, dee David haud: Jaschobam, Hakmoni sien Sän, daut Haupt de Aunfiera; hee hoof sien Spies jäajen 300, dee hee opp eenmol schluach.

¹²Un no am Eleasar, Dodo sien Sän, de Achochita; hee wia unja de dree Helden.

¹³Hee wia met David en Pas-Dammim, aus de Filista doa toom Kaumf vesaumelt wieren. Un doa wia een Akastekj voll Joascht; un daut Volkj rand ver de Filista.

¹⁴Doa stalden see sikj medden oppem Stekj un raden daut un schluagen de Filista; un de Har jeef eene groote Radinj.

¹⁵Un 3 von dee 30 Heipta jinjen no David nopp, nom Steen, en de Heel Adullam; un daut Häa de Filista loagad enne Läacht Refaim.

¹⁶Oba David wia donn oppe Boajchfastinj, un een Filista Häa wia donn en Betlehem.

¹⁷Un David haud een Wensch un säd: Wäa woat mie met Wota ut däm Borm von Betlehem drenkjen, dee aum Dooa es?

¹⁸Doa bruaken de dree derch daut Loaga de Filista un schapte Wota ut däm Borm von Betlehem, dee aum Dooa es, un brochten daut no David. Oba David wull daut nich drinkjen un goot daut Drinkjopfa däm Harn ut;

¹⁹un hee säd: Daut lot mien Gott von mie wiet sennen, daut ekj soowaut doo! Sull ekj daut Bloot von dise Mana drinkjen, dee en Läwensjefoa hanjegonen sent? Dan met äare Läwensjefoa ha see daut jebrocht. Un hee wull daut nich drinkjen. Daut deeden de dree Helden.

²⁰Un Abisai, Joab sien Brooda, disa wia een Haupt von dise 3. Un hee trock sien Spies jäajen 300, dee hee schluach; un hee haud eenen Nomen unja de dree.

²¹Von dee 30 wia hee beriemt, met dee Twee, soo daut hee äa Bowaschta wort; oba aune ieeschte 3 kaum hee nich.

²²Benaja, Jojada sien Sän, de Sän von eenem browen Maun, groot aun Doten von Kabzeel; dee schluach 2 Leiws (Helden von Ariel) von Moab. Un hee stieech rauf un schluach däm Leiw enne Kul aun eenem Schneedach.

²³Un hee wia daut, dee däm ägiptischen Maun schluach, eenen Maun von fief Ellen lank. Un de Ägipta haud eenen Spies enne Haunt aus eenen Wäwboom; oba hee jinkj no am met eenem Stock, un reet däm Ägipta dän Spies ut de Haunt un muak am met sienem ieejnen Spies doot.

²⁴Daut deed Benaja, Jojada sien Sän; un hee haud eenen Nomen unja dee 3 Helden.

²⁵Unja de 30, kjikj, wia hee beriemt, oba aun de ieeschte 3 kaum hee nich. Un David sad am en sienem jeheemen Rot.

²⁶Un de Häa Helden wieren: Asael, Joab sien Brooda; Elchanan, Dodo sien Sän, von Betlehem;

²⁷Schammot, de Harorita; Helez, de Pelonita;

²⁸Ira, Ikkesch sien Sän, de Tekoita; Abiesa, de Anatotita;

²⁹Sibbekai, de Huschatita; Ilai, de Achochita;

³⁰Maharai, de Netofatita; Heled, Baana sien Sän, de Netofatita;

³¹Ittai, Ribai sien Sän, von Gibea de Kjinja Benjamin; Benaja, de Pirhatonita;

³²Hurai, von de Läacht Gaasch; Abiel, de Arbatita;

³³Asmawet, de Bacharumita; Eljachba, de Schaalbonita;

³⁴Bne-Haschem, de Gisonita; Jonatan, Schaga sien Sän, de Hararita;

³⁵Achiam, Sakar sien Sän, de Hararita; Elifal, Ur sien Sän;

³⁶Hefer, de Mekeratita; Achija, de Pelonita;

³⁷Hezro, de Karmelita; Naarai, Esbai sien Sän;

³⁸Joel, Nathan sien Brooda; Mibchar, Hagri sien Sän;

³⁹Zelek, de Amonita; Nacharai, de Beerotita, Joab sien Jewäadroaga, vom Sän Zeruja;

⁴⁰Ira, de Jitrita; Gareb, de Jitrita;

⁴¹Uria, de Hetita; Sabad, Achlai sien Sän;

⁴²Adina, Schisa sien Sän, de Rubenita, een Haupt de Rubenita, un 30 bie am;

⁴³Hanan, Maaka sien Sän; un Josafat, de Mithnita;

⁴⁴Usija, de Aschterotita; Schama un Jeghiel, Hotham siene Säns, vom Aroerita;

⁴⁵Jediael, Schimri sien Sän, un Jocha, sien Brooda, de Thizita;

⁴⁶Eliel, de Machawim; un Jeribai un Joschawja, Elnaam siene Säns; un Jitma, de Moabita;

⁴⁷Eliel un Obed, un Jaasiel, de Mezobaita.