Read De Bibel JHF 1. Chronik 13 Bible Online

1. Chronik 13 - De Bibel JHF bible

1. Chronik 13

¹Un David muak sikj reed met de Bowaschte äwa 1000 un äwa 100, met aule Ferschten.

²Un David räd to de gaunze Jemeent Israels: Wan junt daut jefällt, un wan daut vom Harn, onsem Gott, es, soo lot ons no onse äwaje Breeda em gaunzen Launt Israel schekjen, un met an no de Priesta un no de Leviten enne Städa, daut see sikj no ons vesaumlen.

³Un wie wellen de Lod Gottes no ons holen; dan wie ha ar en Saul siene Doag nich befroagt.

⁴Un de gaunze Jemeent säd, daut maun soo doonen sull; dan de Sach wia rajcht enne Uagen vom gaunzen Volkj.

⁵Un David vesaumeld gaunz Israel, vom Fluss Sichor en Ägipten bat no Hamat han, om de Lod Gottes von Kirjat-Jearim to holen.

⁶Un David un gaunz Israel jinjen nopp no Baala, no Kirjat-Jearim, daut Juda jehieet, om von doa de Lod Gottes, Jahwe, to holen, dee tweschen de Cherubim troont, däm sien Nomen doa aunjeroopt woat.

⁷Un see fieeden de Lod opp eenem nieen Woagen ut Abinadab sienem Hus wajch; un Ussa un Achjo fuaren däm Woagen.

⁸Un David un gaunz Israel spälden ver Gott met aula Krauft; met Jesank un met Hoapen un Zitta un Tamburin un Zimmbeln un Trompeeten.

⁹Un aus see no de Draschdäl Kidon kaumen, doa strakjt Ussa siene Haunt ut, om de Lod too hoolen; dan de Rinda wieren utjejleist.

¹⁰Doa flaumd de Oaja Gottes jäajen Ussa opp, un hee schluach am, doarom daut hee siene Haunt no de Lod utjestrakjt haud; un hee storf doa selfst ver Gott.

¹¹Un David wort truarich, wiels de Har eene Reet aun Ussa jemoakt haud; un hee nand däm Uat Perez-Ussa, bat opp disem Dach.

¹²Un David enjst sikj ver Gott aun janem Dach un säd: Woo saul ekj de Lod Gottes no mie brinjen?

¹³Un David leet de Lod nich no sikj brinjen, en David siene Staut; un hee leet dee en daut Hus Obed-Edom brinjen, vom Gatita.

¹⁴Un de Lod Gottes bleef em Hus Obed-Edom, 3 Moonaten lank. Un de Har säajend daut Hus Obed-Edom un aules, waut sient wia.