Read De Bibel JHF 1. Chronik 14 Bible Online

1. Chronik 14 - De Bibel JHF bible

1. Chronik 14

¹Un Hiram, de Kjennich von Tierus, schekjt Booten no David, un Zeedaholt un Miaoabeida un Holtoabeida, doamet see am een Hus buden.

²Un David moakjt, daut de Har am aus Kjennich äwa Israel bestädicht haud, dan sien Kjennichrikj wia huach erhowen om sienem Volkj Israels wellen.

³Un David naum noch Frues en Jerusalem, un David jebua noch Säns un Dajchta.

⁴Un dit sent dee äare Nomes, dee am en Jerusalem jebuaren worden: Schammua un Schobab un Nathan un Salomo,

⁵un Jibchar un Elischua un Elpelet,

⁶un Nogah un Nefeg un Jafija,

⁷un Elischama un Beeljada un Elifelet.

⁸Un aus de Filista daut hieeden, daut David aus Kjennich äwa gaunz Israel jesaulft wia, doa jinjen aule Filista nopp, om David too sieekjen. Un David hieed daut un jinkj an entjäajen.

⁹Un de Filista kaumen un breeden sikj enne Läacht Refaim ut.

¹⁰Un David befruach Gott un säd: Saul ekj jäajen de Filista gonen, un woascht du an en miene Haunt jäwen? Un de Har säd to am: Go nopp, un ekj woa an en diene Haunt jäwen.

¹¹Doa jinjen see nopp no Baal-Perazim, un David schluach an doa selfst; un David säd: Gott haft miene Fiend derch miene Haud derch jebroaken, aus een Wotabruch. Doahäa jeef maun janem Uat däm Nomen Baal-Perazim.

¹²Un see leeten doa äare Jetta; un David jeef Befäl, un see worden met Fia vebrent.

¹³Un de Filista kaumen wada un breeden sikj enne Läacht ut.

¹⁴Un David fruach wada Gott; un Gott säd to am: Du saust nich no an nopp gonen; drei die von an auf, daut du jäajenäwa de Mulbäabeem aun an kjeemst.

¹⁵Un sooboolt du daut Ruzhen enne Spetzen de Mulbäabeem hieren woascht, dan saust du toom Kaumf utgonen; dan Gott es ver die utjegonen, om daut Häaloaga de Filista too schlonen.

¹⁶Un David deed, soo aus Gott am befoolen haud; un see schluagen daut Häaloaga de Filista von Gibeon bat no Geser.

¹⁷Un David sien Nomen jinkj en aule Lenda ut, un de Har läd de Angst fa am opp aule Nazionen.