Read De Bibel JHF 1. Chronik 15 Bible Online

1. Chronik 15 - De Bibel JHF bible

1. Chronik 15

¹Un hee muak sikj Hiesa en David siene Staut, un muak eenen Uat reed fa de Lod Gottes un schluach een Zelt fa ar opp.

²Donn säd David: De Lod Gottes saul kjeena droagen aus blooss de Leviten; dan an haft Gott erwält, om de Lod Gottes too droagen un am eewichlich to deenen.

³Un David vesaumeld gaunz Israel no Jerusalem, om de Lod Gottes aun äarem Uat to brinjen, däm hee fa ar reedjemoakt haud.

⁴Un David vesaumeld de Säns von Aaron un de Leviten.

⁵Von Kehat siene Säns: Uriel, däm Bowaschten, un siene Breeda, 120;

⁶von Merari siene Säns: Asaja, dän Bowaschten, un siene Breeda, 220;

⁷von Gersom siene Säns: Joel, däm Bowaschten, un siene Breeda, 130;

⁸von Elizafan siene Säns: Schemaja, däm Bowaschten, un siene Breeda, 200;

⁹von Hebron siene Säns: Eliel, dän Bowaschten, un siene Breeda, 80;

¹⁰von Ussiel siene Säns: Amminadab, däm Bowaschten, un siene Breeda, 112.

¹¹Un David roopt Zadok un Abjatar, de Priesta, un de Leviten Uriel, Asaja, Joel, Schemaja, Eliel un Amminadab,

¹²un hee säd to an: Jie sent de Heipta de Vodahiesa de Leviten; heilicht junt, jie un june Breeda, un brinjt de Lod Gottes, vom Gott Israels, nopp aun äarem Uat, däm ekj fa ar reedjemoakt ha.

¹³Dan wiels jie daut jantmol nich jedonen ha, soo muak de Har, ons Gott, eenen Bruch unja ons, wiels wie am nich no de Väaschreft sochten.

¹⁴Doa heilijde de Priesta un de Leviten sikj, om de Lod Gottes, vom Gott Israels, nopptobrinjen.

¹⁵Un de Säns de Leviten druagen de Lod Gottes opp äare Schulren, endäm see de Stangen opp sikj läden, soo aus Moses befoolen haud, nom Wuat Gottes.

¹⁶Un David befool däm Bowaschten de Leviten, äare Breeda; de Senja, met Seidenspell, Hoapen un Fleeten un Zimmbeln too bestalen, doamet see lud spälen, endäm see de Stemm met Freid erhäwen.

¹⁷Un de Leviten bestalden Heman, Joel sienen Sän, un von siene Breeda Asaf, Berekja sienen Sän; un von de Säns Merari, äare Breeda, Ethan, Kuschaja sienen Sän;

¹⁸un met an äare Breeda von de tweede Ordninj: Sekarja, Ben-Jaasiel, Schemiramot, Jechiel, Unni, Eliab, Benaja, Maaseja, Mattitja, Elifeleh, Mikneja, Obed-Edom un Jeghiel, de Däarenwajchta;

¹⁹un zwoa de Senja Heman, Asaf un Ethan, met koppane Zimblen, om lud too spälen;

²⁰un Sekarja, Asiel, Schemiramot, Jechiel, Unni, Eliab, Maaseja un Benaja met Hoapen opp Alamot;

²¹un Mattitja, Elifeleh, Mikneja, Obed-Edom, Jeghiel un Asasja met Hoape opp Scheminit: Om däm Jesank too leiden.

²²Un Kenanja wia de Aunfiera de Leviten em Jesank; hee belieed an biem sinjen, dan hee vestund daut.

²³Un Berekja un Elkana wieren Däarenwajchta bie de Lod.

²⁴Un Schebanja, Josafat, Nethaneel, Amasai, Sekarja, Benaja un Elieser, de Priesta, blosde met de Trompeeten ver de Lod Gottes häa. Un Obed-Edom un Jechija wieren Däarenwajchta bie de Lod.

²⁵Un soo jinjen David un de Eltestasch von Israel un de Bowaschte äwa 1000 han, om de Bundeslod Gottes ut däm Hus Obed-Edom met Freid nopp to holen.

²⁶Un daut wia, doa Gott de Leviten holp, dee de Bundeslod Gottes druagen, soo opfaden see säwen junge Bolles un säwen Bakj.

²⁷Un David wia met eenem Bowakjleet von fiene Boomwoll aunjetrocken, aus de Leviten, dee de Lod druagen, un de Senja un Kenanja, de Aunfiera de Senja; un David druach een Leiwent Efod.

²⁸Un gaunz Israel brocht de Bundeslod Gottes nopp met groote Freid un met Poosaunen, Trompeeten un met Zimmblen, lud spälend met Hoapen un Fleeten.

²⁹Un daut passieed, aus de Bundeslod Gottes en David siene Staut kaum, doa kjikjt Michal, de Dochta von Saul, derch daut Fensta; un see sach däm Kjennich David hupsen un spälen, un see veacht am en äarem Hoaten.