Read De Bibel JHF 1. Chronik 2 Bible Online

1. Chronik 2 - De Bibel JHF bible

1. Chronik 2

¹Dit sent Israel siene Säns: Ruben, Simeon, Levi un Juda, Isachar un Sebulon,

²Dan, Josef un Benjamin, Naftali, Gad un Aser.

³Juda siene Säns: Gher un Onan un Schela; dise 3 worden am jebuaren von de Dochta Schuas, de Kanaanitarin. Un Gher, Juda sien Ieeschtjebuarna, wia enne Uagen Gottes bees, un hee muak am doot.

⁴Un Tamar, siene Schwiadochta, jebua am Perez un Serach. Aule Juda siene Säns wieren 5.

⁵Perez siene Säns wieren: Hezron un Hamul.

⁶Un Serach siene Säns: Simri un Ethan un Heman un Kalkol un Dara; daut wieren 5.

⁷Un Karmis siene Säns: Achar, dee Israel em Onjlekj brocht, wiels hee Ontru aum Vebaunten bejinkj.

⁸Un Ethan siene Säns: Asarja. -

⁹Un Hezron siene Säns, dee am jebuaren worden: Jerachmeel un Ram un Kelubai.

¹⁰Un Ram jebua Amminadab; un Amminadab jebua Nachschon, dän Ferscht de Kjinja Juda.

¹¹Un Nachschon jebua Salma, un Salma jebua Boas,

¹²un Boas jebua Obed, un Obed jebua Isai.

¹³Un Isai jebua Eliab, sienem Ieeschtjebuarnen; un Abinadab, däm tweeden; un Schimea, däm dredden;

¹⁴Nethaneel, däm vieeden; Raddai, däm feften;

¹⁵Ozem, däm sasten; David, däm säwenden.

¹⁶Un äare Sestren wieren: Zeruja un Abigajil. Un de Säns de Zeruja: Abisai un Joab un Asael, 3.

¹⁷Un Abigajil jebua Amasa; un Amasa sien Voda wia Jeter, de Ismaelita.

¹⁸Un Kaleb, Hezron sien Sän, jebua Säns met Asuba, siene Fru, un met Jeriot; un dit sent äare Säns: Jescher un Schobab un Ardon.

¹⁹Un Asuba storf; un Kaleb naum sikj Efrat, un see jebua am Hur.

²⁰Un Hur jebua Uri, un Uri jebua Bezalel.

²¹Un nodäm jinkj Hezron no de Dochta Makir en, äa Voda wia Gilead; un hee naum ar, aus hee 60 Joa oolt wia, un see jebua am Segub.

²²Un Segub jebua Jair. Un disa haud 23 Städa em Launt Gilead;

²³un Gesur un Aram naumen an de Darpa Jair wajch, met Kenat un siene aunlidjende Städa, 60 Städa. Dise aula wieren Makir siene Säns, vom Voda Gilead.

²⁴Un no Eezron sienem Doot en Kaleb-Efrata, doa jebua Abija, Hezron siene Fru, am Aschur, däm Voda Tekoa.

²⁵Un Jerachmeel siene Säns, däm Ieeschtjebuarnen von Hezron, wieren: De Ieeschtjebuarna, Ram, un Buna un Oren un Ozem, von Achija.

²⁶Un Jerachmeel haud eene aundre Fru, äa Nomen wia Atara; see wia de Mutta von Onam.

²⁷Un Ram siene Säns, däm Ieeschtjebuarnen von Jerachmeel, wieren: Maaz un Jamin un Eker.

²⁸Un Onam siene Säns wieren: Schammai un Jada. Un Schammai siene Säns: Nadab un Abischur.

²⁹Un de Nomen von Abischur siene Fru wia Abichail; un see jebua am Achban un Molid.

³⁰Un Nadab siene Säns: Seled un Appaim. Un Seled storf onen Säns.

³¹Un Appaim siene Säns: Jischi. Un Jischi siene Säns: Scheschan. Un Scheschan siene Säns: Achlai.

³²Un Jada siene Säns, von Schammai sienem Brooda: Jeter un Jonatan. Un Jeter storf onen Säns.

³³Un Jonatan siene Säns: Pelet un Sasa. Daut wieren de Säns von Jerachmeel.

³⁴Un Scheschan haud kjeene Säns, sonda blooss Dajchta. Un Scheschan haud eenen ägiptischen Kjnajcht, sien Nomen wia Jarcha;

³⁵un Scheschan jeef sienem Kjnajcht Jarcha siene Dochta to Fru, un see jebua am Attai.

³⁶Un Attai jebua Natan, un Natan jebua Sabad,

³⁷un Sabad jebua Eflal, un Eflal jebua Obed,

³⁸un Obed jebua Jehu, un Jehu jebua Asarja,

³⁹un Asarja jebua Helez, un Helez jebua Elasa,

⁴⁰un Elasa jebua Sismai, un Sismai jebua Schallum,

⁴¹un Schallum jebua Jekamja, un Jekamja jebua Elischama.

⁴²Un Kaleb siene Säns, von Jerachmeel sienem Brooda: Mescha, sien Ieeschtjebuarna, hee es de Voda von Sif, un Marescha siene Säns, Hebron sien Voda.

⁴³Un Hebron siene Säns: Korach un Tappuach un Rekem un Schema.

⁴⁴Un Schema jebua Racham, Jorkeam sienen Voda, un Rekem jebua Schammai.

⁴⁵Un Schammai sien Sän wia Maon, un Maon wia de Voda von Bat-Zur.

⁴⁶Un Efa, de Näbenfru von Kaleb, jebua Haran un Moza un Gases. Un Haran jebua Gases.

⁴⁷Un Jahdai siene Säns: Regem un Jotam un Geschan un Pelet un Efa un Schaaf.

⁴⁸Maaka, Kaleb siene Näbenfru, jebua Scheba un Tirchana;

⁴⁹un see jebua Schaaf, Madmanna sienem Voda, Schewa, däm Voda von Mekbena, un däm Voda von Gibea. Un Kaleb siene Dochta wia Aksa.

⁵⁰Dit wieren Kaleb siene Säns: De Säns von Hur, de Ieeschtjebuarna von Efrata: Schobal, de Voda von Kirjat-Jearim;

⁵¹Salma, de Voda von Betlehem; Haref, de Voda von Bat-Gader.

⁵²Un Schobal, de Voda von Kirjat-Jearim, haud Säns: Haroeh, Hazi-Hammenuchot;

⁵³un de Jeschlajchta von Kirjat-Jearim wieren: De Jitrita un de Putita un de Schumatita un de Mischraita; von disem sent de Zerhatita un de Eschtaulita utjegonen.

⁵⁴De Säns von Salma: Betlehem, un de Netofatita, Aterot-Bat-Joab, un Hazi-Hammanachti, de Zorita,

⁵⁵un de Jeschlajchta de Schriewa, dee Jabez bewonde; de Tiratita, de Schimatita, de Sukatita. Daut sent de Kenita, dee von Hammat, vom Husvoda Rechab, häakomen.