Read De Bibel JHF 1. Chronik 22 Bible Online

1. Chronik 22 - De Bibel JHF bible

1. Chronik 22

¹Un David säd: Dit hia saul daut Hus Jahwe Gottes sennen, un dit de Aultoa toom Brauntopfa fa Israel.

²Un David befool, daut maun de Framde vesaumlen sull, dee em Launt Israel wieren; un hee stald an aus Steenschnieda aun, om Steena toom Bu fa daut Hus Gottes too behaken.

³Un David muak väl Iesa fa de Näajel fa de Däaren un fa de Klaumasch reed; un väl Koppa, daut wia nich too wäaje;

⁴un Zeedaholt onen Zol; dan de Zidonia un de Turia brochten väl Zeedaholt no David.

⁵Un David säd: Salomo, mien Sän, es noch jung un zoat; un daut Hus, daut fa däm Harn too buen es, saul sea groot woaren, toom Nomen un toom Riem en aule Lenda; soo well ekj daut Needje fa am reedmoaken. Un soo muak David väl Väarot ver sienem Doot.

⁶Un hee roopt sienen Sän Salomo un befool am, däm Harn, däm Gott Israels, een Hus too buen.

⁷Un David säd to Salomo: Sienem Sän! Ekj selfst haud en mienem Hoaten, däm Nomen Gottes, mienem Gott, een Hus too buen.

⁸Oba daut Wuat Gottes wia to mie, endäm hee säd: Du hast väl Bloot vegoten un groote Kjrichs jefieet; du saust mienem Nomen kjeen Hus buen, dan du hast väl Bloot oppe Ieed vegoten.

⁹Kjikj, een Sän woat die jebuaren woaren, dee woat een Maun - de Ru sennen, un ekj woa am de Ru ver aul siene Fiend runtom schaufen. Dan Salomo woat sien Nomen sennen, un Fräd un Ru woat hee Israel en siene Doag jäwen.

¹⁰Dee woat mienem Nomen een Hus buen; un hee saul mie Sän, un ekj well am Voda sennen; un ekj well däm Troon en sienem Kjennichtum äwa Israel opp eewich faustmoaken.

¹¹Nu, mien Sän, de Har es met die, daut et die jelinjt, un daut Hus Gottes, dienem Gott, bust, soo aus hee von die jerät haft!

¹²Blooss saul de Har die Ensecht un Vestaunt jäwen, un hee stalt die äwa Israel, un zwoa om daut Jesaz Gottes, dienem Gott, too hoolen!

¹³Dan woat die daut jelinjen, wan du doaropp acht jeffst, de Sazungen un de Rajchte to doonen, dee de Har däm Moses fa Israel befoolen haft. Sie stoakj un mootich, fercht die nich un enjst die nich!

¹⁴Un kjikj, derch miene Mieej ha ekj fa daut Hus Gottes 100 000 Talent Golt un 1000 Mol 1000 Talent Selwa reed jemoakt; un daut Koppa un daut Iesa es nich too wäaje, dan daut es sea väl doavon doa; uk Holt un Steena ha ekj reed jemoakt, un du woascht noch mea doatoo doonen.

¹⁵Un Hauntoabeida sent bie die en Menj; Steenschnieda un Oabeida met Steen un Holt, un aulahaunt Veständje en aulahaunt Oabeit;

¹⁶daut Golt, daut Selwa un daut Koppa un daut Iesa es nich too talen. Moak die opp un haundel; un de Har es met die!

¹⁷Un David befool aule Bowaschten Israels, sienem Sän Salomo too halpen:

¹⁸Es nich de Har, jun Gott, met junt, un haft nich hee junt runtom Ru jeschauft? Dan hee haft de Laundesbewona en miene Haunt jejäft, un daut Launt es däm Harn un sienem Volkj unjadon.

¹⁹Nu recht jun Hoat un june Seel doaropp, däm Harn, junem Gott, too sieekjen; un moakt junt opp un but daut Heilichtum Gottes, daut jie de Bundeslod Gottes un daut Jereetschoft vom Heilichtum Gottes en daut Hus brinjen, daut däm Nomen Gottes jebut woaren saul.