Read De Bibel JHF 1. Chronik 23 Bible Online

1. Chronik 23 - De Bibel JHF bible

1. Chronik 23

¹Un David wia oolt un Läwenssaut aun Doag; un hee muak Salomo, sienem Sän, toom Kjennich äwa Israel.

²Un hee vesaumeld aule Bowaschten Israels un de Priesta un de Leviten.

³Un de Leviten worden jetalt von 30 Joa un doa äwa; un äare Zol wia, Haupt fa Haupt, aun Mana 38 000.

⁴Von dise räd David, 24 000 sellen de Oppsecht äwa daut Woakj aum Hus Gottes doonen; un 6000 sellen Väastona un Rechta sennen;

⁵un 4000 Däarenwajchta; un 4000, dee däm Harn lowen met Seidenspell, dee ekj jemoakt ha, om to lowen.

⁶Un David deeld an en Aufdeelinj, no de Säns Levi, no Gerson, Kehat un Merari.

⁷Von de Gersonita: Ladan un Schimi.

⁸Ladan siene Säns: Daut Haupt, Jechiel, Setam un Joel, 3.

⁹Schimi siene Säns: Schelomit, Hasiel un Haran, 3. Dise wieren de Heipta de Vodahiesa von Ladan.

¹⁰Schimi siene Säns: Jachat, Sina, Jeghusch un Beria; daut wieren de Säns Schimi, 4.

¹¹Un Jachat wia daut Haupt, un Sina de tweeda; un Jeghusch un Beria hauden nich väl Säns, un soo worden see fa een Vodahus jetalt.

¹²Kehat siene Säns: Amram, Jizhar, Hebron un Ussiel, 4.

¹³Amram siene Säns: Aaron un Moses. Un Aaron wort aufjesondat, daut hee aus huachheilich jeheilicht wort, hee un siene Säns opp eewich, om ver däm Harn too rieekjren, am to deenen un en sienem Nomen eewich too säajnen.

¹⁴Un waut Moses, däm Maun Gottes, betraft, soo worden siene Säns nom Staum Levi jenant.

¹⁵Moses siene Säns: Gersom un Elieser.

¹⁶Gersom siene Säns: Schebuel, daut Haupt.

¹⁷Un Elieser siene Säns wieren: Rechabja, daut Haupt; un Elieser haud kjeene aundre Säns; oba Rechabja siene Säns wieren sea väl.

¹⁸Jizhar siene Säns: Schelomit, daut Haupt.

¹⁹Hebron siene Säns: Jerija, daut Haupt; Amarja, de tweeda; Jachasiel, de dredda; un Jekamam, de vieeda.

²⁰Ussiel siene Säns: Micha, daut Haupt, un Jischija, de tweeda.

²¹Merari siene Säns: Machli un Musi. Machli siene Säns: Eleasar un Kisch.

²²Un Eleasar storf, un hee haud kjeene Säns, sonda blooss Dajchta; un Kisch siene Säns, äare Breeda, neemen an too Frues.

²³Musi siene Säns: Machli, Eder un Jeremot, 3.

²⁴Daut wieren Levi siene Säns no äare Vodahiesa, Heipta de Vodahiesa, aus see jemostat worden no de Zol de Nomes, Haupt fa Haupt, dee daut Woakj fa däm Deenst em Hus Gottes deeden, von 20 Joa un doa äwa.

²⁵Dan David säd: De Har, dee Gott Israels, haft sienem Volkj Ru jeschauft, un wont en Jerusalem opp eewich;

²⁶soo ha uk de Leviten de Wonunk un aul äa Jereetschoft too äarem Deenst nich mea too droagen.

²⁷Dan no de latste Wieed von David worden von de Säns Levi deejanje von 20 Joa aun un doa äwa jetalt.

²⁸Dan äare Städ wia aune Sied von Aaron siene Säns fa däm Deenst aum Hus Gottes betrafs däm Väahoff un de Stowen un de Reinjunk von aulem Heiljen, un betrafs däm Woakj un Deenst em Hus Gottes;

²⁹fa daut Aunsechtsbroot, un fa daut fiene Mäl toom Speisopfa, un fa de onjesuade Kuaken, un fa de Paune, un fa daut Ennjereade, un fa aulem Jewicht un Mot;

³⁰un doamet see jieda Morjen hanjinjen, om däm Harn too danken un to lowen, un krakjt soo Oppenowent;

³¹un om de Brauntopfa Gott too opfren, aun de Sabaten, Niemonen un aun de Faste, no de Zol, no de Väaschreft doaräwa, emma ver däm Harn.

³²Un see deeden däm Deenst aum Zelt de Bejäajnunk un däm Deenst aum Heilichtum, un däm Deenst de Säns Aaron, äare Breeda, fa däm Deenst aum Hus Gottes.