Read De Bibel JHF 1. Chronik 27 Bible Online

1. Chronik 27 - De Bibel JHF bible

1. Chronik 27

¹Un de Kjinja Israel, no äare Zol, de Heipta de Vodahiesa un de Bowaschte äwa 1000 un äwa 100, un äare Väastona, dee däm Kjennich deenden en aulem Aunlidjen de Aufdeelinj, aunkomende un de aufgonende, Moonat fa Moonat, fa aule Moonaten em Joa; eene jiedre Aufdeelinj haud 24 000 Maun.

²Äwa de ieeschte Aufdeelinj fa däm ieeschten Moonat wia Jaschobam, Sabdiel sien Sän; un en siene Aufdeelinj wieren 24 000.

³Hee wia von de Säns Perez, daut Haupt aula Häabowaschte fa dän ieeschten Moonat.

⁴Un äwa de tweede Aufdeelinj em tweeden Moonat wia Dodai, de Achochita; un von siene Aufdeelinj wia Miklot Ferscht; un en siene Aufdeelinj wieren 24 000.

⁵De Bowaschta vom dredden Häa fa däm dredden Moonat wia Benaja, Jojada sien Sän, vom Priesta, aus Haupt; un en siene Aufdeelinj wieren 24 000.

⁶Dis Benaja wia een Held unja dee 30 un äwa 30; un von siene Aufdeelinj wia Ammisabad, sien Sän.

⁷De vieeda fa däm vieeden Moonat wia Asael, Joab sien Brooda, un Sebadja, sien Sän, no am; un en siene Aufdeelinj wieren 24 000.

⁸De fefta fa däm feften Moonat wia de Bowaschta Schamhuth, de Jisrachita; un en siene Aufdeelinj wieren 24 000.

⁹De sasta fa däm sasten Moonat wia Ira, Ikkesch sien Sän, de Tekoita; un en siene Aufdeelinj wieren 24 000.

¹⁰De säwenda fa däm säwenden Moonat wia Helez, de Pelonita, vonne Kjinja Efraim; un en siene Aufdeelinj wieren 24 000.

¹¹De achta fa däm achten Moonat wia Sibbekai, de Huschatita, von de Sarchita; un en siene Aufdeelinj wieren 24 000.

¹²De näajenda fa däm näajenden Moonat wia Abiesa, de Anatotita, von de Benjaminita; un en siene Aufdeelinj wieren 24 000.

¹³De 10-da fa däm 10-den Moonat wia Maharai, de Netofatita, von de Sarchita; un en siene Aufdeelinj wieren 24 000.

¹⁴De 1ieeschta fa däm 11-ten Moonat wia Benaja, de Pirhatonita, von de Kjinja Efraim; un en siene Aufdeelinj wieren 24 000.

¹⁵De 12-ta fa däm 12-ten Moonat wia Heldai, de Netofatita, von Othniel; un en siene Aufdeelinj wieren 24 000.

¹⁶Un äwa de Stam Israels: De Ferscht de Rubenita wia Elieser, Sikri sien Sän; de Simeonita, Schefatja, Maaka sien Sän;

¹⁷von Levi, Haschabja, Kemuel sien Sän; von Aaron, Zadok;

¹⁸von Juda, Elihu, von David siene Breeda; von Isachar, Omri, Michael sien Sän;

¹⁹von Sebulon, Jischmaja, Obadja sien Sän; von Naftali, Jerimot, Asriel sien Sän;

²⁰von de Kjinja Efraim, Hosea, Asasja sien Sän; von däm haulwen Staum Manasse, Joel, Pedaja sien Sän;

²¹von de Halft von Manasse en Gilead, Iddo, Sekarja sien Sän; von Benjamin, Jaasiel, Abner sien Sän;

²²von Dan, Asarel, Jerocham sien Sän. Daut sent de Bowaschte de Stam Israels.

²³Un David naum äare Zol von 20 Joa aun un doa unja nich opp; dan Gott haud jesajcht, daut hee Israel vemieren wudd aus de Stierns aum Himmel.

²⁴Joab, Zeruja sien Sän, haud aunjefongen too talen, oba muak daut nich too Enj; un doa kaum een Zorn äwa Israel; un soo wort de Zol nich enne Chronik vom Kjennich David oppjenomen.

²⁵Un äwa däm Kjennichsschats wia Asmawet, Adiel sien Sän. Un äwa däm Väarot oppem Launt, enne Städa un en de Darpa un en de vesechade Städen, wia Jonatan, Usija sien Sän.

²⁶Un äwa de Akaoabeida dee daut Launt beoabeiden: Esri, Kelub sien Sän.

²⁷Un äwa de Wienboaj: Schimi, de Ramatita; un äwa de Wien Arnt, äwa däm Wien Väarot: Sabdi, de Schifmita.

²⁸Un äwa de Eeljbeem un de Mulbäabeem, dee enne Läacht wieren: Baal-Hanan, de Gederita; un äwa däm Eelj Väarot: Joasch.

²⁹Un äwa de Rinda, dee en Scharon weiden: Schitrai, de Saronita; un äwa de Rinda enne Läachten: Schafat, Adlai sien Sän;

³⁰un äwa de Kameelen: Obil, de Ismaelita; un äwa de Äselinen: Jechdeja, de Meronotita;

³¹un äwa daut Kjlienvee: Jasis, de Hagarita. Aul dise wieren Vewaulta äwa däm Kjennich David sien Hab un Goot.

³²Un Jonatan, David sien Onkel, wia Rotjäwa; hee wia een veständja Maun un een Schreftjelieeda. Un Jechiel, Hakmoni sien Sän, wia bie de Kjennichssäns.

³³Un Ahitofel wia Rotjäwa vom Kjennich; un Husai, de Arkita, wia Frint vom Kjennich;

³⁴un no Ahitofel wia Jojada, Benaja sien Sän, un Abjatar. Un Joab wia Kjennichshäabowaschta.