Read De Bibel JHF 2. Chronik 1 Bible Online

2. Chronik 1 - De Bibel JHF bible

2. Chronik 1

¹Un Salomo, David sien Sän, wort en sienem Kjennichtum stoakja; un de Har, sien Gott, wäa met am un muak am äwaaul groot.

²Un Salomo räd too gaunz Israel, to de Bowaschte äwa 1000 un äwa 100, un to de Rechta un to aule Ferschten von gaunz Israel, de Heipta de Vodahiesa;

³un see jinjen, Salomo un de gaunze Jemeent met am, no de Hecht, dee en Gibeon wäa; dan doa wia daut Zelt de Bejäajnunk Gottes, daut Moses, de Kjnajcht Gottes, enne Wieste jemoakt haud.

⁴Oba de Lod Gottes haud David von Kirjat-Jearim nopp jebrocht aun däm Uat, däm David reed jemoakt haud; dan hee haud fa ar en Jerusalem een Zelt oppjeschloagen.

⁵Un de Koppane Aultoa, däm Bezalel, Uri sien Sän, vom Sän Hur, jemoakt haud, wia doa selfst ver de Wonunk Gottes; un Salomo un de Jemeent besochten ar.

⁶Un Salomo opfad ver däm Harn opp däm koppanen Aultoa, dee biem Zelt de Bejäajnunk wia; un hee opfad opp däm 1000 Brauntopfa.

⁷En dee selje Nacht erschien Gott däm Salomo un säd to am: Bedd, waut ekj die jäwen saul.

⁸Un Salomo säd to Gott: Du hast aun mienem Voda David, groote Jnod erwäsen, un du hast mie toom Kjennich aun siene Städ jemoakt:

⁹Nu mucht ekj, Har, Gott, dien Wuat woa moaken, daut du to mienem Voda David jerät hast! Dan du hast mie toom Kjennich jemoakt äwa een Volkj, daut groot es aus de Stoff oppe Ieed.

¹⁰Jeff mie nu Weisheit un Erkjantnis daut ekj ver disem Volkj ut- un engonen mucht; dan wäa kaun dit groote Volkj rechten?

¹¹Un Gott säd to Salomo: Wiels dit en dienem Hoaten jewast es, un du nich om Rikjtum jebedd hast, Rikjtum un Harlichkjeit (Iea), un om daut Läwen von dän, dee die haussen, un uk om väl Doag jebedd, sonda om Weisheit un Erkjantnis, doamet du mien Volkj rechten muchst, äwa däm ekj die toom Kjennich jemoakt ha;

¹²soo sent die Weisheit un Erkjantnis jejäft; un Rikjtum un Schauza un Iea well ekj die jäwen, diensjlikjen de Kjennichs, dee ver die jewast sent, nich jehaut ha, diensjlikjen kjeena no die haben woat.

¹³Un Salomo kaum vonne Hecht, dee en Gibeon wia, von däm Zelt de Bejäajnunk no Jerusalem. Un hee rejieed äwa Israel.

¹⁴Un Salomo brocht Woages un Ritta toop, un hee haud 1400 Woages un 12 000 Rittasch; un hee deed an enne Woagenstäda un nom Kjennich no Jerusalem.

¹⁵Un de Kjennich muak daut Selwa un daut Golt en Jerusalem däm Steen jlikj, un de Zeeda muak hee aus de Mulbäabeem, dee enne Läacht en Menje sent.

¹⁶Un maun brocht däm Salomo Pieed ut Ägipten; un een Schoa Haundelslied vom Kjennich holden daut fa eenen Jeltpriess.

¹⁷Un see brochten Woages ut Ägipten nopp fa 600 Schekel Selwa, un een Pieed fa 150. Un aulsoo brochten see - derch äare Haunt - fa aule Kjennichs de Hetita un fa de Kjennichs von Sierien.

¹⁸Un Salomo jedocht, däm Nomen Gottes een Hus too buen un een Hus fa sien Kjennichtum.