Read De Bibel JHF 2. Chronik 14 Bible Online

2. Chronik 14 - De Bibel JHF bible

2. Chronik 14

¹Un Asa deed, waut goot un rajcht enne Uagen Gottes wia, sienem Gott.

²Un hee deed framde Aultoaren un de Hechten wajch, un veschluag de Biltstendasch un bruak de Ascherim om;

³un hee säd to Juda, daut see däm Harn, däm Gott äare Vodasch, sieekjen un daut Jesaz un daut Jeboot doonen sullen;

⁴un hee deed ut aule Städa Juda de Hechten un de Sonnenstendasch wajch. Un daut Kjennichrikj haud unja am Ru.

⁵Un hee bud fauste Städa en Juda; dan daut Launt haud Ru, un daut wia kjeen Kjrich jäajen am en jane Joaren, dan Gott haud am Ru jejäft.

⁶Un hee säd to Juda: Lot ons dise Städa buen, un Miaren runtom moaken un Torms, Dooasch un Rijel; noch es daut Launt ver ons - dan wie ha Gott, onsem Gott, jesocht; wie ha am jesocht, un hee haft ons Ru runtom jejäft. Un soo buden see, un daut jelung an.

⁷Un Asa haud een Häa, daut Schild un Spies druach; ut Juda 300 000 un ut Benjamin 280 000 Maun, dee Schilda druagen un däm Boagen spaunde; aules browe Helden.

⁸Un Serach, de Kuschita, kaum jäajen an met eenem Häa von 1000 Mol 1000 Maun, un 300 Woages; un hee kaum bat Marescha.

⁹Un Asa jinkj am entjäajen; un see stalden sikj toom Kaumf opp enne Läacht Zefata bie Marescha.

¹⁰Un Asa roopt to däm Harn, sienem Gott, un säd: Har! Bie die es daut kjeen Unjascheet, too halpen, tweschen däm Majchtjen un däm Krauftloosen. Halp ons, Har, ons Gott! Dan wie veloten ons opp die, un en dienen Nomen sent wie jäajen dise Menj jegonen. Du best de Har, ons Gott; de Mensch kaun nuscht jäajen die!

¹¹Un de Har schluach de Kuschita ver Asa un ver Juda; un de Kuschita randen.

¹²Un Asa un daut Volkj, daut bie am wia, juagen an bat Gerar no. Un daut follen von de Kuschita soo väl, daut see sikj nich wada erholen kunnen; dan see worden veschmatat ver däm Harn un ver sienem Häa. Un see druagen sea väl Raup doavon.

¹³Un see schluagen aule Städa om Gerar, dan de Schrakj Gottes wia opp an; un see plindaden aule Städa, dan doa wia väl Raup.

¹⁴Un uk de Hoads äare Zelten schluagen see un fieeden väl Kjlienvee un Kameelen wajch. Un see jinjen trigj no Jerusalem.