Read De Bibel JHF 2. Chronik 16 Bible Online

2. Chronik 16 - De Bibel JHF bible

2. Chronik 16

¹Aum 36-sten Joa de Rejierunk Asa jinkj Bascha, de Kjennich von Israel, jäajen Juda nopp; un hee bud Rama, om Asa, däm Kjennich von Juda, kjeenem ut- un en gonen loten.

²Doa brocht Asa Selwa un Golt rut ut däm Schauz vom Hus Gottes un däm Kjennichshus; un hee schekjt no Ben-Hadad, däm Kjennich von Sierien, dee en Damaskus wond, un leet am sajen:

³Een Bunt es tweschen mie un die un tweschen mienem Voda un dienem Voda. Kjikj, ekj schekj die Selwa un Golt; soo bräakj dienen Bunt met Baesa, däm Kjennich von Israel, daut hee von mie auflat.

⁴Un Ben-Hadad hieed opp däm Kjennich Asa, un hee schekjt siene Häabowaschte jäajen de Städa Israels; un see schluagen Ijon un Dan un Abel-Majim un aule Väarotstäda en Naftali.

⁵Un daut passieed, aus Baesa daut hieed, doa leet hee vom Bu en Rama auf un stald siene Oabeit en.

⁶Oba de Kjennich Asa naum gaunz Juda, un leet de Steena un daut Holt von Rama wajch brinjen, met waut Baesa jebut haud; un hee bud doamet Geba un Mizpa.

⁷Un too jane Tiet kaum Hanani, de Seena, no Asa, däm Kjennich von Juda, un räd to am: Wiels du die opp däm Kjennich von Sierien jestett hast, un hast die nich opp däm Harn, dienem Gott, jestett, doarom es daut Häa vom Syrischen Kjennich ut diene Haunt jerant.

⁸Wieren nich de Kuschita un Libnita eene groote Häamacht, met Woages un Rittasch en groote Menj? Oba wiels du die opp däm Harn stettst, jeef hee an en diene Haunt.

⁹Dan de Uagen Gottes seenen de gaunze Ieed, om sikj machtvoll to wiesen aun dän, dee äa Hoat onjedeelt opp am jerecht es. En disem hast du ontru jehaundelt; dan von nu aun woascht du Kjrich haben.

¹⁰Un Asa wort oajalich äwa däm Seena un läd am em Jefenkjnis; dan hee wia doawäajen äwa am oajalich. Asa deed uk atelje to dee selje Tiet vom Volkj Jewault aun.

¹¹Un kjikj, de Jeschicht von Asa, de ieeschte un de latste, dee sent em Buak de Kjennichs von Juda un Israel jeschräwen.

¹²Un aum 39-sten Joa siene Rejierunk wort Asa aun siene Feet krank, soo daut hee sea krank wia; oba uk en siene Krankheit socht hee nich däm Harn, sonda de Doktasch.

¹³Un Asa läd sikj to siene Vodasch; un hee storf aum 41-sten Joa siene Rejierunk.

¹⁴Un maun begrow am en sienem Grauf, daut hee sikj en David siene Staut jegroft haud. Un maun läd am opp een Loaga, daut maun met Jewerz un scheenrikjendem Krut, no de Konst de Saulwmischa jemischt haud; un see stekjten fa am een sea grootet Fia aun.