Read De Bibel JHF 2. Chronik 17 Bible Online

2. Chronik 17 - De Bibel JHF bible

2. Chronik 17

¹Un Josafat, sien Sän, wort Kjennich en siene Städ. Un hee stoakjt sikj jäajen Israel;

²un hee läd Kjrichsvolkj en aule fauste Städa en Juda un sad Vewaulta em Launt Juda un enne Städa Efraim, dee sien Voda Asa enjenomen haud.

³Un de Har wia met Josafat; dan hee jinkj opp sienem Voda David siene Wäaj un socht nich de Baalim,

⁴sonda hee socht däm Gott von sienem Voda, un hee jinkj en siene Jebooten un nich nom Doonen Israels.

⁵Un de Har muak sien Kjennichtum en siene Haunt faust; un gaunz Juda jeef Josafat Jeschenkja, un hee haud väl Rikjtum un Iea.

⁶Un sien Hoat wia mootich oppe Wäaj Gottes, un hee deed de Hechten un de Ascherim ut Juda wajch.

⁷Un aum dredden Joa siene Rejierunk schekjt hee siene Bowaschten Ben-Hail un Obadja un Sekarja un Nethaneel un Mikaja, daut see enne Städa Juda lieren sullen;

⁸un met an de Leviten Schemaja un Netanja un Sebadja un Asael un Schemiramot un Jonatan un Adonija un Tobija un Tob-Adonija, de Leviten; un met an Elischama un Joram, de Priesta.

⁹Un see lieeden en Juda, endäm see daut Jesazbuak Gottes bie sikj hauden, un jinjen omhäa derch de Städa Juda un lieeden unja däm Volkj.

¹⁰Un de Schrakj Gottes kaum opp aule Kjennichrikjs de Lenda, dee runtom Juda wieren, soo daut see nich jäajen Josafat streeden.

¹¹Un de Filista brochten Josafat Jeschenkja un Selwa aus Opploag; uk de Araba brochten am Kjlienvee, 7700 Schopsbakj, un 7700 Kosenbakj.

¹²Un Josafat wort emma jrata, bat hee sea groot wia. Un hee bud en Juda Fastinj un Väarotstäda;

¹³un hee haud väl Väarot enne Städa Juda, un Kjrichsmana, browe Helden, en Jerusalem.

¹⁴Un soo wieren see ennjedeelt no de Vodahiesa: Von Juda wieren Bowaschte äwa 1000: Adna, de Bowaschta, un met am 300 000 browe Helden;

¹⁵un bie am Jochanan, de Bowaschta, un met am 280 000;

¹⁶un bie am Amasja, Sikri sien Sän, dee sikj däm Harn friewellich jestalt haud, un met am 200 000 browe Helden.

¹⁷Un von Benjamin: dee browa Held Eljada un met am 200 000 met Boagen un Schild reed toom Kaumf;

¹⁸un bie am Josabad, un met 180 000 reed toom Häa.

¹⁹Dise wieren daut, dee däm Kjennich deenden, buta dän, dee de Kjennich enne fauste Städa von gaunz Juda vesat haud.