Read De Bibel JHF 2. Chronik 18 Bible Online

2. Chronik 18 - De Bibel JHF bible

2. Chronik 18

¹Soo haud Josafat Rikjtum un väl Iea. Un hee wia met Ahab veschwoagat.

²Un no eenje Joaren jinkj hee rauf no Ahab no Samaria; un Ahab schlacht fa am un fa daut Volkj, daut bie am wia, väl Kjlien- un Rindvee; un hee veleid am, jäajen Ramot-Gilead nopptogonen.

³Un Ahab, de Kjennich von Israel, säd to Josafat, däm Kjennich von Juda: West du met mie no Ramot-Gilead gonen? Un hee säd to am: Ekj well aus du sennen, un mien Volkj aus dien Volkj, un well met die em Kjrich gonen.

⁴Un Josafat säd toom Kjennich von Israel: Befroag doch vondoag daut Wuat Gottes.

⁵Doa vesaumeld de Kjennich von Israel de Profeeten, 400 Maun, un hee säd to an: Sell wie jäajen Ramot-Gilead em Kjrich gonen, ooda saul ekj doavon loten? Un see säden: Go nopp, un Gott woat daut enne Kjennichshaunt jäwen.

⁶Oba Josafat säd: Es hia kjeen Profeet Gottes mea, daut wie derch am froagen?

⁷Un de Kjennich von Israel säd to Josafat: Daut es noch een Maun, om derch am däm Harn too befroagen; oba ekj hauss am, dan hee profezeit nuscht goodet äwa mie, sonda emma blooss Beeset; daut es Micha, Jimla sien Sän. Un Josafat säd: De Kjennich saul nich aulsoo räden!

⁸Doa roopt de Kjennich von Israel eenen Hoffwajchta un säd: Brinj Micha, Jimla sienem Sän, schwind hiahäa.

⁹Un de Kjennich von Israel un Josafat, de Kjennich von Juda, sauten een jiedra opp sienem Troon, met Kjennichskjleeda aunjetrocken, un see sauten opp eenem frieen Plauz aum Dooaengank von Samaria; un aule Profeeten profezeiden ver an.

¹⁰Un Zedekia, Kenaana sien Sän, muak sikj iesane Hieena un säd: Soo sajcht de Har: Met dise woascht du de Siera steeten, bat du an venicht hast.

¹¹Un de Profeeten profezeide krakjt soo un säden: Go nopp no Ramot-Gilead, un daut woat die jelinjen; dan de Har woat daut enne Kjennichshaunt jäwen.

¹²Un de Boote, dee hanjegonen wia, Micha to roopen, räd to am un säd: Kjikj, dee Wieed de Profeeten vekjindjen eenstemmich däm Kjennich Goodet; soo lot doch dien Wuat aus daut Wuat von an sennen, un räd Goodet.

¹³Oba Micha säd: Soo woa de Har läft, waut mien Gott mie sajen woat, daut woa ekj räden!

¹⁴Un aus hee nom Kjennich kaum, säd de Kjennich to am: Micha, sell wie no Ramot-Gilead em Kaumf gonen, ooda saul ekj daut loten? Un hee säd: Got nopp, un daut woat junt jelinjen; dan see woaren en june Haunt jejäft woaren.

¹⁵Un de Kjennich säd to am: Woo foaken mott ekj die beschwieren, daut du nuscht to mie räden saust, aus blooss de Woarheit em Nomen Gottes?

¹⁶Doa säd hee: Ekj sach gaunz Israel oppe Boaj vestreit aus Schop, dee kjeenen Hoad ha. Un de Har säd: Dise ha kjeenen Har; see sellen een jiedra no sienem Hus en Fräd trigjkomen.

¹⁷Un de Kjennich von Israel säd to Josafat: Ha ekj die nich jesajcht; hee profezeit nuscht Goodet äwa mie, sonda blooss Beeset?

¹⁸Un hee säd: Doarom hieet daut Wuat Gottes: Ekj sach däm Harn opp sienem Troon setten, un aulet Himmelshäa aun siene Rajchte un aun siene Linkje stonen.

¹⁹Un de Har säd: Wäa well Ahab, däm Kjennich von Israel, beräden, daut hee nopp jeit un en Ramot-Gilead fält? Un de eena säd soo, un de aundra säd soo.

²⁰Doa kaum een Jeist väa un stald sikj ver däm Harn un säd: Ekj well am beräden. Un de Har säd to am: Wuamet?

²¹Un hee säd: Ekj well utgonen un well een Läajesjeist sennen em Mul aul siene Profeeten. Un hee säd: Du woascht am beräden un woascht daut uk utrechten; go ut un doo aulsoo!

²²Un nu, kjikj, de Har haft eenen Läajesjeist em Mul dise diene Profeeten jelajcht, un de Har haft Beeset äwa die jerät.

²³Doa kaum Zedekia noda, Kenaana sien Sän, un schluach Micha oppe Baken un säd: Opp waut fa eenen Wajch es de Jeist Gottes von mie jegonen, om met die to räden?

²⁴Un Micha säd: Kjikj, du woascht daut aun janem Dach seenen, wan du enne bennaschte Stow gonen woascht, om die too vestäakjen.

²⁵Un de Kjennich von Israel säd: Nämt Micha un brinjt am trigj no Amon, däm Bowaschten de Staut, un no Joasch, däm Kjennichssän,

²⁶un sajcht: Soo sajcht de Kjennich: Sat disem em Jefenkjnis un jeft am Broot de Triebsaul un drenkjt am met Wota de Triebsaul, bat ekj en Fräd trigjkom.

²⁷Un Micha säd: Wan du en Fräd trigjkjeemst, soo haft de Har nich derch mie jerät! Un hee säd: Hieet daut, jie - aule Velkja!

²⁸Un de Kjennich von Israel un Josafat, de Kjennich von Juda, jinjen nopp no Ramot-Gilead.

²⁹Un de Kjennich von Israel säd to Josafat: Ekj well mie vekjleeden un em Kaumf gonen, oba du trakj diene Kjleeda aun. Un de Kjennich von Israel vekjleed sikj, un see jinjen em Kaumf.

³⁰Oba de Kjennich von Sierien haud sienem Bowaschten de Woages befoolen un jesajcht: Jie sellen nich strieden, noch jäajen Kjliene noch jäajen Groote, sonda jäajen däm Kjennich von Israel auleen.

³¹Un daut passieed, aus de Bowaschta de Woages Josafat sach, dan see säden: Daut es de Kjennich von Israel! Doa omrinjden see am, om to kjamfen; un Josafat schrieech; un de Har holp am, un Gott lenkjt an von am auf.

³²Un daut passieed, aus de Bowaschte de Woages sagen, daut hee nich de Kjennich von Israel wia, doa dreiden see sikj von am auf.

³³Un een Maun spaund däm Boagen opp onjefäa un troff däm Kjennich von Israel tweschen de Scheepen aum Brostschilt. Doa säd hee too sienem Woagen lenkja: Drei om un brinj mie rut ut däm Loaga, dan ekj sie vewund!

³⁴Un de Kaumf neem aun janem Dach too, un de Kjennich von Israel bleef em Woagen stonen, de Siera jäajenäwa, bat Oppenowent; un hee storf, too Tiet aus de Sonn unjajinkj.