Read De Bibel JHF 2. Chronik 19 Bible Online

2. Chronik 19 - De Bibel JHF bible

2. Chronik 19

¹Un Josafat, de Kjennich von Juda, kaum en Fräd no sienem Hus trigj, no Jerusalem.

²Doa jinkj am Jehu, Hanan sien Sän, de Seena, entjäajen; un hee säd toom Kjennich Josafat: Halpst du däm Gottloosen, un leewst du, dee däm Harn haussen? Doawäajen es de Zorn Gottes jäajen die oppjeflaumt.

³Oba doch es Goodet aun die jefungen worden, wiels du de Ascherot ut däm Launt wajchjeschauft un dien Hoat doaropp jerecht hast, Gott too sieekjen.

⁴Un Josafat bleef en Jerusalem. Un hee jinkj wada ut unja däm Volkj, von Beerscheba bat no de Boaj Efraim, un fieed an trigj nodäm Harn, däm Gott äare Vodasch.

⁵Un hee stald Rechta em Launt, en aule fauste Städa Juda, Staut fa Staut.

⁶Un hee säd to de Rechta: Paust opp, waut jie doonen; dan nich fa Menschen recht jie, sonda fa däm Harn, un hee es met junt em Rajchtspruch.

⁷Un nu, soo es dan de Schrakj Gottes opp junt; habt acht, woo jie haundlen! Dan bie däm Harn, onsem Gott, es kjeen Orrajcht, noch Aunseenen de Persoon ooda aunnämen von Jeschenkja.

⁸Un uk en Jerusalem stald Josafat Leviten un Priesta un Heipta de Vodahiesa Israels fa daut Jerecht Gottes un fa däm Rajchtstriet. Un see wieren no Jerusalem trigjjekomen.

⁹Un hee befool an un säd: Aulsoo sell jie doonen enne Angst Gottes, met Tru un met onjedeeldem Hoaten.

¹⁰En jiedrem Rajchtstriet, dee ver junt jebrocht woat von june Breeda, dee en äare Städa wonen, tweschen Bloot un Bloot, tweschen Jesaz un Jeboot, Sazungen un Rajchte, soo sell jie an belieren, daut see sikj nich aun däm Harn veschuldje, un daut nich een Zorn äwa junt un äwa june Breeda kjemt. Aulsoo sell jie doonen, doamet jie junt nich veschuldje.

¹¹Un kjikj, Amarja, de bowaschta Priesta, es äwa junt en aule Aunjeläajenheit Gottes, un Sebadja, Ismael sien Sän, de Ferscht vom Hus Juda, en aule Kjennichssache; un aus Väastona ver junt sent de Leviten. Siet stoakj un haundelt, un de Har woat met däm Gooden sennen.