Read De Bibel JHF 2. Chronik 2 Bible Online

2. Chronik 2 - De Bibel JHF bible

2. Chronik 2

¹Un Salomo tald 70 000 Laustdroaga auf, un 80 000 Steenschnieda enne Boaj, un äwa an 3 600 Oppsechta.

²Un Salomo schekjt no Huram, däm Kjennich von Tierus, un leet am sajen: Soo aus du mienem Voda David jedonen un am Zeeda jeschekjt hast, daut hee sikj een Hus bud, om doa too wonen, soo doo uk mie.

³Kjikj, ekj well däm Nomen Gottes, mienem Gott, een Hus buen, om am daut to heilje, gootrikjendet Rieekjastoff (Weiruak, seeta Ruak) ver am to rieekjren, un om daut Aunsechtsbroot tootorechten un Brauntopfa zemorjes un oppenowent too opfren, aun de Sabaten un aun de Niemonen un aun de Faste Gottes, von onsem Gott; eewich fa Israel.

⁴Un daut Hus, daut ekj buen well, saul groot sennen; dan ons Gott es jrata aus aule Jetta.

⁵Oba wäa kaun am een Hus buenn? Dan de Himmel un de Himmel Himmel kaun am nich foten. Un wäa sie ekj, daut ekj am een Hus buen saul, aus blooss, om am to rieekjren?

⁶Un nu schekj mie eenen Maun, dee oabeiden kaun met Golt, Selwa, Koppa, Iesa, roodem Purpur un Karmesin un blauem Purpur, un kaun, Schnitzoabeit moaken, doamet hee met de Kjensla oabeit, dee bie mie en Juda un en Jerusalem sent, dee mien Voda David bestalt haud.

⁷Un schekj mie Zeeda-, Ziepressen- un Sandelholt vom Libanon; dan ekj weet, daut diene Kjnajchts daut Holt vom Libanon haken kjennen; un kjikj, miene Kjnajchts sellen met diene Kjnajchts sennen;

⁸un maun saul mie väl Holt reedmoaken; dan daut Hus, daut ekj buen well, saul groot un wundaboa sennen.

⁹Un kjikj, ekj woa diene Kjnajchts, de Holtoabeida, dee daut Holt haken, jedraschtem Weit jäwen, 20 000 Kor, un 20 000 Kor Joascht, un 20 000 Bat Wien, un 20 000 Bat Eelj.

¹⁰Un Huram, de Kjennich von Tierus, auntwuad schreftlich un schekjt aun Salomo dise Bootschoft: Wiels de Har sien Volkj leeft, haft hee die toom Kjennich äwa an jesat.

¹¹Un Huram säd: Jeloft es de Har, de Gott Israels, dee Himmel un de Ieed jemoakt haft, daut hee däm Kjennich David eenen weisen Sän jejäft, voll Ensecht un Vestaunt, dee däm Harn een Hus buen well un een Hus fa sien Kjennichtum!

¹²Un nu schekj ekj die eenen weisen, ensechtsvollen Maun, Huram-Abi,

¹³däm Sän von eene Fru vonne Dajchta Dan, un däm sien Voda een Tura wia, dee doa oabeiden kaun met Golt, Selwa, Koppa, Iesa, Steen un Holt, roodem Purpur, blauem Purpur, fiene Boomwoll un Karmesin, un Schnitzoabeit moakt, un kjant jiedret Konstwoakj, daut am oppjejäft woat, met diene Kjensla un met mienem Harn David siene Kjensla, dienem Voda.

¹⁴Un nu, däm Weit un de Joascht, daut Eelj un Wien, wuavon mien Har jerät haft, mucht hee siene Kjnajchts schekjen.

¹⁵Oba wie woaren Holt oppem Libanon haken, soo väl du bruckst, un woa die daut aus Promm oppem Mäa no Jafo brinjen; un du kaust daut nopp no Jerusalem brinjen.

¹⁶Un Salomo tald aule Framde, dee em Launt Israel wieren, nom Talen, dee sien Voda David von an jemoakt haud; un daut wieren 153 600.

¹⁷Un hee muak von an 70 000 too Laustdroaga, un 80 000 too Steenschnieda enne Boaj, un 3 600 too Oppsechta, dee daut Volkj enne Oabeit hilden.