Read De Bibel JHF 2. Chronik 21 Bible Online

2. Chronik 21 - De Bibel JHF bible

2. Chronik 21

¹Un Josafat läd sikj to siene Vodasch, un hee wort bie siene Vodasch begroft en David siene Staut. Un Joram, sien Sän, wort Kjennich en siene Städ.

²Un hee haud Breeda, Säns von Josafat: Asarja, Jechiel, Sekarja, Asarja, Michael un Schefatja; aul dise wieren Josafat siene Säns, vom Kjennich von Israel [Juda].

³Un de Voda jeef an väl Jeschenkja aun Selwa un Golt un kostboare Sachen, doatoo fauste Städa en Juda; oba daut Kjennichrikj jeef hee Joram, dan hee wia de Ieeschtjebuarna.

⁴Un aus Joram daut Kjennichrikj von sienem Voda äwanomen haud un stoakj wia, doa muak hee aul siene Breeda doot un uk eenje Bowaschte von Israel met daut Schwieet.

⁵32 Joa wia Joram oolt, aus hee Kjennich wort, un hee rejieed acht Joa en Jerusalem.

⁶Un hee jinkj oppe Wäaj de Kjennichs von Israel, aus daut Hus Ahab jedonen haud, dan hee haud eene Dochta von Ahab to Fru; un hee deed, waut enne Uagen Gottes bees wia.

⁷Oba de Har wull David sien Hus nich vedoawen, wäajen däm Bunt, däm hee met David jemoakt haud, un soo aus hee jesajcht haud, daut hee am un siene Säns een Licht opp emma jäwen wull.

⁸En siene Doag follen de Edomieta von Juda auf un saden eenen Kjennich äwa sikj.

⁹Doa jinkj Joram äwa met siene Bowaschten, un aule Woages met am. Un daut passieed, aus hee sikj denacht oppmuak, doa schluach hee de Edomieta, dee am un de Bowaschte vonne Woages omrinjt hauden.

¹⁰Soo follen de Edomieta von Juda bat opp disem Dach auf. Donn, too jane Tiet, foll uk Libna von am auf; dan hee haud däm Harn, däm Gott siene Vodasch, veloten.

¹¹Uk hee muak Hechten oppe Boaj Juda, un hee veleid de Bewona von Jerusalem, Huararie too driewen, un veleid Juda doatoo.

¹²Doa kaum eene Schreft von Elia, däm Profeet, no am, dee wia aulsoo: Soo sajcht Gott, dee Gott von dienem Voda David: Doarom, daut du nich oppe Wäaj von dienem Voda Josafat un oppe Wäaj Asa, däm Kjennich von Juda, jegonen best,

¹³sonda oppe Wäaj de Kjennichs von Israel jegonen un Juda un de Bewona von Jerusalem veleet hast, Huararie too driewen, no de Huararie vom Hus Ahab, un uk diene Breeda, daut Hus von dienem Voda, omjebrocht hast, dee bäta wieren aus du:

¹⁴Kjikj, soo woat de Har dien Volkj un diene Säns un diene Frues un aul dien Hab un Goot met eene groote Ploag ploagen;

¹⁵oba du woascht schwoa krank woaren en dienem Ennalichen, bat dien Ennaliche von dise Krankheit von Tiet too Tiet rutkomen woat.

¹⁶Un de Har erwakjt jäajen Joram däm Jeist de Filista un de Araba, dee aune Sied von de Kuschita wonen.

¹⁷Un see jinjen jäajen Juda nopp un bruaken en un fieeden aulet Hab un Goot wajch, daut em Kjennichshus wia, un uk siene Säns un siene Frues; un daut bleef am kjeen Sän äwa aus blooss Joaas, de jinjsta von siene Säns.

¹⁸Un no aul disem ploagd Gott am met eene onheelboare Krankheit en sienem Ennalichen.

¹⁹Un daut wia von Dach too Dach, aum Enj von twee Joa, daut sien Ennaliche bie siene Krankheit rutkaum; un hee storf unja groote Weedoag. Un sien Volkj muak am kjeen Fia, aus maun siene Vodasch jedonen haud.

²⁰32 Joa wia hee oolt, aus hee Kjennich wort, un hee rejieed acht Joa en Jerusalem. Un hee jinkj han, onen jeieet to woaren; un maun begrow am en David siene Staut, oba nich enne Kjennichsjräwa.