Read De Bibel JHF 2. Chronik 22 Bible Online

2. Chronik 22 - De Bibel JHF bible

2. Chronik 22

¹Un de Bewona von Jerusalem muaken Ahasja, sienem jinjsten Sän, aun siene Städ toom Kjennich; dan aule elre (Breeda) hauden de Schoa omjebrocht, dee met de Araba em Loaga jekomen wieren. Un Ahasja, Joram sien Sän, vom Kjennich von Juda, wort Kjennich.

²22 Joa wia Ahasja oolt, aus hee Kjennich wort, un hee rejieed een Joa en Jerusalem; un de Nomen siene Mutta wia Atalja, Omri siene Dochta.

³Uk hee jinkj oppe Wäaj von Ahab sienem Hus; dan siene Mutta wia sien Rotjäwa toom gottloosen Haundlen.

⁴Un hee deed, waut enne Uagen Gottes bees wia, aus daut Hus Ahab; dan dise wieren nom Doot von sienem Voda siene Rotjäwa, too sienem vedoawen.

⁵Un hee jinkj opp äarem Rot en, un jinkj met Joram, Ahab sienem Sän, däm Kjennich von Israel, em Kjrich jäajen Hasael, däm Kjennich von Sierien, no Ramot-Gilead. Un de Siera vewunden Joram.

⁶Doa jinkj hee trigj, om sikj en Jesreel von de Wunden heelen to loten, dee see am en Rama jeschloagen hauden, aus hee jäajen Hasael, däm Kjennich von Sierien, street. Un Asarja, Joram sien Sän, de Kjennich von Juda, jinkj rauf, om Joram, Ahab sienem Sän, en Jesreel too besieekjen, wiels hee krank wia.

⁷Oba von Gott wia daut de Unjagank Ahasja, daut hee no Joram kaum. Dan aus hee aunjekomen wia, jinkj hee met Joram jäajen Jehu ut, Nimsis sienem Sän, däm de Har jesaulft haud, om Ahab sien Hus uttoroten.

⁸Un daut passieed, aus Jehu aun Ahab sienem Hus Jerecht eewd, doa troff hee de Bowaschte von Juda un de Breeda äare Säns, von Ahasja, dee Ahasja deenden; un hee brocht an om.

⁹Un hee socht Ahasja, un see jreepen am, aus hee sikj en Samaria vestuak; un see brochten am no Jehu un brochten am om. Un see begrowen am, dan see säden: Hee es een Sän von Josafat, dee däm Harn jesocht haft met sienem gaunzen Hoaten. Un daut wia kjeena mea en Ahasja sienem Hus, dee toom Kjennichtum stoakj jenuach jewast wia.

¹⁰Un aus Atalja, Ahasja siene Mutta, sach, daut äa Sän doot wia, doa muak see sikj opp un brocht däm gaunzen Kjennichs Somen, vom Hus Juda, om.

¹¹Oba Josabat, de Dochta vom Kjennich, naum Joasch, Ahasja sienem Sän, un stool am ut de Medd de Kjennichssäns wajch, dee omjebrocht worden, un see deed am un siene Aume enne Schlopstow. Un soo vestuak am Josabat, de Dochta vom Kjennich Joram, de Fru von Jojada, däm Priesta; dan see wia de Sesta von Ahasja, ver Atalja, soo daut see am nich ombrochten.

¹²Un hee wia sas Joa bie an em Hus Gottes em Vestäakj. Oba Atalja rejieed äwa daut Launt.