Read De Bibel JHF 2. Chronik 23 Bible Online

2. Chronik 23 - De Bibel JHF bible

2. Chronik 23

¹Un aum säwenden Joa stoakjt sikj Jojada un vebung sikj met de Bowaschte äwa 100, Asarja, Jerocham sienem Sän, un Ismael, Jochanan sien Sän, un Asarja, Obed sien Sän, Maaseja, Adaja sien Sän, un Elisafat, Sikri sien Sän, met an en eenem Bunt.

²Un see jinjen en Juda omhäa un vesaumelden de Leviten ut aule Städa Juda, un de Heipta de Vodahiesa von Israel; un see kaumen no Jerusalem.

³Un de gaunze Jemeent muak em Hus Gottes eenen Bunt met däm Kjennich. Un Jojada säd to an: Kjikjt, de Kjennichssän saul Kjennich sennen, soo aus de Har von David siene Säns jerät haft.

⁴Dit es daut, waut jie doonen sellen: een dreddel von junt, dee jie aum Sabat komen, vonne Priesta un vonne Leviten, sellen Däarenwajchta aune Schwal sennen;

⁵un een dreddel saul em Kjennichshus sennen; un een dreddel aum Dooa Jesod [Gruntdooa]; un aulet Volkj en de Häw aum Hus Gottes.

⁶Un daut saul kjeena em Hus Gottes nengonen, aus blooss de Priesta un de deenende Leviten; see sellen nengonen, dan see sent heilich. Un aulet Volkj saul de Väaschreften Gottes doonen.

⁷Un de Leviten sellen däm Kjennich omrinjen, een jiedra met sienem Jewäa en siene Haunt; un wäa en däm Hus nennjeit, saul omjebrocht woaren; un jie sellen biem Kjennich sennen, wan hee nenn- un utjeit.

⁸Un de Leviten un gaunz Juda deeden no aulem, waut de Priesta Jojada befoolen haud; un see neemen een jiedra siene Mana, dee aum Sabat komen met dee aum Sabat aufgonen; dan de Priesta Jojada haud de Aufdeelinj nich entloten.

⁹Un de Priesta Jojada jeef de Bowaschte äwa 100 Spiessen un Brostschilda un Schilda, dee däm Kjennich David jehieet hauden, dee em Hus Gottes wieren.

¹⁰Un hee stald aulet Volkj opp, un zwoa eenem jiedren met sienem Jewäa en siene Haunt, von de rajchte Hussied bat no de linkje Hussied, jäajen däm Aultoa un jäajen däm Hus, runtom däm Kjennich.

¹¹Un see fieeden däm Kjennichssän rut un saden am de Kroon opp un jeewen am daut Zeichnis, un see muaken am toom Kjennich; un Jojada un siene Säns saulwden am un säden: Daut läft de Kjennich!

¹²Un aus Atalja daut Volkjsjeschrecht hieed, daut doahan rand un däm Kjennich lowd, kaum see nom Volkj em Hus Gottes.

¹³Un see sach: Un kjikj, de Kjennich stunt opp sienem Plauz aum Stenda em Engank, un de Bowaschte un de Trompeeta biem Kjennich; un aulet Laundesvolkj wia froo un blosd enne Trompeeten; un de Senja wieren doamet Seidenspell un leiden däm Loffjesank. Doa vereet Atalja äare Kjleeda un roopt: Opprua, Opprua!

¹⁴Un de Priesta Jojada leet de Bowaschte von 100, dee äwa daut Häa jestalt wieren, rutgonen, un säd to an: Fieet ar rut, tweschen de Rieeje, un wäa ar folcht, saul met daut Schwieet omjebrocht woaren! Dan de Priesta säd: Jie sellen ar nich em Hus Gottes ombrinjen.

¹⁵Un see muaken ar Plauz, un see jinkj derch däm Engank em Pieedsdooa en daut Kjennichshus; un doa brochten see ar om.

¹⁶Un Jojada muak eenen Bunt tweschen sikj un däm gaunzen Volkj un däm Kjennich, daut see daut Volkj Gottes sennen sullen.

¹⁷Doa jinkj aulet Volkj em Baal Hus un reeten daut dol, un see veschluagen aule Aultoaren un siene Bilda; un Mattan, däm Baal Priesta, muaken see ver däm Aultoa doot.

¹⁸Un Jojada läd de Amta vom Hus Gottes enne Haunt de Priesta, de Leviten, dee David äwa daut Hus Gottes aufjedeelt haud, om de Brauntopfa Gottes too opfren, aus daut em Jesaz Moses jeschräwen steit, met Freid un Jesank, no de Veordninj von David.

¹⁹Un hee stald de Dooawajchta aune Dooasch aum Hus Gottes, daut kjeena nenjinkj, dee irjent woo onrein wia.

²⁰Un hee naum de Bowaschte äwa 100 un de Väanämen un de Harscha äwa daut Volkj, un aulet Laundesvolkj, un fieed däm Kjennich ut däm Hus Gottes rauf, un see kaumen derch daut bowaschte Dooa en daut Kjennichshus; un see saden däm Kjennich opp däm Kjennichstroon.

²¹Un daut gaunze Laundesvolkj freid sikj, un de Staut haud Ru. Oba Atalja hauden see met daut Schwieet omjebrocht.