Read De Bibel JHF 2. Chronik 31 Bible Online

2. Chronik 31 - De Bibel JHF bible

2. Chronik 31

¹Un aus see doamet foadich wieren, jinjen aule Israeliten, dee doa wieren, trigj no de Städa Juda; un see veschluagen de Biltstendasch un hakte de Ascherim om, un reeten de Hechten un de Aultoaren dol en gaunz Juda un Benjamin un en Efraim un Manasse, bat see doamet foadich wieren. Un aule Kjinja Israel jinjen trigj en äare Städa, een jiedra no sienem Ieejentum.

²Un Hiskia stald de Aufdeelinj de Priesta un de Leviten, no äare Aufdeelinj, eenem jiedrem no sienem Deenst, soo aus de Priesta aus uk de Leviten, Brauntopfa un Dankopfa to brinjen, toom deenen un toom Danken un toom Lowen enne Dooasch vom Loaga Gottes.

³Un hee jeef daut Kjennichsdeel von sienem Hab un Goot toom Brauntopfa; fa de Morjen- un Owentopfa, un fa daut Sabat Brauntopfa un Niemon un de Faste, aus daut em Jesaz Gottes väajeschräwen es.

⁴Un hee befool däm Volkj, de Bewona von Jerusalem, daut Deel de Priesta un de Leviten to jäwen, doamet see aum Jesaz Gottes fausthoolen sullen.

⁵Un aus daut Wuat bekaunt wort, brochten de Kjinja Israel väl ieeschte Gowen vom Jeträajd, jungen Wien, Eelj, Honnich un von aule Arnt vom Flekj; un däm 10-den von aulem, see brochten väl.

⁶Un de Kjinja Israel un Juda, dee enne Städa Juda wonden, uk see brochten daut 10-de von Rind- un Kjlienvee, un däm 10-den von de jeheilichte Dinj, dee däm Harn, äarem Gott jeheilicht wieren, un see brochten hupewies han.

⁷Aum dredden Moonat fungen see aun, de Hupes tooptolajen, un aum säwenden Moonat wieren see doamet foadich.

⁸Hiskia un de Bowaschte kaumen un bekjikjten de Hupes, un see lowden dän Harn un sien Volkj Israel.

⁹Un Hiskia befruach de Priesta un de Leviten wäajen de Hupes.

¹⁰Un doa räd Asarja, de Bowaschta Priesta, vom Hus Zadok, to am un säd: Von doa maun aunjefongen haft, daut Häwopfa en daut Hus Gottes to brinjen, ha wie jejäten un sent saut jeworden un ha väl äwajeloten; dan de Har haft sien Volkj jesäajent; un daut Äwajebläwne es dise groote Menj.

¹¹Un Hiskia befool, Väarotskoma em Hus Gottes reedtomoaken; un see muaken dee reed;

¹²un see brochten tru daut Häwopfa un daut 10-de un de jeheilichte Dinj nenn. Un de bowaschta Oppsechta doaräwa wia Konanja, de Levit, un Schimi, sien Brooda, aus tweeda.

¹³Un Jechiel, Asasja, Nachat, Asael, Jerimot, Josabad, Eliel, Jismakja, Machat un Benaja wieren Oppsechta unja de Haunt Konanja un Schimi, sienem Brooda, derch däm Kjennich Hiskia un Asarja äare Veordninj, däm Ferscht vom Hus Gottes.

¹⁴Un Kore, Jimna sien Sän, de Levit, de Dooawajchta jäajen Oosten, wia äwa de friewelje Gowen Gottes, om daut Häwopfa Gottes un Huachheilje ruttojäwen.

¹⁵Un unja siene Haunt wieren Eden, Minjamin, Jeschua, Schemaja, Amarja un Schekanja enne Städa de Priesta, om Tru äare Breeda, no de Aufdeelinj to jäwen, däm Jratsten aus däm Kjlansten;

¹⁶buta dän von an, dee aus Menliche em Jeschlajchtsbuak enjeschräwen wieren, von dree Joa aun un doaräwa, aule, dee em Hus Gottes kaumen, no de Doagesordninj too äarem Deenst en äare Amta, no äare Aufdeelinj;

¹⁷soo aus dee em Jeschlajchtsbuak ennjeschräwne Priesta, no äare Vodahiesa, aus uk de Leviten, von 20 Joa un doaräwa, en äare Amta, no äare Aufdeelinj,

¹⁸un dee em Jeschlajchtsbuak Ennjeschräwne unja aul äare Kjinja; äare Frues un äare Säns un äare Dajchta, dee gaunze Jemeent. Dan jewessenhauft heilijde see sikj, om heilich to sennen.

¹⁹Un fa Aaron siene Säns, de Priesta, oppe Felda bie de Städa, wieren en jiedre Staut Mana aunjestalt, dee met Nomen aunjejäft wieren, om jiedrem Menlichen unja de Priesta un jiedrem em Jeschlajchtsbuak Ennjeschräwne unja de Leviten Deel to jäwen.

²⁰Un soo deed Hiskia en gaunz Juda. Un hee deed, waut goot un rajcht un tru wia ver däm Harn, sienem Gott.

²¹Un en aulem Woakj, daut hee aunfunk em Deenst em Hus Gottes un em Jesaz un en däm Jeboot, om sienem Gott too sieekjen, haundeld hee met gaunzem Hoaten, un hee haud Jelinje.