Read De Bibel JHF 2. Chronik 36 Bible Online

2. Chronik 36 - De Bibel JHF bible

2. Chronik 36

¹Un daut Laundesvolkj naum Joaas, Josia sienem Sän, un see muaken am toom Kjennich en Jerusalem aun sienem Voda siene Städ.

²23 Joa wia Joaas oolt, aus hee Kjennich wort, un hee rejieed 3 Moonat en Jerusalem.

³Un de Kjennich von Ägipten sad am en Jerusalem auf; un hee läd däm Launt eene Strof von 100 Talent Selwa un eenem Talent Golt opp.

⁴Un de Kjennich von Ägipten muak sienem Brooda Eljakim toom Kjennich äwa Juda un Jerusalem un endad sienen Nomen en Jojakim. Oba sienem Brooda Joaas neem Neko faust un brocht am no Ägipten.

⁵25 Joa wia Jojakim oolt, aus hee Kjennich wort, un hee rejieed 11 Joa en Jerusalem. Un hee deed, waut enne Uagen Gottes bees wia, sienem Gott.

⁶Doa jinkj Nebukadnezar, de Kjennich von Babel, nopp; un hee bung am met koppane Faslen, om am no Babel to brinjen.

⁷Uk vom Jereetschoft em Hus Gottes brocht Nebukadnezar no Babel un läd daut en sienem Tempel en Babel.

⁸Un daut Äwaje de Jeschicht von Jojakim, un daut Aufschu, dee hee deed, un waut aun am jefungen wort, kjikj, daut es em Buak de Kjennichs von Israel un Juda jeschräwen. Un Jojakin, sien Sän, wort Kjennich aun siene Städ.

⁹achtieen Joa wia Jojakin oolt {2Kjeen.24,8}, aus hee Kjennich wort, un hee rejieed 3 Moonat un 10 Doag en Jerusalem. Un hee deed, waut enne Uagen Gottes bees wia.

¹⁰Un biem Joaresenj schekjt de Kjennich Nebukadnezar han un leet am no Babel brinjen met däm kostboarem Jereetschoft ut däm Hus Gottes; un hee muak sienem Brooda Zedekia toom Kjennich äwa Juda un Jerusalem.

¹¹21 Joa wia Zedekia oolt, aus hee Kjennich wort, un hee rejieed 11 Joa en Jerusalem.

¹²Un hee deed, waut enne Uagen Gottes bees wia, sienem Gott. Hee deemutijd sikj nich ver däm Profeet Jeremia, aus hee nom Befäl Gottes räd.

¹³Un hee jinkj jäajen däm Kjennich Nebukadnezar, dee am haud bie Gott schwieren loten. Un hee vehoad sien Jenekj un sien Hoat vestokt, soo daut hee nich nom Harn trigj dreid, däm Gott Israels.

¹⁴Uk aule Bowaschten de Priesta un daut Volkj wieren Truloos, un deeden no aulem Aufschu de Nazionen, un veonreinijde daut Hus Gottes, daut hee en Jerusalem jeheilicht haud.

¹⁵Un Jahwe, de Gott äare Vodasch, schekjten no an derch siene Booten, emma wada, dan hee erboarmd sikj äwa sien Volkj un siene Wonunk.

¹⁶Oba see vespotten de Booten Gottes un veachten siene Wieed un velachten siene Profeeten, bat de Jrim Gottes jäajen sien Volkj oppstäajch, daut kjeene Heiljunk mea wia.

¹⁷Un hee leet däm Kjennich äwa de Chaldäa jäajen an noppkomen, un schluach äare Jinjlinje met daut Schwieet em Hus von äarem Heilichtum; hee veschoond kjeene Jinjlinje noch de Junkfrues, de Oole un de Jreisen; aule jeef hee en siene Haunt.

¹⁸Un aulet Jereetschoft vom Hus Gottes, de groote un de kjliene, un de Schauza vom Hus Gottes, un de Kjennichsschats un siene Bowaschten; aules brocht hee no Babel.

¹⁹Un see vebrenden daut Hus Gottes un reeten de Mia von Jerusalem dol; un aul siene Paulausten vebrenden see met Fia, un aulet kostboare Jereetschoft vebrenden see.

²⁰Un dee vom Schwieet äwajebläwne fieed hee wajch no Babel; un see worden am un siene Säns too Kjnajchts, bat daut Kjennichrikj de Persa too Harschoft kaum;

²¹doamet daut Wuat Gottes erfelt wort derch daut Mul Jeremia, bat daut Launt siene Sabaten jefiat haud. Aule Doag siene Vewustunk haud et Ru, bat 70 Joa voll wieren.

²²Un aum ieeschten Joa Kierus, däm Kjennich von Persien - doamet daut Wuat Gottes derch daut Mul von Jeremia erfelt wort - erwakjt Gott däm Jeist von Kierus, vom Kjennich von Persien; un hee leet eenen Roop utgonen derch sien gaunzet Kjennichrikj, un zwoa uk schreftlich, endäm hee säd:

²³Soo sajcht Kierus, de Kjennich von Persien: Aule Kjennichrikjs de Ieed haft de Har, de Gott vom Himmel, mie jejäft; un hee haft mie befoolen, am een Hus en Jerusalem too buen, daut en Juda es. Wäa emma unja junt ut sienem Volkj es, met däm es de Har, sien Gott; un hee go (jeit) nopp!