Read De Bibel JHF 2. Chronik 5 Bible Online

2. Chronik 5 - De Bibel JHF bible

2. Chronik 5

¹Un soo wia daut gaunze Woakj vollbrocht, daut Salomo fa daut Hus Gottes muak. Un Salomo brocht de jeheilichte Dinj von sienem Voda David nenn, nämlich daut Selwa un daut Golt un aulet Jereetschoft; hee läd dee enne Schauzkoma em Hus Gottes.

²Doa vesaumeld Salomo de Eltestasch von Israel un aule Eltestasch de Stam, de Ferschten de Vodahiesa de Kjinja Israel, no Jerusalem, om de Bundeslod Gottes toobrinjen ut David siene Staut, daut es Zion.

³Un aule Mana von Israel vesaumelden sikj biem Kjennich toom Fast, daut es de säwenda Moonat.

⁴Un daut kaumen aule Eltestasch von Israel, un de Leviten neemen de Lod,

⁵un see brochten de Lod nopp, soo aus daut Zelt de Bejäajnunk un aulet heilje Jereetschoft, daut em Zelt wia. De Priesta un de Leviten brochten dee nopp.

⁶Un de Kjennich Salomo un de gaunze Jemeent Israel, dee sikj no am vesaumelt haud un ver de Lod stunt, opfaden Kjlien- un Rindvee, daut nich beräakjent noch jetalt woaren kunn.

⁷Un de Priesta brochten de Bundeslod Gottes aun äarem Uat, en däm Zelt de Bejäajnunk em Hus, en daut Aulaheilichste, unja de Flichten de Cherubim;

⁸dan de Cherubim breeden äare Flichten ut äwa däm Uat de Lod, un de Cherubim bedakjten de Lod un äare Stangen von bowen häa.

⁹Un de Stangen wieren soo lank, daut de Spetzen vonne Stangen von de Lod häa aun de väaschte Sied vom bennaschten Rum toseenen wieren; oba von buten wieren see nich toseenen. Un dee sent doa selfst bat opp disem Dach.

¹⁰Daut wia nuscht enne Lod, aus blooss beid Toflen, dee Moses aum Horeb nenn läd, aus de Har eenen Bunt met de Kjinja Israel muak, aus see ut Ägipten jinjen.

¹¹Un daut passieed, aus de Priesta ut däm Heilichtum rutjinjen - (dan aule Priesta, dee doa wieren, hauden sikj jeheilicht, onen de Aufdeelinj too beachte)

¹²un aus de Leviten, de Senja, see aula, nämlich Asaf, Heman, Jeduthun, un äare Säns un äare Breeda, en witte fiene Boomwoll jekjleet, met Zimmblen un met Hoapen un Fleeten aun de oost Sied vom Aultoa stunden, un bie an 120 Priesta, dee enne Trompeeten blosde,

¹³doa passieed daut, aus de Trompeeta un de Senja aus een Maun wieren, om eene Stemm hieren to loten, däm Harn too lowen un danken un aus see äare Stemm erhowen met Trompeeten un met Zimblen un Seidenspell un met däm Loff Gottes, wiels hee jnädich es, wiels siene Jnod eewich es; doa wort daut Hus, daut Hus Gottes, met eene Wolkj jefelt.

¹⁴Un de Priesta kunnen wäajen de Wolkj nich doa stonen, om däm Deenst to doonen; dan de Harlichkjeit Gottes feld daut Hus Gottes.