Read De Bibel JHF 2. Chronik 8 Bible Online

2. Chronik 8 - De Bibel JHF bible

2. Chronik 8

¹Un aum Enj von 40 Joa passieed daut, aus Salomo daut Hus Gottes un sien Hus jebut haud,

²doa bud Salomo de Städa ut, dee Huram däm Salomo jejäft haud; un hee leet de Kjinja Israel doa wonen.

³Un Salomo jinkj no Hamat-Zoba un äwawaultijd daut.

⁴Un hee bud Tadmor enne Wieste un aule Väarotsstäda, dee hee en Hamat bud.

⁵Un hee bud Bowa-Bat-Horon un Unja-Bat-Horon, fauste Städa met Miaren, Dooasch un Rijel;

⁶un Baalat un aule Väarotsstäda, dee Salomo haud; un aule Woagesstäda un aule Rittastäda; un aules, waut Salomo lost haud too buen en Jerusalem un opp däm Libanon un em gaunzen Launt siene Harschoft.

⁷Aulet Volkj, daut äwajebläwen wia von de Hetita, Amorita, Perisita, Hewita un Jebusita, dee nich von Israel wieren;

⁸äare Säns, dee em Launt äwajebläwen wieren, dee de Kjinja Israel nich vetilcht hauden, dee muak Salomo too Opploagoabeida, bat opp disem Dach.

⁹Oba ut de Kjinja Israel muak Salomo kjeene Sklowen fa siene Oabeit; sonda see wieren Kjrichslied un Bowaschte siene Aunfiera un Bowaschte siene Woages un siene Rittasch.

¹⁰Un dit sent de Bowaschte de Oppsechta, dee de Kjennich Salomo haud; 250, dee äwa daut Volkj wieren.

¹¹Un Salomo fieed däm Farao siene Dochta ut David siene Staut nopp en daut Hus, daut hee ar jebut haud; dan hee säd: Miene Fru saul nich en David sienem Hus, däm Kjennich von Israel, wonen; dan daut es heilich, en däm de Lod Gottes jekomen es.

¹²Von doa aun opfad Salomo däm Harn Brauntopfa opp däm Aultoa Gottes, däm hee ver de Haul jebut haud,

¹³un zwoa waut aun jiedrem Dach nom Jesaz Moses too opfren wia, aun de Sabaten un aun de Niemonen, un dree Mol em Joa aun de Fast; aum Fast de Onjesuade Brood un aum Fast de Wäakje un aum Fast de Loofzelte.

¹⁴Un hee bestald no de Väaschreft von sienem Voda David de Aufdeelinj de Priesta too äarem Deenst; un de Leviten too äarem Deenst, om to lowen un to deenen ver de Priesta, soo aus jieda Dach daut foddad; un de Dooawajchta un äare Aufdeelinj fa jiedret Dooa; dan aulsoo wia daut Jeboot von David, däm Maun Gottes.

¹⁵Un maun leet nich vom Kjennichsjeboot aune Priesta un aune Leviten auf, betrafs jiedre Sach un betrafs däm Schauz.

¹⁶Un aulsoo wort daut gaunze Woakj von Salomo faustjelajcht, von däm Dach aun, aus daut Hus Gottes jegrundet wort, un bat daut foadich wia. Daut Hus Gottes wia foadich.

¹⁷Donn jinkj Salomo no Ezjon-Geber un no Eloth, aum Mäaeewa em Launt Edom.

¹⁸Un Huram schekj am derch siene Kjnajchts Schäp un Kjnajchts, dee sikj oppem Mäa utkjanen. Un see kaumen met Salomo siene Kjnajchts no Ofir un holden von doa 450 Talent Golt un brochten daut nom Kjennich Salomo.