Read De Bibel JHF Esra 3 Bible Online

Esra 3 - De Bibel JHF bible

Esra 3

¹Un aus de säwenda Moonat nodakaum, un de Kjinja Israel enne Städa wieren, doa vesaumeld sikj daut Volkj aus een Maun no Jerusalem.

²Un Jeschua, Jozadak sien Sän, un siene Breeda, de Priesta, un Serubabel, Schealtiel sien Sän, un siene Breeda muaken sikj opp un buden däm Aultoa däm Gott Israels, om Brauntopfa doabowen too opfren, aus jeschräwen steit em Jesaz Moses, däm Maun Gottes.

³Un see rechten däm Aultoa opp aun siene Städ, dan een Schrakj wia opp an ver de Laundesvelkja; un see opfaden opp am Brauntopfa däm Gott, de Morjen- un de Owentopfa.

⁴Un see fiade daut Loofzelte Fast, aus daut väajeschräwen es; un see opfaden Brauntopfa Dach fa Dach, no de Zol, no de Väaschreft, waut fa jiedrem Dach väajeschräwen wia;

⁵un doano de bestendje Brauntopfa un de Niemonen un aule jeheilichde Faste Gottes, un eenem jiedren siene Brauntopfa, dee däm Harn eene friewelje Gow brocht.

⁶Aum ieeschten Dach em säwenden Moonat fungen see aun, däm Harn Brauntopfa too opfren; oba de Grunt toom Tempel Gottes wia noch nich jelajcht.

⁷Un see jeewen de Steenschnieda un de Holtoabeida Jelt, un Äten un Drinkjen un Eelj dän ut Sidon un Tierus, doamet see Zeedaholt vom Libanon nom Mäa von Jafo brinjen, aus daut an Kierus, de Kjennich von Persien, erlaubt haud.

⁸Un aum tweeden Joa no äarem Aunkomen nom Hus Gottes en Jerusalem, aum tweeden Moonat, fungen Serubabel aun, Schealtiel sien Sän, un Jeschua, Jozadak sien Sän, un äare Breeda, de Priesta un de Leviten, un aula, dee ut de Jefangenschoft no Jerusalem jekomen wieren, un see stalden de Leviten von 20 Joa un doaräwa, om däm Woakj aum Hus Gottes väatostonen.

⁹Un Jeschua, siene Säns un siene Breeda, Kadmiel un siene Säns, Juda siene Säns, stunden aus een Maun, om de Oabeida aum Hus Gottes väatostonen, uk Henadad siene Säns, äare Säns un äare Breeda, de Leviten.

¹⁰Un aus de Bulied däm Grunt toom Tempel Gottes läden, leet maun de Priesta en äare Kjleeda hankomen, met Trompeeten, un de Leviten, Asaf siene Säns, met Zimblen, om däm Harn too lowen no David siene Aunordninj, däm Kjennich von Israel.

¹¹Un see sungen un dankte däm Harn un lowden am, dan hee es Jnädich, dan siene Jnod es eewich äwa Israel. Un daut gaunze Volkj erhoow een Jubel Jeschrecht biem Loff Gottes, wiels de Grunt toom Hus Gottes jelajcht wort.

¹²Oba väle von de Priesta un de Leviten un de Heipta de Vodahiesa, de Oole, dee daut ieeschte Hus jeseenen hauden, hielden met ne lude Stemm, aus ver äare Uagen de Grunt fa dit Hus jelajcht wort; oba väle hoowen äare Stemm met Freid.

¹³Un daut Volkj kunn däm frooem Schaul nich unjascheeden vom luden Hielen em Volkj; dan daut Volkj erhoow een grootet Jubel Jeschrecht, un de Schaul wort wiet jehieet.