Read De Bibel JHF Esra 4 Bible Online

Esra 4 - De Bibel JHF bible

Esra 4

¹Un Juda un Benjamin äare Fiend hieeden, daut de Kjinja de Wajchjefieede det Harn, däm Gott Israels, eenen Tempel buden;

²un see kaumen no Serubabel un no de Heipta de Vodahiesa un säden to an: Wie wellen met junt buen; dan wie sieekjen junen Gott aus jie; un wie opfaden am von de Doag Eser-Haddon, däm Kjennich von Assierien, dee ons hiahäa nopp jebrocht haft.

³Oba Serubabel un Jeschua un de äwaje Heipta de Vodahiesa säden to an: Daut jeziemt junt nich, met ons onsem Gott een Hus too buen; sonda wie auleen wellen däm Harn, däm Gott Israels, buen, aus de Kjennich Kierus, de Kjennich von Persien, ons befoolen haft.

⁴Doa socht daut Laundesvolkj de Henj vom Volkj Juda schlaup too moaken un an vom Bu auftoschrakjen.

⁵Un see neemen sikj Rotjäwa jäajen an aun, om äaren Plon too vehindren, aule Doag Kierus, vom Kjennich von Persien, un bat to Rejierunk Darius, däm Kjennich von Persien.

⁶Un unja de Rejierunk von Ahasveros, aum Aunfank siene Rejierunk, schreewen see eene Aunkloag jäajen de Bewona von Juda un Jerusalem.

⁷Un enne Doag Artahsasta schreewen Bischlam, Mithredat, Tabeel un äare äwaje Frind aun Artahsasta, däm Kjennich von Persien. Oba de Breef wia en aramäische Schreft jeschräwen un Aramäisch oppjestalt.

⁸Rechum, de Stauthoola, un Schimschai, de Schriewa, schreewen aun Artahsasta, däm Kjennich, eenen Breef jäajen Jerusalem aulsoo:

⁹Donn schreewen Rechum, de Stauthoola, un Schimschai, de Schriewa, un äare äwaje Frind, Dinita, Afarsatkita, Tarpelita, Afarsita, Arkewita, Babulonia, Susanita, Dehita un Elamita,

¹⁰un de äwaje Velkja, dee de groota un beriemta Osnappar wajchfieed un enne Städa Samaria un enne äwaje Jäajente aun jane Sied vom Stroom wonen leet, un soo wieda.

¹¹Dit es de Oppschreft vom Breef, däm see aun am, aun däm Kjennich Artahsasta, schekjten: Diene Kjnajchts, de Mana von dise Sied von Stroom, un soo wieda.

¹²Daut saul däm Kjennich toweeten loten, daut de Juden, dee von die noppjegonen, no ons, no Jerusalem jekomen sent; see buen de oppreajende un beese Staut wada opp, un moaken de Mia foadich un bätre de Gruntloag ut.

¹³Soo es nu däm Kjennich jesajcht, daut, wan dise Staut wada oppjebut woat, un de Mia foadich es, see kjeene Opploag, Zoll un Wajchjelt nich mea jejäft woaren, un daut woat däm Kjennich Schoden brinjen.

¹⁴Wiels wie daut Solt vom Paulaust äten un ons daut nich jeziemt, däm Kjennichsschoden auntokjikjen, doawäajen schekj wie un doonen däm Kjennich daut to weeten,

¹⁵doamet maun em Buak de Chronik von diene Vodasch no kjikjt; un du woascht en däm Buak de Chronik finjen, un woascht erkjanen, daut dise Staut eene oppreajende Staut jewast es, un Kjennichs un Lenda schädlich jewast es, un daut maun von oole Tieden häa Jewault doonend doa jewast es, doawäajen es dise Staut venicht worden.

¹⁶Wie doonen däm Kjennich daut to weeten, daut, wan dise Staut wada oppjebut woat, un de Mia foadich woat, du aun dise Sied vom Stroom kjeen Deel mea haben woascht.

¹⁷De Kjennich schekjt eene Auntwuat aun Rechum, däm Stauthoola, un Schimschai, däm Schriewa un aun de äwaje Frind, dee en Samaria un en de aundre Jäajente aun jane Sied vom Stroom wonden; Fräd, un soo wieda.

¹⁸De Breef däm jie aun ons jeschekjt ha, es dietlich von mie jeläst worden.

¹⁹Un von mie es Befäl jejäft worden, un maun haft nojeforscht un jefungen, daut dise Staut von oole Tieden häa sikj jäajen de Kjennichs jestalt haft, un daut Onru un Jewault en ar begonen worden sent.

²⁰Un majchtje Kjennichs sent äwa Jerusalem jewast, dee äwa aules jeharscht ha, waut aun jane Sied vom Stroom es; un Opploag, Zoll un Wajchjelt wort an jejäft.

²¹Soo jeft nu Befäl, dise Mana too wäaren, doamet dise Staut nich wada oppjebut woat, bat von mie Befäl jejäft woat.

²²Un heed junt, en disem eenen Fäla to doonen; wuarom sull de Schoden waussen, om de Kjennichs Schoden to brinjen?

²³No däm, de Breef vom Kjennich Artasasta ver Rechum, däm Stauthoola, un Schimschai, däm Schriewa un äare Frind jeläst wia, jinjen see schwind no Jerusalem no de Juden, un wäaden an met Jewault un Macht.

²⁴Doa hieed de Oabeit aum Hus Gottes en Jerusalem opp, un stunt stell bat toom tweeden Joa de Rejierunk von Kjennich Darius von Persien.