Read De Bibel JHF Esra 5 Bible Online

Esra 5 - De Bibel JHF bible

Esra 5

¹Un Hagai, de Profeet, un Sacharja, Iddo sien Sän, de Profeeten, profezeide de Juden, dee en Juda un en Jerusalem wieren; em Nomen Gottes Israels profezeide see an.

²Doa muak sikj Serubabel opp, Schealtiel sien Sän, un Jeschua, Jozadak sien Sän, un fungen aun, daut Hus Gottes en Jerusalem too buen, un met an de Profeeten Gottes, dee an unjastäten.

³En jane Tiet kaumen Tatnai, de Launtfläaja von dise Sied vom Stroom, un Schetar-Bosnai un äare Frind no an un säden to an aulsoo: Wäa haft junt Befäl jejäft, dit Hus too buen un dise Mia uttobätren?

⁴Doaropp säd wie an de Nomes de Mana, dee disem Bu fieeden.

⁵Oba de Uagen von äarem Gott wieren äwa de Eltestasch de Juden, daut see an nich wäaden, bat de Sach aun Darius kaum un maun dan eenen Breef doaräwa trigj schekjt.

⁶De Aufschreft vom Breef, däm Tatnai, de Launtfläaja aun jane Sied vom Stroom, un Schetar-Bosnai un siene Frind, de Afarsakita, dee aun jane Sied vom Stroom wonen, aun däm Kjennich Darius jeschekjt hauden.

⁷See schekjten eenen Berecht aun am, un aulsoo wia doa jeschräwen: Darius, däm Kjennich, aulem Fräd!

⁸Daut saul däm Kjennich toweeten loten, daut wie em judischen Launt nom Hus vom groote Gott jegonen sent; un daut woat met behakte Steena jebut, un Baulkjes woaren enne Wenj jelajcht, un dise Oabeit woat iewrich jedonen, un haft jedieen unja äare Haunt.

⁹Doa ha wie de Eltestasch jefroacht un aulsoo to an jesajcht: Wäa haft junt Befäl jejäft, dit Hus too buen un dise Mia uttobätren?

¹⁰Un uk no äare Nomes ha wie an jefroacht, om die dee mettodeelen, doamet wie de Nomes de Mana oppschriewen, dee äare Heipta sent.

¹¹Un aulsoo jeewen see ons de Auntwuat un säden: Wie sent de Kjnajchts von Gott em Himmel un de Ieed, un wie buen daut Hus wada opp, daut ver väle Joaren jebut wort; un een groota Kjennich von Israel haft daut jebut un foadich jemoakt.

¹²Oba aus onse Vodasch däm Gott em Himmel jereizt hauden, haft an enne Haunt von Nebukadnezar, däm Kjennich von Babel, däm Chaldäa, jejäft, un hee haft dit Hus too Grunt jebrocht un daut Volkj no Babel wajchjefieet.

¹³Doch aum ieeschten Joa Kierus, däm Kjennich von Babel, haft de Kjennich Kierus Befäl jejäft, dit Hus Gottes wada opptobuen.

¹⁴Un uk daut goldne un selwane Jereetschoft vom Hus Gottes, daut Nebukadnezar ut däm Tempel, dee en Jerusalem wia, rutjenomen un en däm Tempel en Babel jebrocht haud, dee haft de Kjennich Kierus ut däm Tempel en Babel rutjenomen un dee eenem jejäft, däm sien Nomen Sesbazar wia, däm hee aus Launtfläaja ennsad.

¹⁵Un hee säd to am: Nemm dit Jereetschoft, go han, laj dee em Tempel, dee en Jerusalem es; un daut Hus Gottes woat wada oppjebut aun siene oole Städ.

¹⁶Doa kaum dis Sesbazar un läd däm Grunt fa daut Hus Gottes, daut en Jerusalem es; un von doa aun bat nu woat doaraun jebut, oba daut es noch nich foadich.

¹⁷Un nu, wan daut däm Kjennich rajcht es, soo lot em Kjennich sienem Schauzhus doano sieekjen, daut en Babel es, auf daut soo es, daut vom Kjennich Kierus Befäl jejäft worden es, dit Hus Gottes en Jerusalem too buen; un de Kjennich schekj ons doaräwa siene Entscheidunk.