Read De Bibel JHF Esra 6 Bible Online

Esra 6 - De Bibel JHF bible

Esra 6

¹Doa jeef de Kjennich Darius Befäl, un maun socht em Bieekjahus, woa maun däm Schauz en Babel oppbewoad.

²Un doa worden en Achmetha, enne Burjch, daut enne Launtschoft Medien licht, eene Roll jefungen; un doa wia eene Jeschicht aulsoo jeschräwen:

³Aum ieeschten Joa vom Kjennich Kierus jeef de Kjennich Kierus Befäl: Daut Hus Gottes en Jerusalem betrafs: Dit Hus saul wada oppjebut woaren aus eene Städ, woa maun Schlachtopfa opfat. Un siene Gruntloag saul oppjebut woaren; 60 Ellen huach un 60 Ellen breet;

⁴3 Rieeje von behakte Steena un eene Rieej niee Baulkjes. Un de Kosten sellen ut däm Kjennichshus jejäft woaren.

⁵Un uk daut goldne un selwane Jereetschoft vom Hus Gottes, dee Nebukadnezar ut däm Tempel, dee en Jerusalem wia, rutjenomen un no Babel jebrocht haft, saul maun trigjjäwen, daut een jiedret wada en däm Tempel no Jerusalem kjemt, aun sienem Uat; un du saust dee en däm Hus Gottes hanlajen.

⁶Dan nu, Tatnai, Launtfläaja von jane Sied vom Stroom, Schetar-Bosnai un äare Frind, de Afarsakita, dee jie aun jane Sied vom Stroom sent, got von doa wajch!

⁷Lot an aum Hus Gottes oabeiden; de Launtfläaja de Juden un de Eltestasch de Juden muchten dit Hus Gottes aun siene oole Städ wada oppbuen.

⁸Un von mie woat Befäl jejäft wäajen däm, waut jie dise Eltestasch, de Juden, fa däm Bu aun disem Hus Gottes doonen sellen; nämlich, vom Kjennichsgoot, ut de Opploag von jane Sied vom Stroom, saul dise Mana de Kosten pinkjlich jejäft woaren, doamet see nich jehindat woaren.

⁹Un waut needich es, soo aus junge Bolles, aus uk Bakj un Lama toom Brauntopfa fa däm Gott em Himmel, Weit, Solt, Wien un Eelj, daut saul an - nom Wuat de Priesta, dee en Jerusalem sent, Dach fa Dach onjehindat jejäft woaren,

¹⁰doamet see däm Gott em Himmel Opfa leeftoljen Jeroch brinjen un fa däm Kjennich sien Läwen un siene Säns bäden.

¹¹Un von mie woat Befäl jejäft; dee Mensch, dee disem Befäl aufendre woat, von däm sien Hus saul een Baulkjen rutjeräten un hee, doa aun jeschloagen un oppjehongen woaren; un sien Hus saul to eenem Mellhupe jemoakt woaren.

¹²Oba dee Gott, dee sienen Nomen doa selfst wonen lat, schmitt jiedrem Kjennich un jiedret Volkj dol, dee äare Haunt utstrakjen woaren, disem Befäl auftoendre, om dit Hus Gottes entwei too moaken, daut en Jerusalem es! Ekj, Darius, ha disem Befäl jejäft; pinkjlich saul hee utjefelt woaren!

¹³Doa deeden Tatnai, de Launtfläaja von jane Sied vom Stroom, Schetar-Bosnai un äare Frind, doa wäajen wiels de Kjennich Darius daut befoolen haud, pinkjlich aulsoo.

¹⁴Un de Eltestasch de Juden buden; un see hauden jelinjen derch de Profezeiunk von Hagai, däm Profeet, un Sacharja, Iddo sienem Sän; un see buden un worden foadich nom Befäl vom Gott Israels, un nom Befäl Kierus un Darius un Artasastas, de Kjennich von Persien.

¹⁵Un dit Hus wort foadich bat toom dredden Dach em Moonat Adar, daut es daut sas Joa de Rejierunk vom Kjennich Darius.

¹⁶Un de Kjinja Israel, de Priesta un de Leviten un de äwaje Kjinja de Wajchjefieede, fiade de Enweiunk von disem Hus Gottes met Freid.

¹⁷Un see brochten to de Enweiunk vom Hus Gottes 100 Bolles, 200 Bakj, 400 Lama; un toom Sindopfa fa gaunz Israel 12 Kosenbakj, no de Zol de Stam Israels.

¹⁸Un see stalden de Priesta no äare Aufdeelinj un de Leviten no äare Aufdeelinj toom Deenst Gottes en Jerusalem, no de Väaschreft em Buak Mose.

¹⁹Un de Kjinja de Wajchjefieede fiade daut Passa aum 14-den Dach em ieeschten Moonat.

²⁰Dan de Priesta un de Leviten hauden sikj jereinicht aus een Maun; see wieren aula rein. Un see schlachten daut Passa fa aule Kjinja de Wajchjefieede un fa äare Breeda, de Priesta, un fa sikj selfst.

²¹Un de Kjinja Israel, dee vonne Wajchjefieede trigjjekomen wieren, un een jiedra, dee sikj von de Orreinheit de Nazionen em Launt no an aufjesondat hauden, om Jahwe, däm Gott Israels, too sieekjen, auten daut Passa.

²²Un see fiade daut Fast de Onjesuade Brood säwen Doag met Freid; dan de Har haud an Freid jejäft un daut Kjennichshoat von Assierien no an jedreit, soo daut hee äare Henj stoakjt em Woakj vom Hus Gottes, däm Gott Israels.