Read De Bibel JHF Esra 7 Bible Online

Esra 7 - De Bibel JHF bible

Esra 7

¹Un no dise Jeschichte, unja de Rejierunk Artahsasta, däm Kjennich von Persien, jinkj Esra, Seraja sien Sän, vom Sän Asarja, vom Sän Hilkija,

²vom Sän Schallum, vom Sän Zadok, vom Sän Ahitub,

³vom Sän Amarja, vom Sän Asarja, vom Sän Merajot,

⁴vom Sän Serachja, vom Sän Ussi, vom Sän Bukki,

⁵vom Sän Abischua, vom Sän Pinehas, vom Sän Eleasar, vom Sän Aaron, dän bowaschten Priesta, -

⁶disa Esra jinkj von Babel; un hee wia een Schreftjelieeda em Jesaz Moses, daut Gott, de Gott Israels, jejäft haud. Un wiels de Haunt Gottes, sienem Gott, äwa am wia, jeef am de Kjennich no aul sienem Velangen.

⁷Un daut jinjen met am eenje von de Kjinja Israel un von de Priesta un de Leviten un de Senja un de Dooawajchta un de Tempeldeena nopp no Jerusalem, aum säwenden Joa vom Kjennich Artasasta.

⁸Un hee kaum no Jerusalem em feften Moonat, daut wia daut säwende Joa vom Kjennich.

⁹Dan aum ieeschten Dach em ieeschten Moonat haud hee dän Aufgank von Babel faustjelajcht; un aum ieeschten em feften Moonat kaum hee no Jerusalem, wiels de goode Haunt von sienem Gott äwa am wia.

¹⁰Dan Esra haud sien Hoat doaropp jerecht, daut Jesaz Gottes to forschen un to doonen, un en Israel Sazunk un Rajcht to lieren.

¹¹Un dit es de Aufschreft vom Breef, däm de Kjennich Artasasta däm Priesta Esra, däm Schreftjelieeden, jeef, dän Schreftjelieeden enne Wieed de Jebooten Gottes un siene Sazungen fa Israel:

¹²Artasasta, Kjennich äwa de Kjennichs, Esra, däm Priesta, däm Schreftjelieeden em Jesaz Gottes vom Himmel, un soo wieda.

¹³Von mie woat Befäl jejäft, daut een jiedra en mienem Rikj, von däm Volkj Israel un siene Priesta un de Leviten, dee wellich es, no Jerusalem too gonen, met die gonen mucht.

¹⁴Wiels du vom Kjennich un siene 7 Rotjäwa jeschekjt woascht, om eene Unjasieekjunk äwa Juda un Jerusalem auntostalen, nodäm Jesaz von dienem Gott, daut en diene Haunt es,

¹⁵un daut Selwa un daut Golt hantobrinjen, daut de Kjennich un sien Rot däm Gott Israels, dee siene Wonunk en Jerusalem haft, friewellich jejäft ha,

¹⁶soo aus aulet Selwa un Golt, daut du em gaunzen Launt Babel kjrieen woascht, buta de friewelje Gow vom Volkj un de Priesta, dee friewellich jäwen fa daut Hus von junem Gott, daut en Jerusalem es;

¹⁷doawäajen kjeep jewessenhauft fa dit Jelt Bolles, Bakj, Lama, un äare Speisopfa un äare Drinkjopfa, un Opfa dee doa oppem Aultoa bie däm Hus von junem Gott, daut en Jerusalem es.

¹⁸Un waut die un diene Breeda met däm äwajen Selwa un Golt to doonen jefelt, daut doot nom Wellen von junem Gott.

¹⁹Un daut Jereetschoft, daut die toom Deenst em Hus von dienem Gott jejäft worden es, brinj daut ver däm Gott en Jerusalem.

²⁰Un waut sest noch aum Hus von dienem Gott needich sennen woat, waut die biefelt uttojäwen, saust du ut däm Kjennich sienem Schauzhus utjäwen.

²¹Un von mie, däm Kjennich Artasasta, woat aun aule Schauzmeista aun jane Sied vom Stroom Befäl jejäft, daut aules, waut Esra, de Priesta, de Schreftjelieeda em Jesaz Gottes vom Himmel, von junt fodren woat, pinkjlich jedonen woat,

²²bat 100 Talent Selwa un bat 100 Kor Weit un bat 100 Bat Wien un bat 100 Bat Eelj, un Solt onen Mot.

²³Aules, waut nom Befäl von Gott vom Himmel es, saul fa daut Hus Gottes vom Himmel sorjfeltich jedonen woaren; dan wuarom sull een Oaja äwa daut Kjennichrikj un siene Säns komen?

²⁴Un jie sellen weeten, daut kjeena daut Rajcht haft, aule Priesta un Leviten, Senja, Dooawajchta, Tempeldeena un Deena en disem Hus Gottes Opploag, Zoll un Wajchjelt opptolajen.

²⁵Oba du, Esra, bestal no de Weisheit von dienem Gott, dee en die es, Rechta un Rajchtfläaja, dee aulet Volkj rechten sellen, daut aun jane Sied vom Stroom es, aule dee, dee Jesazen von dienem Gott kjanen; un däm, dee de nich kjant, dän sell jie unjarechten.

²⁶Un een jiedra, dee daut Jesaz von dienem Gott un daut Kjennichsjesaz nich doonen woat, aun däm saul jewessenhauft Jerecht jeeeft woaren, daut es toom Doot, ooda too Vebauninj, ooda too ne Jelt strof, ooda toom Jefenkjnis.

²⁷Jeloft es de Har, de Gott onse Vodasch, dee daut en Kjennichshoat jejäft haft, om daut Hus Gottes too veharlichen, daut en Jerusalem es,

²⁸un dee mie Jnod jejäft haft ver däm Kjennich un sienem Rot un aule jewaultje Kjennichsferschte! Un soo fot ekj Moot, wiels de Haunt Gottes, von mienem Gott, äwa mie wia, un ekj vesaumeld Heipta ut Israel, daut see met mie noppjinjen.