Read De Bibel JHF Esra 8 Bible Online

Esra 8 - De Bibel JHF bible

Esra 8

¹Un dit sent de Heipta de Vodahiesa un äa Jeschlajchtsrejista, nämlich dee, dee unja de Rejierunk vom Kjennich Artahsasta met mie ut Babel noppjinjen.

²Von de Säns Pinehas: Gersom; von de Säns Ithamar: Daniel; von de Säns von David: Hattusch;

³von de Säns Schekanja, von de Säns Parhosch: Sekarja, un met am wieren oppjeschräwen 150 Menliche;

⁴von de Säns Pachat-Moab: Eljoenai, de Sän von Serachja, un met am 200 Menliche;

⁵von de Säns Schekanja: De Sän von Jachasiel, un met am 300 Menliche;

⁶un von de Säns Adin: Ebed, de Sän von Jonatan, un met am 50 Menliche;

⁷un von de Säns Elam: Jesaja, de Sän von Atalja, un met am 70 Menliche;

⁸un von de Säns Schefatja: Sebadja, de Sän von Michael, un met am 80 Menliche;

⁹un von de Säns Joab: Obadja, de Sän von Jechiel, un met am 218 Menliche;

¹⁰un von de Säns Schelomit: De Sän von Josifja, un met am 160 Menliche;

¹¹un von de Säns Bebai: Sekarja, de Sän von Bebai, un met am 28 Menliche;

¹²un von de Säns Asgad: Jochanan, de Sän von Hakkatan, un met am 110 Menliche;

¹³un von de Säns Adonikam: De latste, un dit sent äare Nomes: Elifelet, Jeghiel un Schemaja, un met an 60 Menliche;

¹⁴un von de Säns Bigwai: Uthai un Sabbud, un met an 70 Menliche.

¹⁵Un ekj vesaumeld an aum Fluss, dee no Ahawa rant; un wie loagaden doa dree Doag. Un ekj kjikjt mie om unja däm Volkj un unja de Priesta, un ekj funk doa kjeenem von de Säns Levi.

¹⁶Doa schekjt ekj no Elieser, Ariel, Schemaja un Elnathan un Jarib un Elnathan un Nathan un Sekarja un Meschullam, de Heipta, un Jojarib un Elnathan, de Liera,

¹⁷un schekjt an no Iddo, däm Bowaschten em Uat Kasifja, un ekj läd an Wieed em Mul, om met Iddo un siene Breeda to räden, de Tempeldeena, em Uat Kasifja, doamet see ons Deena fa daut Hus von onsem Gott brochten.

¹⁸Un see brochten ons, wiels de goode Haunt von onsem Gott äwa ons wia, eenen kluaken Maun von de Säns Machli, de Sän von Levi, vonne Säns Israels; un Scherebja un siene Säns un siene Breeda, 18 Maun;

¹⁹un Haschabja un met am Jesaja, von de Säns Merari, siene Breeda un siene Säns, 20;

²⁰un von de Tempeldeena, dee David un de Eltestasch toom Deenst de Leviten jejäft hauden; 220 Tempeldeena; see aula wieren met Nomen aunjejäft.

²¹Un ekj roopt doa aum Fluss Ahawa, een Fausten ut, om ons ver onsem Gott too deemutje, om von am eenen jlekjlichen Wajch fa ons un onse Kjinja un fa ons Hab un Goot too bedden.

²²Dan ekj schämd mie, vom Kjennich een Häa un Rittasch too fodren, om ons jäajen däm Fiend oppem Wajch bietostonen; dan wie hauden toom Kjennich jerät un jesajcht: De Haunt von onsem Gott es äwa aule, dee am sieekjen, toom Gooden; oba siene Macht un sien Oaja sent jäajen aule, dee am veloten.

²³Un soo deed wie fausten un bedden dit von onsem Gott; un hee erhieed ons.

²⁴Un ekj sondad 12 Priesta auf; Scherebja, Haschabja, un met an 10 von äare Breeda;

²⁵un ekj wuag an daut Selwa un daut Golt un daut Jereetschoft auf, daut Häwopfa fa daut Hus von onsem Gott, daut de Kjennich un sien Rot un siene Ferschten un gaunz Israel, daut doa wia, jeschenkjt hauden.

²⁶Un ekj jeef an en äare Haunt: 650 Talent Selwa; un selwanet Jereetschoft 100 Talent; un aun Golt 100 Talent;

²⁷un 20 goldne Kuffels to 1 000 Dariken; un 2 vom Jereetschoft von blanket, goodet Koppa, kostboa aus Golt.

²⁸Un ekj säd to an: Jie sent däm Harn heilich, un daut Jereetschoft es heilich; un daut Selwa un daut Golt es eene friewelje Gow fa däm Harn, däm Gott june Vodasch.

²⁹Soo woakt un bewoat daut, bat jie daut ver de Bowaschte de Priesta un de Leviten un de Bowaschte de Vodahiesa Israels en Jerusalem brinjen, en de Zelten vom Hus Gottes.

³⁰Un de Priesta un de Leviten neemen daut aufjewoagne Selwa un Golt un daut Jereetschoft, om daut no Jerusalem en daut Hus von onsem Gott to brinjen.

³¹Un wie jinjen loos von däm Fluss Ahawa aum 1tweeden em ieeschten Moonat, om no Jerusalem too gonen; un de Haunt von onsem Gott wia äwa ons, un hee rad ons von de Haunt de Fiend un dee aum Wajch opp ons luaden.

³²Un wie kaumen no Jerusalem un bleewen doa dree Doag.

³³Un aum vieeden Dach wort daut Selwa un daut Golt un daut Jereetschoft em Hus von onsem Gott aufjewoage enne Haunt von Meremot, däm Sän von Uria, däm Priesta, un met am wia Eleasar, Pinehas sien Sän, un met an Josabad, Jeschua sien Sän, un Noadja, Binnui sien Sän, de Leviten, -

³⁴aules no de Zol, nom Jewicht von aulem; un daut gaunze Jewicht wort donn oppjeschräwen.

³⁵Dee Jekomne ut de Jefangenschoft, de Kjinja de Wajchjefieede, brochten däm Gott Israels Brauntopfa; 12 Bolles fa gaunz Israel, 96 Bakj, 77 Schop, un 12 Kosenbakj toom Sindopfa, daut gaunze aus Brauntopfa däm Harn. -

³⁶Un see äwajeewen däm Befäl vom Kjennichsstauthoola un de Launtfläaja von dise Sied vom Stroom; un dise unjastetten daut Volkj un daut Hus Gottes.