Read De Bibel JHF Nehemia 1 Bible Online

Nehemia 1 - De Bibel JHF bible

Nehemia 1

¹De Jeschichte von Nehemia, Hakalja sienem Sän. Un daut passieed aum Moonat Kislew [de dredde Moonat] em 20-sten Joa, aus ekj enne Hauptstaut Susan wia,

²doa kaum Hanani, eena von miene Breeda, hee un eenje Mana ut Juda. Un ekj fruach an no de Juden, de Wajchjeranden, dee von de Jefangenschoft äwajebläwen wieren, un no Jerusalem.

³Un see säden to mie: De Äwajebläwne, dee vonne Jefangenschoft doa em Launt äwajebläwen sent, sent en grootem Onjlekj un en Schmach; un de Mia von Jerusalem es doljeräten, un siene Dooasch met Fia vebrent.

⁴Un daut passieed, aus ekj dise Wieed hieed, sad ekj mie han un hield un wia Truarich eenje Doag lank; un ekj faust un bäd ver däm Gott em Himmel un säd:

⁵Ach, Har, Gott em Himmel, du, de groota un schrakjelja Gott (El), dee däm Bunt un de Jnod dän bewoat, dee am leewen un siene Jebooten hoolen;

⁶lot diene Uaren oppmoakjen un diene Uagen op sennen, daut du hieescht daut Jebäd von dienem Kjnajcht, daut ekj vondoag, Dach un Nacht, fa de Kjinja Israel, diene Kjnajchts, ver die bäd, un soo aus ekj de Sinden de Kjinja Israel bekjan, dee wie jäajen die begonen ha! Uk wie, ekj un mien Vodahus, ha jesindicht.

⁷Wie ha sea beeshauft jäajen die jehaundelt un ha de Jebooten un de Sazungen un de Rajchte nich jehoolen, dee du dienem Kjnajcht Moses befoolen hast.

⁸Denkj doch aun daut Wuat, daut du dienem Kjnajcht Moses befoolen hast, endäm du sädst: Wan jie ontru haundlen, soo woa ekj junt unja de Velkja vestreien;

⁹oba drei jie no mie trigj un miene Jebooten hoolen un dee doonen: Sellen june Vestade aum Himmelsenj sennen, soo wudd ekj an von doa saumlen un an aun däm Uat brinjen, däm ekj erwält ha, om mienem Nomen doa selfst wonen to loten!

¹⁰Jo, see sent diene Kjnajchts un dien Volkj, daut du derch diene groote Krauft un diene stoakje Haunt erleest hast.

¹¹Ach, Har, lot doch dien Ua oppmoakjsom sennen opp daut Jebäd von dienem Kjnajcht un opp daut Jebäd diene Kjnajchts, dee Jefaulen doaraun ha, dienem Nomen too ferchten; un lot daut doch dienem Kjnajcht vondoag jelinjen un jeff am Erboarmen ver disem Maun! Ekj wia nämlich Mulschenkj vom Kjennich.