Read De Bibel JHF Nehemia 3 Bible Online

Nehemia 3 - De Bibel JHF bible

Nehemia 3

¹Un Eljaschib, de Huagapriesta, un siene Breeda, de Priesta, muaken sikj opp un buden daut Schopsdooa; see heilijde daut un saden siene Däaren en. Un see heilijde daut bat aun däm Torm Mea, bat aun däm Torm Hananel.

²Un aun siene Sied buden de Mana von Jericho. Un aun äare Sied bud Sakkur, Imri sien Sän.

³Un daut Feschdooa buden Senaa siene Säns; see dakjten daut met Baulkjes un saden de Däaren en, siene Schläd un siene Rijel.

⁴Un aun äare Sied bätad Meremot ut, Uria sien Sän, vom Sän Hakkoz. Un aun siene Sied bätad Meschullam ut, Berekja sien Sän, vom Sän Meschesabeel. Un aun siene Sied bätad Zadok ut, Baana sien Sän.

⁵Un aun siene Sied bätad de Tekoita ut; oba de Väanämen unja an buagen äa Jenekj nich toom Deenst fa äarem Harn.

⁶Un daut Dooa de oole Mia bätad Jojada ut, Paseach sien Sän, un Meschullam, Besodja sien Sän; see dakjten daut met Baulkjes un saden äare Däaren en, siene Schläd un siene Rijel.

⁷Un aun äare Sied bätad Melatja, de Gibeonita, un Jadon, de Meronotita, Mana von Gibeon un Mizpa, jäajen däm Jerechtsstool han vom Launtfläaja aun dise Sied vom Stroom.

⁸Aun äare Sied bätad Ussiel ut, Harchaja sien Sän, de Goldschmett. Un aun siene Sied bätad Hananja ut, von de Saulwmischa. Un see plostade Jerusalem bat aune breede Mia, aus daut jewast wia.

⁹Un aun siene Sied bätad Refaja ut, Hur sien Sän, de Bowaschta vom haulwen Stautdeel von Jerusalem.

¹⁰Un aun siene Sied bätad Jedaja ut, Harumaf sien Sän, un zwoa sienem Hus jäajenäwa. Un aun siene Sied bätad Hattusch ut, Haschabneja sien Sän.

¹¹Malkija, Harim sien Sän, un Haschub, Pachat-Moab sien Sän, bätade eene aundre Strakj ut un däm Owetorm.

¹²Un aun äare Sied bätad Schallum ut, Hallochesch sien Sän, de Bowaschta von de aundre halft vom Stautdeel von Jerusalem, hee un siene Dajchta.

¹³Daut Läachtdooa bätad Hanun ut un de Bewona von Sanoach; see buden daut un saden siene Däaren un siene Schläd un siene Rijel en, un buden 1000 Ellen aune Mia bat nom Mestdooa.

¹⁴Un daut Mestdooa bätad Malkija ut, Rechab sien Sän, de Bowaschta vom Kjreiss Bat-Kerem; hee bud daut un sad siene Däaren un siene Schläd un siene Rijel en.

¹⁵Un daut Kjwaldooa bätad Schallun ut, Kol-Hoses sien Sän, de Bowaschta vom Kjreiss Mizpa; hee bud daut un äwadakjt daut un sad siene Däaren un siene Schläd un siene Rijel en; un hee bud de Mia aum Läch Siloa biem Kjennichsgoaden un bat de Stoopen, dee von David siene Staut rauf jinjen.

¹⁶No am bätad Nehemia ut, Asbuk sien Sän, de Bowaschta vom haulwen Stautdeel von Bat-Zur, bat jäajenäwa von David siene Jräwa un bat däm Läch, dee aunjelajcht wia, un bat nom Hus de Helden.

¹⁷Bie am bätade de Leviten ut, Rechum, Bani sien Sän. Aun siene Sied bätad Haschabja ut, de Bowaschta vom haulwen Kjreiss von Keila, fa sienem Kjreiss.

¹⁸No am bätade äare Breeda ut, Bawai, Henadad sien Sän, de Bowaschta von de aundre Halft vom Kjreiss von Keila.

¹⁹Un aune Sied von am bätad Eser, Jeschua sien Sän, de Bowaschta von Mizpa, eene aundre Strakj ut, jäajenäwa däm noppgonen enne Akj nom Jewäahus.

²⁰No am bätad Baruch, Sabbai sien Sän, eene aundre Strakj ut, vonne Akj bat nom Engank en Eljaschib sien Hus, däm Huagapriesta.

²¹No am bätad Meremot, Uria sien Sän, vom Sän Hakkoz, eene aundre Strakj ut, vom Engank von Eljaschib sienem Hus bat toom Enj von Eljaschib sienem Hus.

²²No am bätade de Priesta ut, de Mana de Jordan Jäajent.

²³No an bätade Benjamin un Haschub ut, äarem Hus jäajenäwa. No an bätad Asarja ut, Maaseja sien Sän, vom Sän Ananja, bie sienem Hus.

²⁴No am bätad Binnui, Henadad sien Sän, eene aundre Strakj ut, von Asarja sienem Hus bat aum Winkjel un bat aune Akj.

²⁵Palal, Usai sien Sän, bätad jäajenäwa däm Winkjel un däm Torm ut, dee biem Kjennichshus väasteit, dee biem Jefenkjnis oppem Hoff es. No am Pedaja, Parhosch sien Sän.

²⁶De Tempeldeena wonden oppem Ofel bat jäajenäwa däm Wotadooa nom Oosten un däm rut jebudem Torm.

²⁷No am bätade de Tekoita eene aundre Strakj ut, von däm groote rut jebudem Torm jäajenäwa un bat no de Ofel Mia.

²⁸Vom Pieeds`Dooa bätade de Priesta ut, een jiedra jäajenäwa von sienem Hus.

²⁹No an bätad Zadok ut, Immer sien Sän, sienem Hus jäajenäwa. No am bätad Schemaja ut, Schekanja sien Sän, de Wajchta vom Oostdooa.

³⁰No am bätad Hananja, Schelemja sien Sän, un Hanun, Zalaf sien sasta Sän, eene aundre Strakj ut. No am bätad Meschullam ut, Berekja sien Sän, siene Wonunk jäajenäwa.

³¹No am bätad Malkija ut, de Sän vom Goldschmett, bat aum Hus de Tempeldeena un de Saulwmischa, däm Tempeldeena (Mifkad) jäajenäwa un bat aune Bowastowen enne Akj.

³²Un tweschen de Akj Bowastowen un däm Schopsdooa bätade de Goldschmetts un de Saulwmischa ut.

³³Un daut passieed, aus Sanballat hieed, daut wie de Mia buden, doa wort hee oajalich un oajad sikj sea. Un hee spott äwa de Juden -

³⁴un räd ver siene Breeda un däm Häa von Samaria un säd: Waut moaken de onmajchtje Juden? Woat maun an tooloten? Woaren see opfren? Woaren see daut eenes Doages foadich haben? Woaren see de Steena ut däm Mellhupe wada läwendich moaken, doa dee doch vebrent sent?

³⁵Un Tobija, de Amonita, stunt bie am un säd: Waut see uk buen; wan een Foss noppjeit, soo wudd hee äare steenane Mia uteenaunda rieten!

³⁶Hea, ons Gott, dan wie sent too Veachtunk jeworden; un brinj äa Spott opp äarem Kopp trigj, un jeff an däm Raup en eenem Launt de Jefangenschoft han!

³⁷Un dakj äare Ojjerajchtichkjeit nich too, un äare Sinden woaren nich ver dienem Aunjesecht utjelascht! Dan see ha die ver de Bulied jereizt.

³⁸Oba wie buen aune Mia wieda; un de gaunze Mia wort bat de Halft foadich, un daut Volkj haud Moot to oabeiden.