Read De Bibel JHF Nehemia 4 Bible Online

Nehemia 4 - De Bibel JHF bible

Nehemia 4

¹Un daut passieed, aus Sanballat un Tobija un de Araba un de Amonita un de Asdodita hieeden, daut de Bu de Mia von Jerusalem too neem, un de Lajcha toojemoakt worden, doa worden see sea oajalich.

²Un see schwuare sikj aula metenaunda, too komen, om jäajen Jerusalem too strieden un doabennen Vewerrunk auntorechten.

³Doa bäd wie too onsem Gott un stalden ut Angst fa an Dach un Nacht Wajchta jäajen an opp.

⁴Un Juda säd: De Krauft de Laustdroaga woat weinja, un Mell es väl, wie kjennen nich aune Mia buen.

⁵Oba onse Jäajna säden: See sellen daut nich weeten, uk nich seenen, bat wie medden unja an komen un an schlonen un däm Woakj een Enj moaken.

⁶Un daut passieed, aus de Juden, dee bie an wonden, kaumen un ons mol 10 säden, ut aule Uaten häa: [Komt trigj no ons!]

⁷Doa stald ekj aun de läaje Städen hinja de Mia aum ladjen Plauz - doa stald ekj daut Volkj no de Jeschlajchta opp, met äare Schwieets, äare Schilda un äare Boages.

⁸Un ekj kjikjt too un muak mie opp un säd to dee Adelje un de Väastona un toom äwajen Volkj: Enjst junt nich ver an! Denkjt aum Harn, däm groote un schrakjlichen, un stried fa june Breeda, june Säns un Dajchta, june Frues un june Hiesa!

⁹Un daut Passied, aus onse Fiend hieeden, daut wie daut wisten, un daut Gott äa Rot tonicht jemoakt haud, doa jinj wie aula trigj no de Mia, een jiedra aun sien Woakj.

¹⁰Un aun janem Dach passieed daut, daut de Halft miene Deena aum Woakj oabeiden, aus de aundre Halft de Spiessen, Schilda, Boages un Brostschilda hild; un de Bowaschte wieren hinja däm gaunzen Hus Juda,

¹¹daut aune Mia bud. Un de Laustdroaga druagen, met eene Haunt de Oabeit aum Woakj, un met de aundre hilden see de Jewäaren.

¹²Un de Bulied hauden een jiedra sien Schwieet om siene Lenden jebungen un buden. Un dee, dee enne Posaun blosd, stunt bie mie.

¹³Un ekj säd to de Adelje un to de Väastona un toom äwajen Volkj: Daut Woakj es groot un wiet, un wie sent oppe Mia vestreit, wiet auf von eenaunda.

¹⁴Aun däm Uat woa jie de Posaunenschaul hieren woaren, doa vesaumelt junt om ons. Ons Gott woat fa ons strieden!

¹⁵Soo oabeid wie aum Woakj, un de Halft von an hild de Spiessen vom Oppgank de Morjenroot aun, bat de Stierns väakaumen.

¹⁶Uk aun dee selje Tiet säd ekj toom Volkj: Een jiedra äwanacht met sienem Deena en Jerusalem, soo daut see ons bie de Nacht Wache un Äwadach aum Woakj deenden.

¹⁷Un ekj, noch miene Breeda, noch miene Deena, noch de Wajchta, dee bie mie wieren, trocken onse Kjleeda ut; een jiedra haud sien Jewäa aun siene Rajchte.