Read De Bibel JHF Nehemia 8 Bible Online

Nehemia 8 - De Bibel JHF bible

Nehemia 8

¹Un aus de säwenda Moonat noda kaum un de Kjinja Israel en äare Städa wieren, doa vesaumeld sikj daut gaunze Volkj aus een Maun oppem Plauz, dee ver däm Wotadooa es. Un see säden to Esra, däm Schreftjelieeden, daut hee daut Jesazbuak Moses brinjen sull, daut de Har Israel jejäft haud.

²Un aum ieeschten Dach aum säwenden Moonat brocht Esra, de Priesta, daut Jesaz ver de Jemeent, ver de Mana un Frues, un ver aule, dee daut vestonen kunnen, om tootohieren.

³Un hee laus doarut oppem Plauz, dee ver däm Wotadooa es, von tiedich Zemorjes bat Meddach, ver de Mana un Frues un dee, dee daut vestonen kunnen; un de Uaren vom gaunzen Volkj wieren opp daut Jesazbuak jerecht.

⁴Un Esra, de Schreftjelieeda, stunt opp eenem heltanen Jerest, daut maun doatoo jebut haud. Un bie am stunden Matitja un Schema un Anaja un Uria un Hilkija un Maaseja, aun siene Rajchte; un aun siene Linkje Pedaja un Mischael un Malkija un Haschum un Haschbadana un Secharja un Meschullam.

⁵Un Esra muak daut Buak ver däm gaunzen Volkj op, dan hee stunt hecha aus daut gaunze Volkj; un aus hee daut op muak, stunt daut gaunze Volkj opp.

⁶Un Esra lowd Gott, däm groote Gott, un daut gaunze Volkj auntwuad: Amen, Amen! Endäm see äare Henj opphoowen un sikj venäjde un schmeeten sikj ver däm Harn han, met äarem Aunjesecht oppe Ieed.

⁷Un Jeschua, Bani, Scherebja, Jamin, Akkub, Schabbetai, Hodija, Maaseja, Kelita, Asarja, Josabad, Hanan, Pelaja un de Leviten belieeden daut Volkj äwa daut Jesaz; un daut Volkj stunt opp siene Städ.

⁸Un see läsden em Buak, em Jesaz Gottes, dietlich, un jeewen däm Senn aun, soo daut maun daut Jeläsne vestunt.

⁹Un Nehemia, daut es de Launtfläaja, un Esra, de Priesta, de Schreftjelieeda, un de Leviten, dee daut Volkj belieeden, räden toom gaunzen Volkj: Dis Dach es däm Harn, junem Gott, heilich; siet nich truarich un hielt nich! Dan daut gaunze Volkj hield, aus daut de Wieed ut däm Jesaz hieed.

¹⁰Un hee säd to an: Got han, ät Fatet un drinkjt Seetet, un schekjt Deele dän, fa dän nich reedjemoakt es; dan de Dach es onsem Harn heilich; un siet nich truarich, dan de Freid aun Gott es june Krauft.

¹¹Un de Leviten beruijden daut gaunze Volkj, endäm see säden: Siet stell, dan de Dach es heilich; un siet nich truarich!

¹²Un daut gaunze Volkj jinkj han, om to äten un to drinkjen un Deele too schekjen un een grootet Freidensfast too fieren. Dan see hauden de Wieed vestonen, dee maun an vekjindicht haud.

¹³Un aum tweeden Dach vesaumelden sikj de Heipta de Vodahiesa vom gaunzen Volkj, de Priesta un de Leviten, no Esra, däm Schreftjelieeden, daut hee an enne Jesazeswieed unjarecht.

¹⁴Un see fungen em Jesaz jeschräwen, daut Gott derch Moses befoolen haud, daut de Kjinja Israel aum Fast em säwenden Moonat en Loofzelten wonen sullen,

¹⁵un daut see vekjindjen un en aul äare Städa un derch Jerusalem utroopen un sajen: Got rut oppe Boaj un hoolt Asta von Eeljbeem un Asta von wille Eeljbeem un Mirren Asta Paulm Asta un Asta von dichte Beem, om Zelten too moaken, aus jeschräwen steit!

¹⁶Un daut Volkj jinkj rut un holden Asta; un see muaken sikj Zelten, een jiedra opp sienem Dak un oppe Häw, un oppe Häw vom Hus Gottes, un oppem Plauz aum Wotadooa, un oppem Plauz aum Efraimdooa.

¹⁷Un de gaunze Jemeent, dee ut de Jefangenschoft trigj jekomen wia, muak Zelten un wond enne Zelten. Dan de Kjinja Israel hauden soo nich jedonen von de Doag Josua, däm Sän Nuns, bat opp disem Dach. Un daut wia eene sea groote Freid.

¹⁸Un maun laus em Jesazbuak Gottes Dach fa Dach, vom ieeschten Dach bat toom latsten Dach. Un see fiade daut Fast säwen Doag lank; un aum achten Dach wia eene Fastvesaumlung no de Väaschreft.