Read De Bibel JHF Nehemia 9 Bible Online

Nehemia 9 - De Bibel JHF bible

Nehemia 9

¹Un aum 24-sten Dach en disem Moonat vesaumelden sikj de Kjinja Israel met Fausten, un en Sakduak jekjleet, un met Ieed opp äare Heipta.

²Un de Somen Israels sondad sikj von aule Kjinja de Framde auf; un see kaumen un bekjanen äare Sinden un de Misdoten äare Vodasch.

³Un see stunden opp äare Städ un läsden em Jesazbuak Gottes, äarem Gott, een vieedel vom Dach. Un een aundret vieedel vom Dach bekjanen see äare Sinden un schmeeten sikj ver Gott han, äarem Gott.

⁴Un Jeschua, Bani, Kadmiel, Schebanja, Bunni, Scherebja, Bani un Kenani stieejen oppem heltanen Jerest woa de Leviten stunden, un see schrieejen met ne lude Stemm toom Harn, äarem Gott.

⁵Un de Leviten Jeschua, Kadmiel, Bani, Haschabneja, Scherebja, Hodija, Schebanja un Petachja säden: Stot opp, loft däm Harn, junem Gott, von Eewichkjeit too Eewichkjeit! Un maun loft dienen harlichen Nomen, dee äwa aule Veharlichunk un Riem erhowen es!

⁶Du best, dee doa es, Gott, du auleen; du hast de Himmel jemoakt, de Himmel Himmel un aul äa Häa, de Ieed un aules, waut doabowen es, daut Mäa un aules, waut en an es. Un du moakst daut aules läwendich, un daut Himmelshäa bäd die aun.

⁷Du best daut, Jahwe, Gott, dee du Abram erwält un am ut Ur en Chaldäa rutjefieet, un am däm Nomen Abraham jejäft hast.

⁸Un du hast sien Hoat tru ver die jefungen un hast met am däm Bunt jemoakt, daut Launt de Kanaanita, de Hetita, de Amorita, de Perisita, un Jebusita un Girgasita to jäwen - sienem Somen daut to jäwen; un du hast dien Wuat jehoolen, dan du best jerajcht.

⁹Un du hast daut Älent onse Vodasch en Ägipten jeseenen, un hast äa Jeschrecht aum Schelpmäa jehieet.

¹⁰Un du hast Tieekjen un Wunda jedonen aum Farao un aun aul siene Kjnajchts un aun aul sienem Laundesvolkj; dan du wist daut, daut see en Äwamoot jäajen an jehaundelt hauden; un du hast die eenen Nomen jemoakt, aus daut aun disem Dach es.

¹¹Un daut Mäa hast du ver an jespoolt, un see jinjen medden derch daut Mäa oppem Drieejen; oba äare Vefolja hast du em Deepen jeschmäten, aus eenen Steen en groote Wotasch.

¹²Un en eenem Wolkjestenda hast du an äwadach un denacht en eenem Fiastenda jefieet, om an däm Wajch too bedache, opp däm see gonen sullen.

¹³Un opp däm Boajch Sinai best du raufjekomen, un hast vom Himmel häa met an jerät; un du hast an woarhaufte Rajchte un Jesazen de Woarheit, goode Sazungen un Jebooten jejäft.

¹⁴Un dienen heiljen Sabat hast du an jejäft, un hast an Jebooten un Sazungen un een Jesaz befoolen derch Moses, dienem Kjnajcht.

¹⁵Un Broot vom Himmel hast du an jejäft fa äa Hunga, un Wota ut däm Steen fa äarem Darscht jejäft; un du hast an befoolen, daut see nenn gonen sullen, om daut Launt aus Ieejentum too nämen, daut du an jeschwuaren hast, to jäwen.

¹⁶Oba see, onse Vodasch, wieren äwamootich, un see vehoaden äa Jenekj un hieeden nich opp diene Jebooten.

¹⁷Un see wäaden sikj die too jehorchen, un dochten nich aun diene Wunda, dee du an jedonen haudst; see muaken äa Jenekj stiew un saden sikj en äare Wadaspanstichkjeit een Haupt, om no äare Kjnajchtschoft trigjtokomen. Oba du best een vezeihenda Gott, jnädich un boarmhoatich, langsom toom Oaja un groot aun Jnod, un du veleetst an nich.

¹⁸Soogoa aus see sikj een jegotnet Kaulf muaken un säden: Daut es dien Gott, dee die ut Ägipten noppjefieet haft! Un deed groote Lestrunge,

¹⁹du veleetst an en diene groote Erboarmunk uk enne Wieste nich. De Wolkjestenda jinkj nich von an äwadach, om an oppem Wajch too leiden, noch de Fiastenda denacht, om an däm Wajch too bedache, opp däm see gonen sullen.

²⁰Un du jeefst an dienen gooden Jeist, om an too belieren; un dien Mauna neemst du nich von äarem Mul, un du jeefst an Wota fa äarem Darscht.

²¹Un 40 Joa lank vesorjsd du an enne Wieste, see hauden kjeen Mangel; äare Kjleeda vefollen nich, un äare Feet schwolle nich aun.

²²Un du jeefst an Kjennichrikjs un Velkja un vedeelsd an no Jäajenden; un see neemen daut Launt Sihon en, soo aus daut Launt vom Kjennich von Hesbon, aus uk daut Launt Og, vom Kjennich von Baschan.

²³Un äare Säns vemeaschd du aus de Stierns aum Himmel; un du brochst an en daut Launt, von däm du äare Vodasch jesajcht haudst, daut see nengonen sullen, om daut entonämen;

²⁴un de Säns kaumen nenn un naumen daut Launt en. Un du buagst ver an de Laundesbewona, de Kanaanita, un jeefst an en äare Haunt, soo aus äare Kjennichs aus uk de Laundesvelkja, om met an no äarem Jefaulen to doonen.

²⁵Un see neemen fauste Städa en un een fatet Launt, un neemen Hiesa en, dee met aulahaunt Goot jefelt wieren, utjehakte Borms, Wienboaj un Eeljgoades un väl Oftbeem. Un see auten un worden saut un fat un leeten sikj daut goot gonen, derch diene groote Jnod.

²⁶Oba see worden wadaspanstich un jinjen jäajen die, un schmeeten dien Jesaz hinja äarem Rigjen; un see muaken diene Profeeten doot, dee jäajen an zeijde, om an no die trigjtobrinjen; un see deeden groote Lestrunge.

²⁷Doa jeefst du an enne Haunt äare Bedrenja, un dise bedrenjden an; un to Tiet äare Bedrenjung schrieejen see no die, un du heaschd vom Himmel häa un jeefst an Radinj no diene groote Erboarmungen, un dise raden an ut de Haunt äare Bedrenja.

²⁸Oba sooboolt see Ru hauden, deeden see wada Beeset ver die. Doa äwaleetst du an de Haunt von äare Fiend, daut dise äwa an harschte; un see schrieejen wada no die, un du hieescht vom Himmel häa un radsd an no dienem Erboarmen, väl Mol.

²⁹Un du vemonsd an, om an no dienem Jesaz trigjtobrinjen, oba see wieren äwamootich un hieeden diene Jebooten nich, sonda sindijden jäajen diene Rajchte, derch dee de Mensch, wan hee dee deit, läwen woat; un see trocken de Schulla wadaspanstich trigj un muaken äa Jenekj hoat un horchten nich.

³⁰Un du haudst väl Joaren Jedult met an un zeijsd jäajen an derch dienen Jeist, derch diene Profeeten, oba see wullen nich hieren. Doa jeefst du an enne Henj de Velkja de Lenda.

³¹Oba en diene groote Erboarmungen hast du an nich jenslich vetilcht un an nich veloten; dan du best een jnädja un boarmhoatja Gott (El).

³²Un nu, ons Gott, du groota, stoakja un schrakjelja Gott [El], dee däm Bunt un de Jnod bewoat, lot nich jerinj ver die aul de Mieej sennen, dee ons jetroffen haft, onse Kjennichs, onse Bowaschten un onse Priesta un onse Profeeten un onse Vodasch un dien gaunzet Volkj, von de Doag de Kjennichs von Assierien bat opp disem Dach!

³³Doch du best Jerajcht en aulem, waut äwa ons jekomen es; dan du hast no de Woarheit jehaundelt, wie oba, wie ha gottloos jehaundelt.

³⁴Un onse Kjennichs, onse Bowaschten, onse Priesta un onse Vodasch ha dien Jesaz nich jehoolen, un ha opp diene Jebooten nich jemoakjt un opp diene Zeijnise, met waut du jäajen an jezeicht hast.

³⁵Un see ha die nich en äarem Kjennichrikj jedeent un en däm välem Gooden, dee du an jejäft, un en däm wieden un fatem Launt, daut du ver an jelajcht haudst, un sent nich trigjjedreit von äare beese Haundlungen.

³⁶Kjikj, wie sent vondoag Kjnajchts; un daut Launt, daut du onse Vodasch jejäft hast, om siene Frucht un sien Goodet too jeneeten, - kjikj, en däm sent wie Kjnajchts!

³⁷Un siene Arnt vemieet daut fa de Kjennichs, dee du om onse Sinden wellen äwa ons jesat hast; un see harschen äwa onse Kjarpa un äwa ons Vee no äarem Gootdenkjen, un wie sent en groote Noot.