Read De Bibel JHF Esta 2 Bible Online

Esta 2 - De Bibel JHF bible

Esta 2

¹No dise Bejäwenheit, aus de Oaja vom Kjennich sikj jelajcht haud, docht hee aun Vasti un aun daut, waut see jedonen, un waut äwa ar beschloten worden wia.

²Doa säden de Kjennichsdeena, dee am bedeenden: Maun sieekjt däm Kjennich Mejales, dee Junkfrues sent un scheen vom Aunseenen;

³un de Kjennich bestald Beaumte von sienem Kjennichrikj, doamet see aule Mejales, dee Junkfrues sent un scheen von Aunseenen, no de Burjch Susan en daut Frueshus toopbrinjen unja de Oppsecht Heges, däm Kjennichsdeena, däm Wajchta äwa de Frues; un maun jeft an Reinjungssaulw.

⁴Un de Mejal, daut däm Kjennich jefaulen woat, woat Kjennijin aun Vasti äare Städ. Un daut Wuat jefoll däm Kjennich; un hee deed aulsoo.

⁵Daut wia een judischa Maun enne Burjch Susan, sien Nomen wia Mordechai, Jair sien Sän, vom Sän Schimi, vom Sän Kisch, een Benjaminita,

⁶dee ut Jerusalem wajchjefieet wia met de Wajchjefieede, dee met Jechonja, däm Kjennich von Juda, wajchjefieet wort, dee Nebukadnezar, de Kjennich von Babel, wajchjefieet haud.

⁷Un hee wia de Fläajevoda de Hadassa, daut es Esta (een jlekjlicha Stiern), de Dochta von sienem Onkel; dan see haud nich Voda noch Mutta. Un de Mejal wia scheen von Jestault un scheen vom Aunjesecht. Un aus äa Voda un äare Mutta jestorwen wieren, haud Mordechai ar aus siene Dochta aunjenomen.

⁸Un daut wia, aus daut Kjennichswuat un sien Befäl jehieet, un aus väl Mejales enne Burjch Susan unja de Oppsecht Hegai toopjebrocht worden, doa wort uk Esta en daut Kjennichshus oppjenomen, unja de Oppsecht Hegai, däm Wajchta äwa de Frues.

⁹Un de Mejal jefoll am un funk Gonst ver am. Un hee spood sikj, äare Reinjungssaulw un äa Deel ar to jäwen, un ar de säwen Deenstmejales to jäwen, dee ut däm Kjennichshus utjeläst wieren; un hee deed ar met de Deenstmejales en däm bastem Uat em Frueshus.

¹⁰Esta haud äa Volkj un äare Aufstaumung nich toweeten loten; dan Mordechai haud ar befoolen, daut see daut kjeenem sajen sull.

¹¹Un Dach fa Dach jinkj Mordechai ver däm Hoff vom Frueshus, om daut Gootgonen von Esta too erfoaren, un waut met ar passieet.

¹²Un wan de Rieej aun eene jiedre Mejal kaum, nom Kjennich Ahasveros too komen, nodäm see 12 Moonaten lank no de Väaschreft fa de Frues, behaundelt worden wia — dan aulsoo worden de Doag äare Reinjunk erfelt, nämlich sas Moonaten met Mireeelj, un sas Moonat met Jewerzen un met Reinjungssaulw de Frues behaundelt,

¹³un wan dan de Mejal nom Kjennich kaum, soo wort ar aules jejäft, waut see velangd, om daut ut däm Frueshus en daut Kjennichshus mettonämen.

¹⁴Oppenowent kaumen see, un Zemorjes jinjen see en daut tweede Frueshus trigj, unja de Oppsecht von Schaaschgas, däm Kjennichs Deena [Eunuch], däm Wajchta de Näbenfrues. See kaum nich wada nom Kjennich, buta däm, daut de Kjennich aun ar Jefaulen haud, un see met Nomen jeroopt wort.

¹⁵Un aus Esta aune Rieej kaum, Abichail siene Dochta, vom Onkel von Mordechai, dee hee aus siene Dochta aunjenomen haud, daut see nom Kjennich komen sull, velangd see nuscht, buta waut Hegai, de Kjennichsdeena, de Wajchta äwa de Frues, säd. Un Esta funk Jnod enne Uagen von aule, dee ar sagen.

¹⁶Un Esta wort nom Kjennich Ahasveros en sien Kjennichshus jeholt aum 10-den Moonat, daut es de Moonat Tebet, aum säwenden Joa siene Rejierunk.

¹⁷Un de Kjennich leewd Esta, mea aus aule Frues, un see funk Jnod un Gonst ver am, mea aus aule siene Junkfrues. Un hee sad de Kjennichskroon opp äa Haupt un muak ar too Kjennijin aun Vasti äare Städ.

¹⁸Un de Kjennich muak aul siene Ferschten un Kjnajchts een grootet Gaustmol, daut Gaustmol fa Esta; un hee jeef de Lenda eene kjlandre Opploag un jeef Jeschenkja ut siene Haunt.

¹⁹Un aus toom tweeden Mol Junkfrues toopjebrocht worden, un Mordechai aum Kjennichsdooa saut;

²⁰Esta deed äare Aufstaumung kjeenem to weeten, aus Mordechai ar jesajcht haud; un Esta deed, waut Mordechai säd, aus to de Tiet, doa see bie am groot jeworden wia,

²¹en jane Doag, aus Mordechai em Kjennichsdooa saut, oajaden sikj twee Kjennichsdeena, Bigtan un Teresch, de Schwalen Wajchta, un trachten doano, de Haunt aum Kjennich Ahasveros too lajen.

²²Un daut wort däm Mordechai bekaunt, un hee berecht daut de Kjennijin Esta; un Esta säd daut däm Kjennich em Nomen von Mordechai.

²³Un de Sach wort unjasocht un rajcht jefungen; un see worden beid aun een Holt jehongen. Un daut wort ver däm Kjennich en daut Buak de Chronik jeschräwen.