Read De Bibel JHF Esta 4 Bible Online

Esta 4 - De Bibel JHF bible

Esta 4

¹Un aus Mordechai aules erfua, waut passieet wia, doa vereet Mordechai siene Kjleeda un kjleed sikj en Sakduak un Ausch; un hee jinkj enne Staut un hoof een ludet un bettalichet Jeschrecht aun.

²Un hee kaum bat ver däm Kjennichsdooa; dan em Kjennichsdooa doaf maun nich en eenem Sackkjleet nengonen.

³Un en aule Lenda, aun däm Uat woa daut Kjennichswuat un sien Befäl hankaum, wia unjre Juden eene groote Trua, un Fausten un Hielen un Weekloagen; väle sauten en Sakduak un Ausch.

⁴Un Esta äare Deenstmejales un äare Deena kaumen un säden ar daut. Doa enjst de Kjennijin sikj sea. Un see schekjt Kjleeda, daut maun dee Mordechai auntrakjt un sien Sakduak von am wajchnemt; oba hee neem dee nich aun.

⁵Doa roopt Esta Hatak, eenem von de Hoffbeaumte vom Kjennich, dän hee fa ar em Deenst jestalt haud, un jeef am Befäl, bie Mordechai too erfoaren, waut daut wia, un wuarom daut soo es.

⁶Doa jinkj Hatak rut no Mordechai nom Stautplauz, dee ver däm Kjennichdooa wia.

⁷Un Mordechai berecht am aules, waut am bejäajent wia, un de Somm von Selwa, dee Haman vesproaken haud, enne Kjennichsschatskoma auftowäaje, om de Juden to venichten.

⁸Un hee jeef am de Aufschreft von däm schreftlichen Befäl en Susan, an too vetiljen; doamet hee daut Esta wiesen un ar sajen kunn, un om ar too befälen, daut see nom Kjennich nennjeit, am om Jnod too bedden un fa äa Volkj ver am to bedden.

⁹Un Hatak kaum un berecht de Esta de Wieed von Mordechai.

¹⁰Doa säd Esta too Hatak un befool am Mordechai too sajen:

¹¹Aule Kjnajchts vom Kjennich un daut gaunze Laundesvolkj vom Kjennich weeten, daut fa eenem jiedren, Maun un Fru, dee nom Kjennich en däm bennaschten Hoff nennjeit, onen daut hee jeroopt woat, een Jesaz es, nämlich daut hee omjebrocht woat; buta däm janjen, däm de Kjennich daut goldne Zepta hanrieekjt, daut hee aum Läwen blift; oba ekj sie aul 30 Doag nich jeroopen worden, om nom Kjennich nentokomen.

¹²Un maun berecht Esta äare Wieed däm Mordechai.

¹³Un Mordechai leet Esta auntwuaden: Denkj nich en dienem Hoaten, daut du em Kjennichshus auleen von aule Juden entkomen woascht.

¹⁴Dan wan du en dise Tiet stell best, soo woat Frieheit un Radinj fa de Juden von eenem aundren Uat häa oppstonen; oba du un dien Vodahus, jie woaren omkomen. Un wäa weet, auf du nich fa eene Tiet, aus dise, nom Kjennich jekomen best?

¹⁵Doa leet Esta däm Mordechai auntwuaden:

¹⁶Go han, vesaumel aule Juden, dee sikj en Susan befinjen; un faust mienthaulwen, un ät un drinkjt nich dree Doag lank, Nacht un Dach; uk ekj woa met miene Deenstmejales soo fausten. Un dan well ekj nom Kjennich nengonen, waut nich nom Jesaz es; un wan ekj omkom, soo kom ekj om!

¹⁷Un Mordechai jinkj han un deed no aulem, waut Esta am befoolen haud.