Read De Bibel JHF Esta 7 Bible Online

Esta 7 - De Bibel JHF bible

Esta 7

¹Un de Kjennich un Haman kaumen toom Mol bie de Kjennijin Esta.

²Un de Kjennich säd to Esta uk aum tweeden Dach biem Wien drinkjen: Waut es diene Bedd, Kjennijin Esta? Un daut saul die jejäft woaren. Un waut es dien Wensch? Bat de Halft vom Kjennichrikj, un daut saul passieren.

³Doa auntwuad de Kjennijin Esta un säd: Wan ekj en diene Uagen Jnod jefungen ha, oo Kjennich, un wan daut däm Kjennich rajcht es, soo mucht mie mien Läwen jeschenkjt woaren wäajen miene Bedd, un mien Volkj om (derch) mien Velangen.

⁴Dan wie sent vekoft, ekj un mien Volkj, om vetilcht, aufjewarjcht un omjebrocht to woaren; un wan wie too Kjnajchts un Deenstmejales vekoft jeworden wieren, soo wia ekj stell jewast, soo wia de Bedrenja nich em Staund, däm Schoden vom Kjennich too ersaten.

⁵Doa räd de Kjennich Ahasveros un säd to de Kjennijin Esta: Wäa es dee, un woa es dee, dee sikj en sienem Hoaten väajenomen haft, aulsoo to doonen?

⁶Un Esta säd: De Bedrenja un Fiend es dis beesa Haman! Doa enjst sikj Haman ver däm Kjennich un de Kjennijin.

⁷Un de Kjennich stunt en sienem Jrim opp vom Wien drinkjen un jinkj em Goaden biem Paulaust. Oba Haman bleef trigj, om bie de Kjennijin Esta fa sien Läwen too bedden; dan hee sach, daut et Onjlekj jäajen am biem Kjennich aul beschloten wia.

⁸Un aus de Kjennich ut däm Goaden biem Paulaust nom Hus trigjkaum, doa wia Haman oppem Loaga jesunken, opp däm Esta saut. Doa säd de Kjennich: Well hee soogoa de Kjennijin Jewault aundoonen bie mie em Hus? Daut Wuat jinkj ut däm Kjennichsmul, doa vedakjt maun Haman daut Aunjesecht.

⁹Un Harbona, eena von de Kjennichdeena, dee ver däm Kjennich stunden, säd: Kjikj, de Boom, däm Haman fa Mordechai moaken leet, dee Goodet fa däm Kjennich jerät haft, steit bie Haman sienem Hus, 50 Ellen huach. Un de Kjennich säd: Henjt am doaraun!

¹⁰Un maun henjd Haman aun däm Boom, däm hee fa Mordechai reed jemoakt haud. Un de Jrim läd sikj vom Kjennich.