Read De Bibel JHF Esta 8 Bible Online

Esta 8 - De Bibel JHF bible

Esta 8

¹Aun däm seljen Dach jeef de Kjennich Ahasveros de Kjennijin Esta däm Haman sien Hus, vom Fiend de Juden. Un Mordechai kaum ver däm Kjennich, dan Esta haud am daut jesajcht, waut hee fa ar wia.

²Un de Kjennich neem sienen Säajelrinkj auf, däm hee Haman wajchjenomen haud, un jeef am däm Mordechai. Un Esta sad Mordechai äwa Haman sien Hus.

³Un Esta räd wada met däm Kjennich un foll am to Feet; un see hield un bedd am, de Boosheit von Haman, däm Agagita, un sienen Aunschlach, däm hee jäajen de Juden jeplont haud, auftodreien.

⁴Un de Kjennich rieekjt Esta daut goldne Zepta entjäajen. Doa stunt Esta opp un kaum ver däm Kjennich;

⁵un see säd: Wan daut däm Kjennich rajcht es, un ekj Jnod ver die (am) jefungen ha, un de Sach ver däm Kjennich rajcht es un ekj am jefaul, soo woat jeschräwen, de Breew trigjtonämen, nämlich däm Aunschlach von Haman, vom Hammedata sienem Sän, däm Agagita, dee hee jeschräwen haud, om de Juden omtobrinjen, dee en aule Lenda vom Kjennich sent.

⁶Dan woo kunn ekj daut Onjlekj aunseenen, daut mienem Volkj trafen wudd? Un woo kunn ekj däm Unjagank von mienem Jeschlajcht aunseenen?

⁷Un de Kjennich Ahasveros säd to de Kjennijin Esta un to Mordechai, däm Jud: Kjikj, daut Hus von Haman ha ekj Esta jejäft, un am haft maun aum Holt jehongen, doarom daut hee siene Haunt aune Juden jelajcht haft.

⁸Soo schriewt jie nu em Nomen vom Kjennich betrafs de Juden, aus junt daut rajcht es, un vesäajelt daut met däm Säajelrinkj vom Kjennich. Dan eene Schreft, dee em Kjennichsnome jeschräwen un met däm Säajelrinkj vom Kjennich vesäajelt es, kaun nich oppjehowen woaren.

⁹Doa worden de Kjennichsschriewa jeroopt, aun dee selje Tiet em dredden Moonat, daut es de Moonat Siwan, aum 23-sten däm seljen Dach; un daut wort no aulem, waut Mordechai befool, aun de Juden jeschräwen, un aun de Ferschten un de Launtfläaja un de Ferschten de Lenda, dee von Indien bat Ätiopien wieren, 127 Lenda, no äare Schreft de eenselne Lenda un no de Sproak von jiedren eenselnen Volkj; un uk aun de Juden no äare Schreft un äare Sproak.

¹⁰Un hee schreef em Nomen vom Kjennich Ahasveros un vesäajeld met däm Säajelrinkj vom Kjennich; un hee schekjt Breew derch Rittabote, dee oppem Kjennich siene Ranpieed rieden,

¹¹daut de Kjennich äwa de Juden, dee en aule Städa sent, erlaubt haft, sikj too vesaumlen un fa äa Läwen too stonen, too vetiljen, auftowarje un omtobrinjen aule Häamacht de Velkja un Lenda, met äare Kjinja un Frues, dee an bedrenjden un äa Hab un Goot plindre wullen;

¹²aun eenem Dach en aule Lenda vom Kjennich Ahasveros, aum 13-den Dach em 12-ten Moonat, daut es de Moonat Adar.

¹³Un doamet daut de Befäl en jiedrem eenselnen Launt bekaunt wort, wia eene Aufschreft vonne Schreft aule Velkja bekaunt jemoakt, un zwoa doamet de Juden opp disem Dach reed wieren, sikj aun äare Fiend too rajche.

¹⁴De Rittabote, dee oppe Kjennichs Ranpieed rieden, jinjen schwind opp daut Kjennichswuat ut. Un de Befäl wort enne Burjch Susan vemald.

¹⁵Un Mordechai jinkj en Kjennichskjleeda rut vom Kjennich, en purpurblaue un witte Boomwoll, un met eene groote Goldne Kroon, un en eenem Mauntel von witte Boomwoll un roodem Purpur; un de Staut Susan jubelt un wia froo.

¹⁶De Juden wia Licht un Freid un Jubel un Iea toom Deel jeworden.

¹⁷Un en jiedrem eenselnen Launt un en jiedre eenselne Staut, wuahan daut Kjennichswuat un sien Befäl kaum, wia Freid un Jubel bie de Juden, Gaustmol un Fastdach. Un väle ut de Velkja de Lenda worden Juden, dan de Angst ver de Juden wia opp an jefollen.