Read De Bibel JHF 2. Mose 17 Bible Online

2. Mose 17 - De Bibel JHF bible

2. Mose 17

¹Un de gaunze Jemeent de Kjinja Israel jinkj wajch vonne Wieste Sin, eene Doagesreis, nom Befäl Gottes; un see loagaden sikj bie Refidim; un daut wia kjeen Wota toom Drinkjen fa daut Volkj.

²Un daut Volkj zankt met Moses, un see säden: Jeft ons Wota, daut wie drinkjen! Un Moses säd to an: Waut zank jie met mie? Waut vesieekj jie däm Harn?

³Un daut Volkj darscht no Wota, un daut Volkj murrd jäajen Moses un säd: Wuarom hast du ons ut Ägipten rutjefieet, om mie un miene Kjinja un mien Vee fa Darscht stoawen to loten?

⁴Doa schrieech Moses toom Harn un säd: Waut saul ekj met disem Volkj doonen? Noch een bät, un see steenje mie.

⁵Un de Har säd to Moses: Go han ver däm Volkj, un nemm met die von de Eltestasch Israels; un dienen Stock, met waut du däm Stroom jeschloagen hast, nemm en diene Haunt un go han.

⁶Kjikj, ekj well doa selfst ver die stonen opp däm Fels aum Horeb; un du saust opp däm Fels schlonen, un daut woat Wota ut däm seljen rutkomen, daut et Volkj drinkjt. Un Moses deed aulsoo ver de Uagen de Eltestasch Israels.

⁷Un hee jeef däm Uat däm Nomen Massa un Meriba, wäajen däm Zanken de Kjinja Israel un wiels see däm Harn vesocht hauden, endäm see säden: Es de Har en onse Medd ooda nich?

⁸Un daut kaum Amalek un street jäajen Israel en Refidim.

⁹Un Moses säd to Josua: Erwäl ons Mana un go ut, stried jäajen Amalek; morjen well ekj oppe Spetz vom Aunboajch gonen, met däm Stock Gottes en miene Haunt.

¹⁰Un Josua deed, aus Moses am jesajcht haud, om jäajen Amalek too strieden; un Moses, Aaron un Hur jinjen oppe Aunboajch Spetz.

¹¹Un daut passieed, wan Moses siene Haunt opphoof, soo haud Israel de Äwahaunt, un wan hee siene Haunt ruen leet, soo haud Amalek de Äwahaunt.

¹²Un Moses siene Henj worden schwoa. Doa neemen see eenen Steen un läden däm unja am, un hee sad sikj doanopp; un Aaron un Hur unjastäten siene Henj, hia eena un doa eena; un soo wieren siene Henj faust, bat de Sonn unjajinkj.

¹³Un Josua schluach Amalek un sien Volkj dol met däm schoapen Schwieet.

¹⁴Un de Har säd to Moses: Schriew dit toom Jedajchnis en een Buak, un laj daut Josua enne Uaren, daut ekj daut Jedajchnis von Amalek unjrem Himmel gaunz uttilje woa.

¹⁵Un Moses bud eenen Aultoa un jeef am däm Nomen: Gott es miene Flag!

¹⁶Un hee säd: Dan de Haunt es aum Troon Jah: Kjrich haft de Har jäajen Amalek von Jeschlajcht too Jeschlajcht!